ក្រុងរីយ៉ាដៈ យោងតាមអត្ថបទដកស្រង់ចេញពីការសម្ភាសមួយ ដែលបានចេញផ្សាយកាលពីថ្ងៃអាទិត្យថា ព្រះមហាក្សត្រអារ៉ាប៊ី សាអ៊ូឌីត ព្រះអង្គម្ចាស់ Mohammed bin Salman បានចោទប្រកាន់គូសត្រូវបដិបក្ខអ៊ីរ៉ង់ពីបទវាយប្រហារទៅលើនាវាផ្ទុកប្រេងចំនួន ២ គ្រឿង នៅច្រកដឹកជញ្ជូនឈូងសមុទ្រប្រទេស អារ៉ាប់ ដ៏សំខាន់ ១ កន្លែង ដោយបន្ថែមថា៖ «ព្រះអង្គនឹងមិនស្ទាក់ស្ទើរ» ក្នុងការវាយប្រហារឆ្លើយតបទៅ នឹងការគំរាមកំហែងណាមួយទៅលើព្រះរាជាណាចក្រមួយនេះឡើយ។
ព្រះអង្គម្ចាស់ Mohammed bin Salman បានប្រាប់សារព័ត៌មាន pan-Arab daily Asharq al-Awsat ថា៖ «របបអ៊ីរ៉ង់ មិនបានគោរពវត្តមាន របស់នាយករដ្ឋមន្ត្រីជប៉ុននោះទេ ខណៈលោកជាភ្ញៀវម្នាក់នៅក្នុងក្រុងតេអេរ៉ង់ ហើយមិនបានឆ្លើយតបទៅនឹងកិច្ចខិតខំប្រឹងប្រែងរបស់លោកឡើយ ដោយធ្វើការវាយប្រហារទៅលើនាវាដឹកប្រេង ២ គ្រឿង ១ គ្រឿង ជានាវាដឹកប្រេងរបស់ជប៉ុន»។ ការនិយាយនេះសំដៅទៅលើការវាយប្រហារជាច្រើនលើកនៅឈូងសមុទ្រអូម៉ង់កាលពីថ្ងៃព្រហស្បតិ៍។
ព្រះអង្គម្ចាស់បានបន្ថែមថា៖ «យើងមិនចង់មានសង្គ្រាមនៅក្នុងតំបន់នោះទេ ប៉ុន្តែយើងនឹងមិនស្ទាក់ស្ទើរក្នុងការដោះស្រាយជាមួយការគំរាមកំហែងណាមួយមកលើប្រជាជន អធិបតេយ្យភាព បូរណភាពទឹកដី និងផលប្រយោជន៍របស់យើងជាដាច់ខាត»។
ការវាយប្រហារទៅលើនាវាដឹកប្រេង ២ គ្រឿងនោះ បានធ្វើឲ្យតម្លៃប្រេងឆៅឡើងថ្លៃខ្ពស់ នៅចំពេលមានភាពតានតឹងបានជាប់គាំងរវាងអ៊ីរ៉ង់ និងអាមេរិកនោះ។
នាវាជប៉ុនឈ្មោះ Kokuka Courageous កំពុងដឹកប្រេងឆៅឆ្លងកាត់ឈូងសមុទ្រអូម៉ង់ នៅពេលដែលនាវានោះត្រូវបានគេបំផ្ទុះ ដោយបង្កឲ្យឆាបឆេះឡើង ហើយនៅក្នុងពេលនោះក៏ត្រូវបានគេពន្លត់ភ្លាមៗដែរ។
នាវាផ្ទុកប្រេងមួយគ្រឿងទៀតរបស់ក្រុមហ៊ុន Frontline ដែលបានចុះបញ្ជីនៅក្រុងអូស្លូ ក៏ជាគោលដៅនៃការវាយប្រហារដែរ។
នាវាទាំង ២ នោះបានរងការវាយប្រហារ នៅពេលដែលលោកនាយករដ្ឋមន្ត្រីជប៉ុន ស៊ីនហ្សូ អាបេ កំពុងប្រជុំជាមួយក្រុមមេដឹកនាំអ៊ីរ៉ង់នៅក្រុងតេអេរ៉ង់នោះ។
លោកប្រធានាធិបតីអាមេរិក ដូណាល់ ត្រាំ បានថ្លែងថា ការវាយប្រហារជាច្រើនលើកនោះ បានបង្ហាញឲ្យឃើញថា៖ «អ៊ីរ៉ង់ពិតជានៅពីក្រោយការវាយប្រហារនាវាទាំងនោះយ៉ាងច្បាស់ក្រឡែត» ប៉ុន្តែក្រុងតេអេរ៉ង់បដិសេធ៕ AFP/SK