ក្រុងវ៉ាស៊ីនតោនៈ អាមេរិកបានថ្លែងកាលពីថ្ងៃចន្ទថា ខ្លួនមានសង្ឃឹមដើម្បីរៀបចំកិច្ចពិភាក្សាការលុបបំបាត់កម្មវិធីអាវុធនុយក្លេអ៊ែរជាមួយកូរ៉េខាងជើង ក្រោយពីក្រុងព្យុងយ៉ាង បានព្រមានថា ការធ្វើសមយុទ្ធយោធាអាមេរិកកូរ៉េ-ខាងត្បូង អាចធ្វើឲ្យប៉ះពាល់ការចាប់ផ្តើមបន្តផែនការចរចារបស់ពួកគេឡើងវិញ។
កាលពីព្រឹកថ្ងៃចន្ទ កូរ៉េខាងជើង បានព្រលយថា ខ្លួនអាចពិចារណាអំពីការពន្យារពេលរបស់ខ្លួនឡើងវិញអំពីការសាកល្បងនុយក្លេអ៊ែរ នៅខែក្រោយ ដែលបានធ្វើឡើងអស់ជាច្រើនឆ្នាំហើយនោះ ប៉ុន្តែអាមេរិកត្រូវបន្ធូរបន្ថយទណ្ឌកម្ម ដើម្បីកាត់បន្ថយភាពតានតឹងជាមួយទីក្រុងព្យុងយ៉ាង។
នេះ គឺជាសេចក្តីថ្លែងការណ៍ដំបូងរបស់កូរ៉េខាងជើងអំពីកិច្ចពិភាក្សាចាប់តាំងពីប្រធានាធិបតីអាមេរិកលោក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន បានឯកភាពគ្នាដើម្បីចាប់ផ្តើមបន្តការចរចានៅឯជំនួបមួយ ដែលឥតគ្រោងទុកជាមុននៅតំបន់គ្មានយោធាដែលបានខណ្ឌចែកកូរ៉េទាំង ២ កាលពីថ្ងៃទី ៣០ ខែមិថុនានោះ។
ដោយឆ្លើយតបទៅនឹងសេចក្តីថ្លែងការណ៍របស់កូរ៉េខាងជើង ក្រសួងការបរទេសអាមេរិកបានថ្លែងថា អាមេរិកនៅតែមានសុទិដ្ឋិនិយមជុំវិញការប្តេជ្ញាចិត្ត ដែលបានធ្វើឡើងដោយលោក គីម ជុងអ៊ុន និងលោក ដូណាល់ ត្រាំ នៅអំឡុងពេលជំនួបរបស់ពួកគេដែលមិនបានគ្រោងទុកកាលពីខែមិថុនា និងជំនួបកំពូលកាលពីខែកុម្ភៈ នៅវៀតណាម។
អ្នកនាំពាក្យក្រសួងការបរទេសអាមេរិកបានថ្លែងថា៖ «យើងនឹងសង្ឃឹមថា គ្មាននរណាម្នាក់ អាចរារាំងយើងបាននោះទេ»៕ AFP/SK