ក្រុងឌូបៃៈ អង្គការលើកលែងទោសអន្តរជាតិ (Amnesty Internattional) កាលពីថ្ងៃពុធ បានថ្កោលទោសការពន្យារពេលឃុំខ្លួនអ្នកកាសែត ១០ នាក់ ដោយក្រុមឧទ្ទាមហ៊ូធី នៅប្រទេស យេម៉ែន ដោយនិយាយថា នេះគឺជាការឆ្លុះបញ្ចាំងឲ្យឃើញពី «ការរឹតត្បិតសិទ្ធិសេរីភាពក្នុងការបញ្ចេញមតិយោបល់ នៅក្នុងប្រព័ន្ធផ្សព្វផ្សាយរបស់រដ្ឋ» នៅក្នុងប្រទេសហែកហួរដោយសង្គ្រាមមួយនេះ។
យោងតាមក្រុមឃ្លាំមើលសិទ្ធិមនុស្សបានឲ្យដឹងថា អ្នកកាសែតទាំង ១០ នាក់នោះត្រូវបានឃុំខ្លួនចាប់តាំងពីរដូវក្តៅកាលពីឆ្នាំ ២០១៥ ហើយត្រូវ បានកាត់ទោសពាក់ព័ន្ធនឹងការចោទប្រកាន់ពីបទលបយកការណ៍។
ក្រុមឃ្លាំមើលសិទ្ធិមនុស្ស បានថ្លែងថា ក្រុមអ្នកកាសែតនោះ ត្រូវបានគេធ្វើទារុណកម្មមិនឲ្យមានការទំនាក់ទំនងពីខាងក្រៅ និងមិនត្រូវបានអនុញ្ញាតឲ្យថែទាំសុខភាពទៀតផង។
លោកស្រី Rasha Mohamed ជាអ្នកស្រាវជ្រាវយេម៉ែនរបស់អង្គការលើកលែងទោសអន្តរជាតិ បានថ្លែងថា៖ «ការពន្យារពេលឃុំខ្លួនដោយ ខុសច្បាប់ ការធ្វើទារុណកម្ម និងការធ្វើទុក្ខបុកម្នេញទៅលើអ្នកកាសែតទាំង ១០ នាក់ គឺជាការរំឭកគួរឲ្យរន្ធត់អំពីបរិយាកាសប្រព័ន្ធផ្សព្វផ្សាយ ដែលរងការគាបសង្កត់ទៅនឹងការប្រឈមមុខដោយក្រុមអ្នកកាសែតនៅយេម៉ែន និងបង្ហាញអំពីហានិភ័យ ដែលពួកគេបានប្រឈមជាមួយក្រុមភាគីមានជម្លោះទាំងអស់នោះ»។
«អ្នកទាំងអស់នេះ ត្រូវបានគេផ្តន្ទាទោស ជុំវិញការប្រើប្រាស់សិទ្ធិរបស់ពួកគេដោយសន្តិភាព ដើម្បីសេរីភាពក្នុងការបញ្ចេញមតិ៕ AFP/SK