ក្រុងអាប៊ូដាប៊ីៈ ប្រទេស អារ៉ាប់រួម (UAE) បានថ្លែងកាលពីថ្ងៃពុធថា ការចូលរួមពីអន្តរជាតិនៅក្នុងការស៊ើបអង្កេតទៅលើ «ការវាយប្រហារយ៉ាងអាថ៌កំបាំង» ទៅលើនាវាដឹកប្រេងជាច្រើនគ្រឿង នឹងឈានទៅរក «ការសន្និដ្ឋានដ៏ត្រឹមត្រូវ» និងបង្ហាញឲ្យឃើញពីលទ្ធផលវិជ្ជមាន។
នាវា ៤ គ្រឿង នៅក្នុងនោះ មាននាវាផ្ទុកប្រេង ២ គ្រឿង របស់អារ៉ាប៊ី សាអ៊ូឌីត ត្រូវរងការខូចខាតកាលពីថ្ងៃទី ១២ ខែ ឧសភា នៅក្នុងការវាយប្រហារដ៏អាថ៌កំបាំងនៅម្តុំឆ្នេរសមុទ្រក្រុង Fujairah នៅសមុទ្រអារ៉ាប៊ីសាអ៊ូឌីត។
ប្រទេស អារ៉ាប់រួម បានប្រកាសកាលពីសប្តាហ៍មុនថា អាមេរិក បារាំង និងន័រវែស នឹងចូលរួមនៅក្នុងការស៊ើបអង្កេតជាមួយអារ៉ាប៊ីសាអ៊ូឌីត។
ក្រសួងការបរទេសប្រទេស អារ៉ាប់រួម បានថ្លែងនៅក្នុងសេចក្តីការណ៍មួយ ដែលបានដកស្រង់ដោយទីភ្នាក់ងារសារព័ត៌មាន WAM បានឲ្យដឹងថា៖ «ការចូលរួមពីដៃគូអន្តរជាតិរបស់ពួកយើងនៅក្នុងការស៊ើបអង្កេត នឹងជួយឲ្យពួកយើងឈានទៅរកការសន្និដ្ឋានត្រឹមត្រូវ និងតម្លាភាព»។
ក្រសួងការបរទេសអារ៉ាប់រួមបានបន្ថែមថា៖ «ការបន្តចូលរួមស៊ើបអង្កេតនោះ បានឆ្លុះបញ្ចាំងឲ្យឃើញការប្តេជ្ញាចិត្តរបស់សហគមន៍អន្តរជាតិ ដើម្បីការពារសន្តិសុខនាវាចរណ៍ លំហូរពាណិជ្ជកម្មអន្តរជាតិ និងការផ្គត់ផ្គង់ថាមពលជាដើម»។
ក្រសួងការបរទេស ក៏បានបានឲ្យដឹងទៀតថា៖ «ដោយមានការចូលរួមពីដៃគូអន្តរជាតិរបស់ប្រទេស អារ៉ាប់ ការស៊ើបអង្កេតនឹងបន្តនៅក្នុងឥរិយាបថមួយប្រកបដោយភាពត្រឹមត្រូវ ហើយនឹងធ្វើសេចក្តីសន្និដ្ឋានបញ្ចប់នៅក្នុងការស៊ើបអង្កេត»។
កំពង់ផែ Fujairah គឺជាទីចំណតមួយនៅឆ្នេរសមុទ្រអារ៉ាប៊ីសាអ៊ូឌីត៕ AFP/SK