ក្រុងរីយ៉ាដៈ ប្រព័ន្ធផ្សព្វផ្សាយរបស់អារ៉ាប៊ីសាអ៊ូឌីត កាលពីថ្ងៃអង្គារ បាន ចោទប្រកាន់ក្រុមឧទ្ទាមយេម៉ែនពីបទយកក្រុងមិកកា ជាក្រុងដ៏ពិសិដ្ឋបំផុតរបស់សាសនាអ៊ិស្លាម ជាគោលដៅវាយប្រហារ ក្រោយពីក្រុងរីយ៉ាដ និងក្រុមសម្ព័ន្ធមិត្តរបស់ខ្លួន បានថ្លែងថា ពួកគេបានបាញ់ទម្លាក់មីស៊ីល ២ គ្រាប់ នៅលើទឹកដីរាជាណាចក្រមួយនេះ។
រដ្ឋាភិបាលនិរទេសខ្លួនយេម៉ែន ដែលមានមូលដ្ឋាននៅអារ៉ាប៊ីសាអ៊ូឌីត បានអះអាងជាថ្មី ប៉ុន្តែក្រុមឧទ្ទាមហ៊ូធី បានបដិសេធថា មិនបានធ្វើការវាយប្រហារទេ។
អ្នកនាំពាក្យក្រុមចម្រុះ លោកវរសេនីយ៍ឯក Turki al-Maliki បានថ្លែងថា មីស៊ីល ២ គ្រាប់ ត្រូវបានបាញ់ទម្លាក់នៅចន្លោះស្រុក Jeddah និង Taiz នៃខេត្តមិកកា កាលពីថ្ងៃចន្ទ ប៉ុន្តែមិនបាននិយាយលម្អិតទៅលើគោលដៅ ដែលគួរឲ្យសង្ស័យថាតើអ្នកណាបានបាញ់មីស៊ីលទាំងនោះ ឲ្យប្រាកដនៅឡើយទេ។
ទោះបីជាយ៉ាងណាក៏ដោយ ក៏ផ្កាយរណបរបស់បណ្តាញសារព័ត៌មាន Al-Arabiya និងកាសែត Asharq al-Awsat បាននិយាយថា មីស៊ីលទាំងនោះត្រូវបានបាញ់ដោយក្រុមឧទ្ទាមហ៊ូធីយេម៉ែនទៅលើខេត្តមិកកា។
សារព័ត៌មានទាំងនោះ បានឲ្យដឹងទៀតថា នេះគឺជាការវាយប្រហារមីស៊ីលលើកទី៣ ហើយ ដោយក្រុមឧទ្ទាមហ៊ូធីបានយកក្រុងពិសិដ្ឋនោះ ជាគោលដៅ ចាប់តាំងពីក្រុមចម្រុះដឹកនាំដោយអារ៉ាប៊ីសាអ៊ូឌីតបានធ្វើអន្តរាគមន៍នៅក្នុងសង្គ្រាម នៅប្រទេស យេម៉ែន កាលពីឆ្នាំ ២០១៥។
ក្រុមឧទ្ទាមហ៊ូធី បានបដិសេធមិនបានវាយប្រហារទាំងនោះទេ ដោយបន្ថែមថា ពួកគេនឹងអះអាងទទួលខុសត្រូវ ប្រសិនបើពួកគេពិតជាបាននៅពីក្រោយការវាយប្រហារមីស៊ីលមែននោះ៕ AFP/SK