ក្រុងបាងកក៖ យោងតាមកម្មវិធីដំណើរទស្សនកិច្ចរបស់វិមានរដ្ឋាភិបាលបានឲ្យដឹងថា លោកនាយករដ្ឋមន្ត្រី ប្រាយុធ ចាន-អូចា កាលពីថ្ងៃព្រហស្បតិ៍ បានចុះទៅសួរសុខទុក្ខ និងជួបសំណេះសំណាលជាមួយក្រុមជនរងគ្រោះដោយទឹកជំនន់នៅខេត្តអ៊ុប៊ុនរ៉ាតចាថានី ជាខេត្តមួយក្នុងចំណោមខេត្ត ៤ ដែលប៉ះពាល់ដោយទឹកជំនន់យ៉ាងធ្ងន់ធ្ងរបំផុត។
លោកនាយករដ្ឋមន្ត្រី បានធ្វើដំណើរទស្សនកិច្ចទៅកាន់ស្រុកវ៉ារីនចាំរ៉ាក់ ជាទីកន្លែងដែលរងគ្រោះដោយសារទឹកជំនន់យ៉ាងអាក្រក់បំផុតនៅក្នុងខេត្តនោះ ដោយបានជន់លិចផ្ទះកម្ពស់ ២ ជាន់ អស់ជាច្រើនខ្នង។ ក្រៅពីជួបជាមួយក្រុមជនរងគ្រោះ និងចែកអំណោយដល់ពួកគេនោះ លោកឧត្តមសេនីយ៍ ប្រាយុធ ចាន-អូចា បានដឹកនាំសកម្មភាពប្រមូលសំរាមចេញពីទន្លេម៉ូននោះផងដែរ។
ចំណែកឯដារ៉ាសម្តែងតួឯកលោក ប៊ិន ប៊ុនឡឺរិត ដែលកំពុងដឹកនាំយុទ្ធនាការជំនួយមនុស្សធម៌មួយ នៅខេត្តអ៊ុប៊ុនរ៉ាតចាថានី បានថ្លែងថា ការបរិច្ចាគទឹកប្រាក់របស់សាធារណជន បានកើនដល់ចំនួន ៣៣២ លានបាតហើយ កាលពីថ្ងៃពុធកន្លងទៅ។
លោក ប៊ិន បានទាត់ចោលពាក្យចចាមអារ៉ាមថា លោក បានបញ្ចូលយុទ្ធនាការរបស់លោកជាមួយនឹងរដ្ឋាភិបាល ដែលអ្នករិះគន់និយាយថា ធ្វើឲ្យយឺតយ៉ាវក្នុងការឆ្លើយតបទៅនឹងវិបត្តិនេះ៕ BKP/SK