ក្រុងប៉ារីសៈ ប្រធានាធិបតី បារាំង លោក អេម៉ានុយ អែល ម៉ាក្រុងកាលពីថ្ងៃចន្ទ បានប្រកាសចាត់វិធានការហិរញ្ញវត្ថុ ជាបន្តបន្ទាប់ ដោយបានស្វះស្វែង ដើម្បីបញ្ចប់ការប៉ះបោររបស់ក្រុមអ្នកតវា់ «អាវកាក់ពណ៌លឿង» ដែលបានបង្ក ឲ្យមានការតវ៉ាដោយហិង្សានៅក្នុងក្រុងជាច្រើន នៅទូទាំងប្រទេសនេះ។
នៅក្នុងសុន្ទរកថារយៈពេល ១៥ នាទី ដែលត្រូវបានចាក់ផ្សាយតាមទូរទស្សន៍ពីវិមាន Elysee នោះ លោកប្រធានាធិបតី ដែលមានទឹកមុខស្រងូតស្រងាត់រូបនេះ បានថ្លែងប្រាប់ប្រជាជាតិថា៖ «ខ្ញុំសូមទទួលខុសត្រូវរួមចំពោះវិបិត្តនេះ»។
អតីតអ្នកជំនាញធនាគារ វិនិយោគរូបនេះ លោកបាន ប្រើសម្តីសាមញ្ញជាងធម្មតា ខណៈលោកបានខិតខំប្រឹងប្រែងដោះស្រាយការរិះគន់ចំពោះរបៀបនៃការដឹកនាំរបស់លោកកន្លងមក។
លោក បានថ្លែងថា៖ «ខ្ញុំដឹងថាខ្ញុំធ្វើឲ្យអ្នកខ្លះឈឺចាប់ដោយសារតែពាក្យសម្តីរបស់ខ្ញុំ »។
លោកម៉ាក្រុង បានសង្កត់ធ្ងន់ថា អ្នកតវ៉ាភាគច្រើន គឺជាអ្នកដែលមានប្រាក់ចំណូលទាបនៅក្នុងក្រុងតូចៗ ឬនៅទីជនបទនៃប្រទេសនេះ៕