ក្រុងសេអ៊ូល៖ យោងតាមរបាយការណ៍កូរ៉េខាងជើងបានឲ្យដឹងកាលពីថ្ងៃអាទិត្យថា លោក Ri Su-yong ជាអតីតរដ្ឋមន្ត្រីការបរទេសកូរ៉េខាងជើង និងអនុប្រធានគណៈកម្មាធិការមជ្ឈិមបក្សរបស់គណបក្សពលករកំពុងគ្រប់គ្រងអំណាច និងក្រុមមន្ត្រី ៤ រូបផ្សេងទៀត ហាក់បីដូចជាត្រូវបានផ្លាស់ប្តូរតំណែងនៅក្នុងកិច្ចប្រជុំគណបក្សពេញអង្គកាលពីពេលថ្មីៗនេះ។
កាលពីថ្ងៃទី ១ ខែមករា កូរ៉េខាងជើងបានប្រកាសអំពីការផ្លាស់ប្តូរតំណែងបុគ្គលិកបក្សសំខាន់ៗរបស់ខ្លួន ដែលបានប្រកាសលទ្ធផលអំពីកិច្ចប្រជុំពេញអង្គរយៈពេល ៤ ថ្ងៃ ដោយគណៈកម្មាធិការមជ្ឈិមរបស់គណបក្សពលករដែលកំពុងគ្រប់គ្រងអំណាច។
ប៉ុន្តែបញ្ជីឈ្មោះរបស់ក្រុមអ្នកដែលស្ថិតនៅក្នុងការផ្លាស់ប្តូរនោះ មិនត្រូវផ្សព្វផ្សាយឲ្យដឹងនៅពេលនោះទេ។
ខ្លឹមសារលម្អិតនៃការរៀបចំកិច្ចប្រជុំបក្សកាលពីពេលថ្មីៗនេះបានធ្វើឡើង ដើម្បីឆ្លុះបញ្ចាំងជាមួយការបង្ហាញរបស់កូរ៉េខាងជើងកាលពីថ្ងៃសៅរ៍ អំពីសមាជិកភាពរបស់ក្រុមថ្នាក់ដឹកនាំគណៈកម្មាធិការជើងខ្លាំងទាំង ៧០ រូប ដើម្បីប្រារព្ធពិធីបុណ្យសពយុទ្ធជនម្នាក់ក្នុងចំណោមយុទ្ធជនទាមទារឯករាជ្យ និងក្រុមវីរបុរសរបស់ប្រទេសមួយនេះ។
យោងតាមបញ្ជីឈ្មោះនោះ អនុប្រធាន ៥ រូប នៅក្នុងចំណោមអនុប្រធានទាំង ១២ រូប របស់គណៈកម្មាធិការមជ្ឈិមបក្ស នៅក្នុងនោះលោក Ri Su-yong មិនមានឈ្មោះនៅក្នុងបញ្ជីនោះទេ ដោយបានបង្ហាញថា ពួកគេលែងស្ថិតនៅក្នុងតំណែងរបស់ពួកគេទៀតហើយ។
ក្រៅពីលោក Ri Su-yong គឺលោក Pak Kwang-ho ជាអនុប្រធានគណបក្ស និងប្រធានក្រសួងត្រួតពិនិត្យ និងឃោសនាការរបស់គណបក្សពលករដែលកំពុងគ្រប់គ្រងអំណាចមួយនេះក៏ត្រូវបានគេផ្លាស់ប្តូរផងដែរ៕ Yonha