.jpg)
ស្ត្រីស៊ីរីម្នាក់ទទួលការព្យាបាលនៅក្នុងមន្ទីរពេទ្យមួយនៅក្នុងខេត្តអាឡិបប៉ូកាលពីថ្ងៃទី២៤ ខែវិច្ឆិកា។ AFP
ក្រុងដាម៉ាសៈ របបស៊ីរី បានចោទប្រកាន់ក្រុមប្រដាប់អាវុធពីបទវាយប្រហារឧស្ម័នពុលដែលបានបណ្តាលឲ្យមនុស្សរាប់សិបនាក់ថប់ដង្ហើម និងជំរុញឲ្យសម្ព័ន្ធមិត្តរបស់រដ្ឋាភិបាលគឺរុស្ស៊ី ធ្វើការវាយប្រហារផ្លូវសងសឹកកាលពីថ្ងៃអាទិត្យ។
ប្រព័ន្ធផ្សព្វផ្សាយរដ្ឋ និងក្រុមឃ្លាំមើល បាននិយាយថា ពលរដ្ឋស៊ីរីប្រហែល១០០នាក់ ត្រូវបានបញ្ជូនទៅមន្ទីរពេទ្យ ដើម្បីព្យាបាលផ្លូវដង្ហើម ក្រោយពីមានការចោទប្រកាន់ថា មានការវាយប្រហារគីមីនៅក្នុងខេត្តអាឡិបប៉ូ កាលពីថ្ងៃសៅរ៍។
រុស្ស៊ី បានចោទប្រកាន់ក្រុមជីហាដនិយមពីបទនៅពីក្រោយការវាយប្រហារឧស្ម័នក្លរីន និងធ្វើការវាយប្រហារផ្លូវអាកាសលើកដំបូងក្នុងរយៈពេលប៉ុន្មានខែនេះ ទៅលើជាយក្រុងអាឡិបប៉ូភាគខាងលិច។
ការចោទប្រកាន់នោះ គឺជាការចោទប្រកាន់ថ្មីបំផុតពីបទវាយប្រហារគីមីនៅក្នុងសង្រ្គាមរយៈពេល ៧ឆ្នាំ ដែលបានបណ្តាលឲ្យមនុស្សជាង៣៦មឺុននាក់ ស្លាប់ និងរាប់លាននាក់ ខ្ចាត់ព្រាត់៕ PSA
