ក្រុងប៊ូឡាវ៉ាយ៉ូៈ កងកម្លាំងយោធា និងប៉ូលិស ត្រូវបានដាក់ពង្រាយនៅក្នុងទីក្រុងប៊ូឡាវ៉ាយ៉ូទី ២ របស់ប្រទេស ហ្ស៊ីមបាវ៉េ កាលពីថ្ងៃចន្ទ នៅក្នុងកិច្ចប្រឹងប្រែងមួយដើម្បីទប់ស្កាត់ការគ្រោងដើរហែក្បួនតវ៉ា រយៈពេល ៣ ថ្ងៃ ក្រោយពីការបង្ក្រាបយ៉ាងសាហាវទៅលើក្រុមអ្នកតវ៉ាដែលត្រូវ ហាមប្រាមមិនឲ្យធ្វើបាតុកម្ម នៅក្នុងទីក្រុងហារ៉ារ៉េនោះ។
ក្រុមទាហាន និងប៉ូលិសប្រដាប់ដោយអាវុធ ដែលបានជិះសេះ និងជិះរថយន្តជាច្រើនគ្រឿង បានល្បាតនៅកណ្តាលសង្កាត់ជំនួញភាគកណ្តាលហើយភាគច្រើននៃតំបន់ជាយក្រុងមានដង់ស៊ីតេប្រជាជនខ្ពស់។
ដោយប្រើប្រាស់ឧគ្ឃោសនស័ព្ទប៉ូលិសបានព្រមានមនុស្សទាំងនោះ មិនឲ្យចូលរួមធ្វើបាតុកម្ម ហើយបានហៅការតវ៉ានោះថាធ្វើឲ្យស្ថានភាពសេដ្ឋកិច្ចកាន់តែអាក្រក់ខ្លាំងឡើងៗ។
តំបន់មួយនៅក្នុងចំណោមតំបន់ដ៏មមាញឹករបស់ទីក្រុងនោះ ជាសង្កាត់ដែលមានតុលាការជាន់ទាប Tredgold ស្ថិតនៅ ហើយជាកន្លែងដោះដូររូបិយវត្ថុបរទេសខុសច្បាប់ ត្រូវបានគេដាក់ខ្សែព័ទ្ធមិនឲ្យចេញចូល។
ប៉ូលិសបានបង្កើតប៉ុស្តិ៍ត្រួតពិនិត្យនៅតាមដងផ្លូវទៅកាន់កណ្តាលក្រុងនេះ។
ក្រុមអាជ្ញាធរបានហាមប្រាមមិនឲ្យក្រុមអ្នកតវ៉ាធ្វើបាតុកម្ម ដែលបានរៀបចំឡើងដោយក្រុមចលនាប្រឆាំង ដើម្បីផ្លាស់ប្តូរប្រជាធិបតេយ្យ (MDC) ក្រោយពីប៉ូលិសបានបំបែកក្រុមអ្នកតវ៉ា ដែលមិនបានគោរពបញ្ជាស្រដៀងគ្នានៅក្នុងក្រុងហារ៉ារ៉េ កាលពីថ្ងៃសុក្រនោះ។
លោក Mbuso Fuzwayo ជាសមាជិកនៃក្រុមសិទ្ធិមនុស្សរបស់លោក Ibhetshu Likazulu បានថ្លែងប្រាប់ AFP ថា៖ «វិធានការរបស់រដ្ឋាភិបាលហាមប្រាមមិនឲ្យធ្វើបាតុកម្មនោះបង្ហាញថា ពួកគេកំពុងភ័យខ្លាច» ខណៈឧទ្ធម្ភាគចក្រយោធាជាច្រើនគ្រឿងបានហោះសំកាំង ដើម្បីតាមដានស្ថានការណ៍នោះ៕ AFP/SK