.jpg)
មេដឹកនាំជាន់ខ្ពស់អីុរ៉ង់លោក Aytollah Ali Khamenei គ្រវីដៃដាក់ហ្វូងមនុស្សអំឡុងជំនួបមួយនៅក្រុងតេអេរ៉ង់។ AFP
បុរីញូវយ៉កៈ កាលពីថ្ងៃចន្ទអីុរ៉ង់ បានស្នើអង្គការសហប្រជាជាតិឲ្យជំរុញអាមេរិកទទួលខុសត្រូវចំពោះការដាក់ទណ្ឌកម្មជាថ្មីទៅលើក្រុងតេអេរ៉ង់ដោយបានចាត់ទុកវិធានការទាំងនោះថា ខុសច្បាប់និងជាការរំលោភលើសេចក្តីសម្រេចរបស់ក្រុមប្រឹក្សាសន្តិសុខនេះ។
លោកឯកអគ្គរដ្ឋទូតអីុរ៉ង់ Gholamali Khoshroo បានថ្លែងនៅក្នុងលិខិតមួយផ្ញើជូនអគ្គលេខាធិការអង្គការសហប្រជាជាតិលោក Antonio Guterres ថា ឥរិយាបថមិនទទួលខុសត្រូវរបស់សហរដ្ឋអាមេរិក ផ្តល់ភាពចាំបាច់ដល់ការឆ្លើយតបរួមចំពោះការគោរពគោលការណ៍ច្បាប់។
លោក បានបន្ថែមថា បើយោងតាមរដ្ឋធម្មនុញ្ញរបស់ អង្គការសហប្រជាជាតិ និងច្បាប់អន្តរជាតិនោះ អង្គការសហប្រជាជាតិ និងប្រទេសសមាជិករបស់ខ្លួនគួរតែប្រឆាំងជំទាស់ទង្វើខុសឆ្គងទាំងអស់នោះនិងឲ្យអាមេរិកទទួលខុសត្រូវចំពោះទង្វើបែបនេះ។
រដ្ឋការរបស់លោកប្រធានាធិបតី ដូណាល់ ត្រាំ បានដាក់ទណ្ឌកម្មជាថ្មី ដែលត្រូវដាក់នៅក្រោមកិច្ចព្រមព្រៀងនុយក្លេអ៊ែរឆ្នាំ ២០១៥ ក្រោយពីដកខ្លួនចេញពីកិច្ចព្រមព្រៀងអន្តរជាតិ ដែលបានឈានដល់រវាងប្រទេស អីុរ៉ង់ អាមេរិក និងប្រទេសមហាអំណាច ៥ ទៀតមានដូចជា អង់គ្លេស បារាំង អាល្លឺម៉ង់ ចិន និងរុស្ស៊ី។
ទិដ្ឋភាពនៃចង្វាក់ផលិតកម្មយន្តហោះប្រយុទ្ធ (Kowsar) ដែលផលិតក្នុងស្រុក។ AFP
កិច្ចព្រមព្រៀងនុយក្លេអ៊ែរ នោះ ត្រូវបានអនុម័តជាឯកច្ឆន្ទដោយសេចក្តីសម្រេចរបស់ក្រុមប្រឹក្សាសន្តិសុខ ដែលមានន័យថា កិច្ចព្រមព្រៀងនោះ ត្រូវបានធ្វើឡើងត្រឹមត្រូវតាមច្បាប់។
ទោះបីជាយ៉ាងណាក៏ដោយក៏ក្រុមអ្នកការទូតនិយាយថាគ្មានគម្រោងលើកឡើងពីទណ្ឌកម្មរបស់អាមេរិកនៅក្នុងក្រុមប្រឹក្សាសន្តិសុខនេះ នៅពេលនេះទេ។
អ្នកនាំពាក្យអង្គការសហប្រជាជាតិលោក Stephane Dujarric បានបង្ហាញថាលោក Guterres មិនប្រញាប់ប្រញាល់ចាត់វិធានការណាមួយឡើយ។
លោកឯកអគ្គរដ្ឋទូតអីុរ៉ង់រូបនោះ បានថ្លែងថា អាមេរិក មិនត្រឹមតែផ្គើននឹងសេចក្តីសម្រេចលេខ ២២៣១ របស់ក្រុមប្រឹក្សានេះ ដែលបានអនុម័តកិច្ចព្រមព្រៀងនុយក្លេអ៊ែរនោះទេ ប៉ុន្តែថែមទាំងបានបង្ខំឲ្យប្រទេសដទៃទៀតរំលោភលើសេចក្តីសម្រេចនោះផងដែរ។
លោក Khoshroo បានបន្ថែមថា៖ «ទណ្ឌកម្មទាំងនោះ ខុសច្បាប់ និងប្រាសចាកនឹងគោលការណ៍នៃការមិនជ្រៀតជ្រែកកិច្ចការផ្ទៃក្នុង និងសេរីភាពពាណិជ្ជកម្មអន្តរជាតិ»។
នៅក្នុងអំឡុងជំនួបប្រចាំឆ្នាំនៃក្រុមមេដឹកនាំពិភពលោកនៅអង្គការសហប្រជាជាតិកាលពីខែកញ្ញា លោក ដូណាល់ ត្រាំ បានធ្វើជាប្រធានជំនួបក្រុមប្រឹក្សាមួយ ដែលបានផ្តោតយ៉ាងសំខាន់ទៅលើអីុរ៉ង់ ដោយនាំឲ្យមានជម្លោះរវាងអាមេរិក និងមហាអំណាចដទៃទៀត ស្តីពីកិច្ចព្រមព្រៀងនុយក្លេអ៊ែរនេះ៕
