ក្រុងហេរ៉ាតៈ ក្រុមមន្ត្រីបានថ្លែងថា មានសន្តិសុខអាហ្វហ្គានីស្ថាន៤នាក់ បានស្លាប់កាលពីថ្ងៃសៅរ៍ នៅពេលក្រុមឧទ្ទាមតាលីបង់ បានវាយប្រហារទៅលើសណ្ឋាគារមួយកន្លែង ខណៈអំពើហិង្សា បានបន្តកើតឡើងនៅទូទាំងប្រទេសអាហ្វហ្គានីស្ថាន ទោះបីជាមានកិច្ចខិតខំប្រឹងប្រែងដឹកនាំដោយអាមេរិក ដើម្បីបញ្ចប់សង្គ្រាមក្តី។
ការវាយប្រហារនោះ បានកើតឡើងនៅក្នុងទីក្រុង Qala-i-Naw នៅភាគខាងលិចនៃខេត្ត Badghis នៅពេលក្រុមអ្នកវាយប្រហារទាំងនោះ បានបើកការប្រយុទ្ធនៅតំបន់ពាណិជ្ជកម្មមួយកន្លែង ដែលមានសណ្ឋាគារ និងហាងលក់ទំនិញជាច្រើននៅក្នុងទីក្រុងតូចនោះ។
អភិបាលខេត្ត Badghis លោក Abdul Ghafoor Malikzai បានថ្លែងប្រាប់ AFP ថា៖ «យើងទទួលបានរបាយការណ៍ជាច្រើនពីចារកម្មថា ក្រុមអ្នកបំផ្ទុះគ្រាប់បែកអត្តឃាតទាំងនោះ បានកំពុងមានផែនការវាយប្រហារទៅលើក្រុង Qala-i-Naw នោះ»។
ក្រសួងការពារជាតិបានថ្លែងថា ក្រុមអ្នកវាយប្រហារទាំង ៣ នាក់បានស្លាប់ និងជាង ២ នាក់ផ្សេងទៀត ត្រូវបានចាប់ខ្លួន។
ក្រសួងនោះបានថ្លែងថា សមាជិកកងកម្លាំងសន្តិសុខអាហ្វហ្គានីស្ថាន ៤ នាក់បានស្លាប់ និង ២០ នាក់ផ្សេងទៀតរងរបួស នៅក្នុងនោះមានជនស៊ីវិលខ្លះដែរ៕ SK