.jpg)
យន្តហោះធុន TupolevTu-160 របស់រុស្ស៊ី ត្រូវបានគេថតពេលមកដល់ចុះចតនៅព្រលាន Maiquetia។ AFP
ក្រុងការ៉ាកាសៈ យន្តហោះទម្លាក់គ្រាប់បែករុស្ស៊ី ២ គ្រឿង បានចុះចតនៅក្នុងប្រទេសវ៉េណេស៊ុយអេឡាកាលពីថ្ងៃចន្ទសម្រាប់អ្វី ដែលរដ្ឋាភិបាលបាននិយាយថា គឺជាសមយុទ្ធកម្លាំងផ្លូវអាកាសដែលមានគោលបំណងពង្រឹងការការពារប្រទេសអាមេរិកខាងត្បូងដែលដឹកនាំដោយប្រធានាធិបតី ឆ្វេងនិយមនោះ។
រដ្ឋមន្ត្រីការពារជាតិ លោកឧត្តមសេនីយ៍ Vladimir Padrino បានស្វាគមន៍ពីឡុតរុស្ស៊ីប្រហែល ១០០ នាក់ និងបុគ្គលិកដទៃទៀត ក្រោយពីយន្តហោះ TU-160s ពីរគ្រឿងនិង យន្តហោះចម្បាំង ២ គ្រឿងផ្សេងទៀត បានចុះចតនៅព្រលានយន្តហោះអន្តរជាតិក្រុងការ៉ាកាស។
លោក Padrino បានថ្លែងថា ការដាក់ពង្រាយយន្តហោះទាំងនេះ បានបង្ហាញថា យើងក៏កំពុងរៀបចំការពារប្រទេសវ៉េណេស៊ុយអេឡា រហូតដល់នាទីចុងក្រោយ ប្រសិនបើមានការចាំបាច់។
លោកបានថ្លែងថា៖ «ទង្វើនេះ យើងនឹងធ្វើជាមួយមិត្តភក្តិរបស់យើង ដោយសារយើងមានមិត្តភក្តិជាច្រើន នៅក្នុងពិភពលោក ដែលយើងការពារទំនាក់ទំនងឲ្យមានតុល្យភាពនិងចាំបាច់ត្រូវគោរពគ្នា»។
មេបញ្ជាការកងទ័ពអាកាសរុស្ស៊ី លោក ឧត្តមសេនីយ៍ Sergei Ivanovich Kobulash បានថ្លែងថា សមយុទ្ធទាំងនោះ នឹងផ្លាស់ប្តូរបទពិសោធគ្នាទៅវិញទៅមករវាងពីឡុតនិងបុគ្គលិកបច្ចេកទេសមកពីប្រទេសទាំង ២។
លោក Vladimir Padrion (កណ្តាល) ត្រូវបានគេថតក្រោយពីយន្តហោះធុន TupolevTu-160 ពីរគ្រឿងមកដល់។ AFP
ការដាក់ពង្រាយយន្តហោះដើម្បីធ្វើសមយុទ្ធយោធាទាំងនេះ បានកើតឡើងបន្ទាប់ពីដំណើរទស្សនកិច្ចរបស់លោកនីកូឡាស ម៉ាឌូរ៉ូ ទៅកាន់ក្រុងម៉ូស្គូកាលពីសប្តាហ៍មុននៅក្នុងអំឡុងពេលលោកពិភាក្សាជាមួយលោកប្រធានាធិបតីរុស្ស៊ី វ្ល៉ាឌីមៀរ ពូទីន ដែលបានសម្តែងការគាំទ្រចំពោះរដ្ឋាភិបាលសង្គមនិយមនេះ។
ជារឿយៗនោះ លោកម៉ាឌូរ៉ូចោទប្រកាន់អាមេរិកពីបទរៀបផែនការប្រឆាំងនឹងរដ្ឋាភិបាលរបស់លោក ដែលប្រទេសសម្បូរដោយប្រេងនេះបានធ្លាក់ក្នុងវិបត្តិសេដ្ឋកិច្ច។
យោងតាមសេចក្តីប្រកាសរបស់យោធានៅក្រុងម៉ូស្គូ បានឲ្យដឹងថា ក្រៅពីយន្តហោះទម្លាក់គ្រាប់បែក ២ គ្រឿងនោះ ការដាក់ពង្រាយនោះបានបញ្ចូលយន្តហោះដឹកជញ្ជូនធុន An-124 ១ គ្រឿង និងយន្តហោះដឹកអ្នកដំណើរធុន Il-62 ១ គ្រឿង៕
ទ័ពអាកាសរុស្ស៊ី ឈរនៅមុខយន្តហោះទម្លាក់គ្រាប់បែកធុន TupolevTu-160 ដែលចតនៅព្រលាន Maiquetia។ AFP
