ក្រុងរីយ៉ាដៈ រដ្ឋមន្ត្រីការបរទេសអារ៉ាប៊ី សាអ៊ូឌីត កាលពីថ្ងៃអាទិត្យ បានច្រានចោលការទាមទារឲ្យធ្វើបត្យាប័នក្រុមជនសង្ស័យ ដែលជាប់ទាក់ទិនក្នុងអំពើឃាតកម្មលើអ្នកកាសែតឈ្មោះ Jamal Kha shoggi ដោយការទាមទារនោះ ត្រូវបានធ្វើឡើងដោយ លោកប្រធានាធិបតី រ៉េសិប តៃយីប អេរដូហ្គែន។
លោក Adel al-Jubeir បានថ្លែងប្រាប់សន្និសីទកាសែតមួយនៅក្រុងរីយ៉ាដ នៅចុងបញ្ចប់នៃជំនួបកំពូលមួយរបស់ក្រុមប្រទេសនៃក្រុមប្រឹក្សាសហប្រតិបត្តិការឈូងសមុទ្រថា៖ «យើងមិនធ្វើបត្យាប័នពលរដ្ឋរបស់យើងទេ»។
លោក អេរដូហ្គែន បានអំពាវនាវម្តងហើយម្តងទៀត ឲ្យអារ៉ាប៊ី សាអ៊ូឌីត ប្រគល់ក្រុមជនសង្ស័យ ដែលទាក់ទិនក្នុងការសម្លាប់អ្នកកាសែតប្រឆាំងរូបនោះ។
លោក Khashoggi ជាអ្នកសរសេរអត្ថបទនយោបាយឲ្យកាសែតវ៉ាស៊ីនតោនប៉ុស្តិ៍ ត្រូវបានគេសម្លាប់ក្នុងរយៈពេលដ៏ខ្លី ក្រោយពីដើរចូលទៅស្ថានកុងស៊ុល អារ៉ាប៊ី សាអ៊ូឌីត នៅក្រុងអ៊ីស្តង់ប៊ុលកាលពីថ្ងៃទី ២ ខែតុលា កន្លងទៅ។
តុលាការតួកគីមួយ កាលពីថ្ងៃពុធ បានចេញដីកាចាប់ខ្លួនអតីតប្រធានចារកម្មអារ៉ាប៊ី សាអ៊ូឌីត លោក Ahmad al-Assiri និងអតីតទីប្រឹក្សាតុលាការភូមិន្ទ លោក Saud al-Qahtani តាមការស្នើសុំរបស់អគ្គព្រះរាជអាជ្ញាក្រុងអ៊ីស្តង់ប៊ុល។
ជាញឹកញាប់ លោក Assiri គឺជាឥស្សរជនអង្គុយនៅក្បែរព្រះអង្គម្ចាស់ Mohammed bin Salman នៅក្នុងអំឡុងជំនួបសំខាន់ៗនៅពេលទស្សនកិច្ចនៅបរទេស៕