ក្រុងពុត្រាចាយ៉ាៈ អតីតមេដឹកនាំម៉ាឡេស៊ីលោក ណាជីបរ៉ាហ្សាក់ បានមកដល់ស្នាក់ការទីភ្នាក់ងារប្រឆាំងអំពើពុករលួយកាលពីថ្ងៃព្រហស្បតិ៍ដើម្បីឲ្យគេសាកសួរលើកទី ២ ជុំវិញរឿងអាស្រូវអំពើពុករលួយទឹកប្រាក់រាប់ពាន់លានដុល្លារ ក្រោយពីលោកចាញ់ការបោះឆ្នោតនោះ។
គណបក្សចម្រុះរបស់លោកណាជីប បានទទួលរងការបរាជ័យ ក្នុងការបោះឆ្នោតកាលពីថ្ងៃទី ៩ ខែឧសភា ដែលបានបញ្ចប់ការកាន់អំណាច ៦ ទសវត្សរ៍ ដោយសម្ព័ន្ធមិត្តកំណែទម្រង់និយមដឹកនាំដោយលោក ម៉ាហាធៀ ម៉ូហាម៉ាដ។
លោកម៉ាហាធៀ ដែលដំបូងបានកាន់តំណែង ជានាយករដ្ឋមន្ត្រីពីឆ្នាំ ១៩៨១ ដល់ឆ្នាំ ២០០៣ និងបានចាកចេញពីការចូលនិវត្តន៍នៅអាយុ ៩២ ឆ្នាំមកប្រជែងតំណែងជាមួយលោកណាជីប បានធ្វើការបញ្ជាក់អះអាងថា អតីតមេដឹកនាំ និងក្រុមមិត្តជិតស្និទ្ធរបស់លោកបានលួចលុយពីមូលនិធិ 1MDB។
តាមការចោទប្រកាន់ ទឹកប្រាក់រាប់ពាន់លានដុល្លារ ត្រូវបានលួចចេញពីមូលនិធិនោះជាការលួចបន្លំតាមបច្ចេកទេសទំនើប និងបានប្រើប្រាស់ដើម្បីទិញសម្ភារគ្រប់បែបយ៉ាង មានចាប់ពីរូបចម្លាក់ រហូតដល់អចលនទ្រព្យមានតម្លៃថ្លៃកប់ពពកនោះ។
ចាប់តាំងពី លោក ណាជីបធ្លាក់ពីតំណែងតាមការរាយការណ៍ ប៉ូលិសបានរឹបអូសប្រាក់យ៉ាងតិច ២៥ លានដុល្លារបូកនឹងគ្រឿងអលង្ការ និងកាបូបដៃជាច្រើននៅពេលវាយឆ្មក់ទៅលើភូមិគ្រឹះមួយចំនួនដែលពាក់ព័ន្ធនឹងលោក និងភរិយារបស់លោក។ លោកណាជីប មកដល់ស្នាក់ការគណៈកម្មការប្រឆាំងអំពើពុករលួយ ដើម្បីបំភ្លឺអំពីបញ្ហាលុយកាក់របស់ 1MDB៕