ក្រុងភីកាន់បារ៉ូ៖ លោកប្រធានាធិបតីឥណ្ឌូនេស៊ី ជូកូ វីដូដូ បានថ្លែងនៅអំឡុងដំណើរទស្សនកិច្ចមួយទៅកាន់តំបន់ ដែលរងការឆេះព្រៃយ៉ាងខ្លាំងមួយកន្លែងកាលពីថ្ងៃអង្គារថា ប្រទេស ឥណ្ឌូនេស៊ី កំពុងប្រយុទ្ធប្រឆាំងជាមួយភ្លើងឆេះព្រៃ ដែលបានបង្កឲ្យទៅជាផ្សែងពុលនៅទូទាំងអាស៊ីអាគ្នេយ៍ ដោយមានទាំងយន្តហោះ ភ្លៀងសិប្បនិម្មិត និងថែមទាំងមានការបន់ស្រន់ទៀតផង។
ភ្លើងឆេះព្រៃ កំពុងរាលដាលនៅលើកោះ Borneo និង Sumatra ដោយបានធ្វើឲ្យផ្សែងអាប់អួក្រាស់ឃ្មឹកគ្របដណ្តប់នៅទូទាំងតំបន់រួមទាំងឆ្ពោះទៅប្រទេស ម៉ាឡេស៊ី និងសិង្ហបុរី ដែលនៅក្បែរខាងនោះ។
នៅអំឡុងទស្សនកិច្ចទៅកាន់ខេត្ត Riau នៅកណ្តាលកោះ Sumatra កាលពីថ្ងៃអង្គារ លោក វីដូដូ បានថ្លែងថា កងកម្លាំងជិត ៦ ០០០ នាក់ ត្រូវបានបញ្ជូនទៅកាន់ចំណុចក្តៅដើម្បីជួយពន្លត់ភ្លើងនៅទីនោះ។
លោកបានថ្លែងថា៖ «យើងបានខំប្រឹងប្រែងគ្រប់បែបយ៉ាងទាំងអស់ដើម្បីពន្លត់ភ្លើងនោះហើយ»។
លោកបានថ្លែងថា ក្រៅពីក្រុមអ្នកពន្លត់អគ្គិភ័យនៅលើដីមានយន្តហោះរាប់សិបគ្រឿងទៀត ត្រូវបានកំពុងប្រើប្រាស់ដើម្បីបង្កើតភ្លៀងសិប្បនិម្មិត។
លោកបានបន្ថែមថា៖ «យើងក៏បានបន់ស្រន់ផងដែរ» ក្រោយពីទស្សនកិច្ចទៅកាន់ព្រះវិហារអ៊ិស្លាម Amrulloh នៅក្រុងភីកាន់បារ៉ូនោះ។
ផ្សែងពុលនោះ បានបង្កឡើងដោយសារគេដុតសម្អាតយកដី ដើម្បីធ្វើចម្ការ ដោយបង្កឲ្យមានបញ្ហាជារៀងរាល់ឆ្នាំដល់ប្រទេស ឥណ្ឌូនេស៊ី និងបណ្តាប្រទេសក្បែរខាងរបស់ខ្លួន ប៉ុន្តែបានរងនូវការឆេះយ៉ាងធ្ងន់ធ្ងរនៅឆ្នាំនេះ ជាពិសេស ដោយសារតែអាកាសធាតុក្តៅខ្លាំង។
ក្រុមអាជ្ញាធរបានថ្លែងកាលពីថ្ងៃចន្ទថា ពួកគេបានចាប់ខ្លួនមនុស្សជិត ២០០ នាក់ ដែលបានសង្ស័យពីបទកំពុងធ្វើឲ្យជាប់ពាក់ព័ន្ធនៅក្នុងសកម្មភាពដែលឈានដល់ការដុតបំផ្លាញព្រៃមិនអាចគ្រប់គ្រងបាន។
ក្រុមអាជ្ញាធរបានថ្លែងថា ក្រុមហ៊ុន ៤ កំពុងត្រូវបានគេស៊ើបអង្កេត។ ទីភ្នាក់ងារឧតុនិយមនៃសមាគមប្រជាជាតិអាស៊ីអាគ្នេយ៍ (ASEAN) បានថ្លែងកាលពីថ្ងៃអង្គារថា តំបន់ក្តៅជាច្រើនមានភាពស្ងប់ស្ងាត់ ប៉ុន្តែនៅតែមានផ្សែងអ័ព្ទខ្លាំងបន្តគ្របដណ្តប់តំបន់នោះ៕ AFP/SK