ក្រុងបាងកក៖ ព្រឹទ្ធសភាម្នាក់បានអំពាវនាវឲ្យសភាជាន់ខ្ពស់ចូលរួម ក្រោយពីរដ្ឋាភិបាល និងសមាជិកសភាបក្សប្រឆាំងបានដាក់ញត្តិ ២ ដាច់ដោយឡែកស្នើសុំឲ្យបង្កើតគណៈកម្មាធិការមួយ ដើម្បីសិក្សាអំពីការកែប្រែរដ្ឋធម្មនុញ្ញ។
ព្រឹទ្ធសភាលោក កាំនូន ស៊ីដឌីសាម៉ាន់ កំពុងធ្វើអត្ថាធិប្បាយអំពីការបោះឆ្នោតមួយកាលពីថ្ងៃសុក្ររបស់ក្រុមសមាជិកសភា ដើម្បីផ្តល់អាទិភាពដល់ការជជែកដេញដោលអំពីញត្តិស្នើសុំធ្វើវិសោធនកម្មច្បាប់រដ្ឋធម្មនុញ្ញនៅក្នុងកិច្ចប្រជុំសភាលើកក្រោយ នៅខែវិច្ឆិកាខាងមុខនេះ។
លោក កាំនូន កាលពីថ្ងៃសៅរ៍បានថ្លែងថា លោកចង់ឲ្យព្រឹទ្ធសភាមានវត្តមាននៅគណៈកម្មាធិការនោះ ដោយលើកឡើងអំពីបញ្ញត្តិរដ្ឋធម្មនុញ្ញមួយដែលបានចែងថា ការធ្វើវិសោធនកម្មច្បាប់រដ្ឋធម្មនុញ្ញ ត្រូវការឲ្យមានការបោះឆ្នោតគាំទ្រចេញពីក្រុមព្រឹទ្ធសភាយ៉ាងតិច ១ ភាគ ៣ នៅក្នុងកិច្ចប្រជុំលើកដំបូង និងកិច្ចប្រជុំមាន ៣ លើក។
លោក កាំនូន បានថ្លែងថា៖ «គណៈកម្មាធិការសភាព្រឹទ្ធសភារួមមួយ អាចត្រូវបង្កើតឡើងនៅក្រោមបទប្បញ្ញត្តិកិច្ចប្រជុំរបស់សភា ឬការបង្គាប់របស់ប្រធានសភា»។
លោកបានច្រានចោលចំពោះសកម្មភាពមួយដែលបានស្នើសុំដោយក្រុមសមាជិកសភាខ្លះ ដែលឲ្យបដិសេធមិនទទួលស្គាល់ចំពោះតួនាទីមួយរបស់ព្រឹទ្ធសភា ដោយនិយាយថា រដ្ឋធម្មនុញ្ញត្រូវធានាឲ្យមានការបោះឆ្នោតព្រឹទ្ធសភាចំពោះការធ្វើវិសោធនកម្មច្បាប់រដ្ឋធម្មនុញ្ញ។
ព្រឹទ្ធសភាលោក ស៊ីរី ស៊ូវ៉ាន់ផានុន ដែលជាប្រធានគណៈកម្មាធិការព្រឹទ្ធសភាម្នាក់ទទួលបន្ទុកការអភិវឌ្ឍនយោបាយ និងការចូលរួមសាធារណៈបានថ្លែងថា អនុគណៈកម្មាធិការមួយនឹងត្រូវបង្កើតឡើងដើម្បីត្រួតពិនិត្យវិសោធនកម្មរដ្ឋធម្មនុញ្ញ៕ KP/SK