ក្រុងកាប៊ុលៈ មនុស្ស ២ នាក់បានស្លាប់ និងរាប់សិបនាក់ផ្សេងទៀតរងរបួស នៅក្នុងក្រុងកាប៊ុលកាលពីថ្ងៃអាទិត្យ ខណៈដែលរលកនៃការ-វាយប្រហារគ្រាប់បែក បានយកក្រុមជនស៊ីវិលជាគោលដៅ នៅក្នុងនោះមានរថយន្តក្រុងសាកលវិទ្យាល័យឆ្លងកាត់រដ្ឋធានីអាហ្វហ្គានីស្ថានត្រូវរងការវាយប្រហារ។
រថយន្តក្រុង ១ គ្រឿង បានកំពុងបើកសំដៅទៅកាន់សាកលវិទ្យាល័យក្រុងកាប៊ុល ជាផ្នែកនៃទីក្រុងភាគខាងលិចកាលពីព្រឹកថ្ងៃអាទិត្យ បានរងការវាយប្រហារដោយគ្រាប់បែក ១ គ្រាប់ ដោយបង្កើនការគំរាមកំហែងនៅក្រុងកាប៊ុល ជាទីដែលក្រុមឧទ្ទាម និងក្រុមឧក្រិដ្ឋជនប្រើប្រាស់មេដែកឆក់ ដើម្បីបង្កប់គ្រឿងផ្ទុះនៅក្នុងរថយន្ត។
អ្នកនាំពាក្យក្រសួងមហាផ្ទៃលោក Nasrat Rahimi បានថ្លែងថា គ្រាប់បែកនោះ បានបង្កប់នៅខាងក្រោមរថយន្តក្រុង។ លោក Nasrat Rahimi បានបន្ថែមថា ជាអកុសលណាស់ ខណៈក្រុមមនុស្សបានប្រញាប់ប្រញាល់ទៅជួយសង្គ្រោះក្រុមជនរងគ្រោះ ស្រាប់តែគ្រាប់បែក ២ គ្រាប់ទៀត ដែលបានបង្កៃនៅចិញ្ចើមផ្លូវម្ខាងទៀត ក៏បានផ្ទុះឡើងភ្លាមៗនោះតែម្តង។
ក្រុមរដ្ឋអ៊ិស្លាម បានចេញមកអះអាងទទួលខុសត្រូវនៅក្នុងការវាយប្រហារនោះ។
របាយការណ៍ដំបូង បាននិយាយថារថយន្តក្រុង កំពុងដឹកក្រុមនិស្សិតសាកលវិទ្យាល័យ ហើយក្រោយមកអ្នកនាំពាក្យប៉ូលិសក្រុងកាប៊ុល បានថ្លែងថា និស្សិតទាំងអស់នោះជិះរថយន្តក្រុងនោះ៕ AFP/SK