ក្រុងអែលកូៈ ប្រធានាធិបតីអាមេរិកលោក ដូណាល់ ត្រាំ កាលពីថ្ងៃសៅរ៍ បានថ្លែងថា អាមេរិក មានគម្រោងដកខ្លួនចេញពីកិច្ចព្រមព្រៀងនុយក្លេអ៊ែរជាប្រវត្តិសាស្ត្រជាមួយរុស្ស៊ីជុំវិញការអះអាងថា ក្រុងម៉ូស្គូ រំលោភលើកិច្ចព្រមព្រៀងនេះ។
សន្ធិសញ្ញាកម្លាំងនុយក្លេអ៊ែរចម្ងាយមធ្យមមានអាយុបីទសវត្សរ៍ ដែលត្រូវបានគេស្គាល់ថា INFត្រូវបានចុះហត្ថលេខា ដោយប្រធានាធិបតីរូណាល់ រីហ្គែន (Ronald Reagan)។
លោកត្រាំ បានថ្លែងប្រាប់ក្រុមអ្នកកាសែតនៅក្នុងក្រុងអែលកូ៖«យើង គឺជាអ្នកដែលបន្តនៅក្នុងកិច្ចព្រមព្រៀងនេះ ហើយយើង បានគោរពតាមកិច្ចព្រមព្រៀងនេះ ប៉ុន្តែរុស្ស៊ីមិនបានគោរពតាមកិច្ចព្រមព្រៀងនោះទេ ដូច្នេះយើង នឹងបញ្ចប់កិច្ចព្រមព្រៀងនោះ ហើយយើងនឹងដកខ្លួនចេញ»។
លោកបានបន្តថា៖«រុស្ស៊ី បានរំលោភលើកិច្ចព្រមព្រៀងនេះ។ ពួកគេ បានរំលោភលើកិច្ចព្រមព្រៀងនេះច្រើនឆ្នាំហើយ។ ខ្ញុំមិនដឹងថា ហេតុអ្វីបានជាលោកប្រធានាធិបតី បារ៉ាក់ អូបាម៉ា មិនបានចរចា ឬ ដកខ្លួនចេញនោះ»៕ PSA