បុរីញូវយ៉កៈ នៅក្នុងរបាយការណ៍មួយ អង្គការសហប្រជាជាតិ បានថ្លែងថា មីស៊ីលជាច្រើនគ្រាប់ ដែលត្រូវបានរកឃើញនៅយែម៉ែន ត្រូវបានគេសង្ស័យថា ផលិតនៅអ៊ីរ៉ង់។
បណ្តាប្រទេសគ្រប់គ្រងដោយរាជាធិបតេយ្យឈូងសមុទ្រ និងអាមេរិកបានចោទប្រកាន់អីុរ៉ង់ពីបទគាំទ្រក្រុមឧទ្ទាមហ៊ូធីនៅយេម៉ែន ហើយមើលឃើញថានេះគឺជាការរកលេសមួយសម្រាប់ធ្វើយុទ្ធនាការយោធា ដែលពួកគេ បានកំពុងធ្វើសង្គ្រាមនៅយេម៉ែន ចាប់តាំងឆ្នាំ ២០១៥ មកនោះ។
អីុរ៉ង់ គាំទ្រគោលនយោបាយរបស់ក្រុមឧទ្ទាម ប៉ុន្តែបដិសេដថាមិនបានផ្គត់ផ្គង់សព្វាវុធដល់ពួកគេនោះទេ។
របាយការណ៍ចេញពីការិយាល័យអគ្គលេខាធិការអង្គការសហប្រជាជាតិ លោក Antonio Guterres បានឲ្យដឹងថា បុគ្គលិករបស់លោក បានត្រួតពិនិត្យមើលកុងតែន័រ ២ គ្រឿងផ្ទុកមីស៊ីលប្រឆាំងរថក្រោះជាច្រើនដើម ដែលបានរឹបអូសដោយក្រុមចម្រុះដឹកនាំដោយ អារ៉ាប៊ី សាអ៊ូឌីត នៅក្នុងប្រទេស យេម៉ែន។
របាយការណ៍នោះ បានឲ្យដឹងថា៖ «ការិយាល័យនោះ បានរកឃើញថា មីស៊ីលទាំងនោះ មានលក្ខណៈជាមីស៊ីលផលិតនៅអីុរ៉ង់»។
របាយការណ៍របស់ខ្លួនបានបន្ថែមទៀតថា៖ «ការិយាល័យលេខាធិការនោះ បានត្រួតនិត្យមើលគ្រាប់មីស៊ីលបាញ់ពីផ្ទៃរាបទៅលើអាកាស ដែលក្រុមចម្រុះដឹកនាំដោយ អារ៉ាប៊ី សាអ៊ូឌីត បានរឹបអូស ហើយត្រួតពិនិត្យឃើញថា លក្ខណៈពិសេសរបស់មីស៊ីលទាំងនោះ ដូចគ្នាទៅនឹងមីស៊ីលរបស់អីុរ៉ង់។
របាយការណ៍ខ្លួនបានឲ្យដឹងទៀតថា៖ «ការស៊ើបអង្កេតទៅលើប្រភពដើមនៃអាវុធទាំងនោះ កំពុងដំណើរការបន្ត»៕ SK