.jpg)
ប្រព័ន្ធការពារមីស៊ីល S-400 របស់រុស្ស៊ី ត្រូវបានដាក់បង្ហាញនៅកន្លែងតាំងពិព័រណ៍នៅសួនឧទ្យាន Kubinka Patriot។ AFP
ក្រុងអង់ការ៉ាៈ លោកប្រធានាធិបតីតួកគី រ៉េសិប តៃយីប-អែរដូហ្គែន ត្រូវបានគេដកស្រង់សម្តីដោយនិយាយនៅក្នុងប្រព័ន្ធផ្សព្វផ្សាយតួកគីកាលពីថ្ងៃអាទិត្យថា ប្រព័ន្ធការពារមីស៊ីល S-400 ពីរុស្ស៊ីដ៏ចម្រូងចម្រាស នឹងត្រូវដឹកជញ្ជូនដល់ប្រទេសរបស់លោកនៅក្នុងខែកក្កដា។
យោងតាមប្រព័ន្ធផ្សព្វផ្សាយ CNN Turk បានឲ្យដឹងថាលោកប្រធានាធិបតីតួកគី បានថ្លែងថា៖ «ខ្ញុំជឿជាក់ថា ប្រព័ន្ធការពារ (S-400) នឹងចាប់ផ្តើមមកដល់លើកទី១ នៅពាក់កណ្តាលខែកក្កដាខាងមុខនេះ។ ក្រុមសហសេវិកទទួលបន្ទុកផ្នែកកម្មវិធីដឹកជញ្ជូន កំពុងអនុវត្តការងារដឹកជញ្ជូន»។
កិច្ចព្រមព្រៀងរបស់ក្រុងអង់ការ៉ាជាមួយក្រុងម៉ូស្គូ បានបង្កឲ្យក្លាយទៅជាប្រភពនៃភាពតានតឹងយ៉ាងខ្លាំងរវាងតួកគី និងអាមេរិក ដោយក្រុងវ៉ាស៊ីនតោន បានគំរាមកំហែងអំពីផលវិបាកនានា នៅក្នុងនោះ មានទាំងការដាក់ទណ្ឌកម្មប្រឆាំងសមាជិកអង្គការណាតូ របស់ខ្លួនផងដែរ។
លោក វ៉្លាឌីមៀរ ពូទីន (ស្តាំ) និងលោក រ៉េសិបតៃយីប អេរដូហ្គែន មកដល់ដើម្បីចូលរួមជំនួបនៅវិមានក្រឹមឡាំង។ AFP
រដ្ឋមន្ត្រីការពារជាតិអាមេរិកស្តីទីលោក Patrick Shanahan កាលពីដើមខែនេះ បានផ្ញើលិខិត ១ ច្បាប់ ដោយព្រមានតួកគីថា អាមេរិក ត្រូវតែប្រឆាំងដាច់ខាត ចំពោះប្រព័ន្ធមីស៊ីល S-400 នៅត្រឹមថ្ងៃទី ៣១ ខែ កក្កដា ឬក្រុមពីឡុតរបស់តួកគី ដែលកំពុងបណ្តុះបណ្តាលអំពីកម្មវិធីយន្តហោះចម្បាំង F-35 កាលពីពេលថ្មីៗនេះ នឹងត្រូវបណ្តេញចេញពីសហរដ្ឋអាមេរិក។
ប្រទេស តួកគី មានផែនការទិញយន្តហោះចម្បាំង US- F-35 ១០០ គ្រឿង ចំណែកឯរោងចក្រតួកគីមួយចំនួនកំពុងផលិតគ្រឿងបន្លាស់ និងសម្ភារសម្រាប់បំពាក់លើយន្តហោះចម្បាំង។
ក្រុងអង់ការ៉ា នៅមិនទាន់បានឆ្លើយតបជាផ្លូវការទៅនឹងលិខិតរបស់លោក Patrick Shanahan នៅឡើយទេ ប៉ុន្តែលោក អេរដូហ្គែន បានថ្លែងថា៖ «នៅក្នុងរយៈពេលដ៏ខ្លីនេះ ជួនកាលប្រហែលនៅសប្តាហ៍នេះ លិខិតឆ្លើយតបមួយច្បាប់នឹងត្រូវផ្ញើជូនលោក Patrick Shanahan វិញ»។
លោក វ៉្លាឌីមៀរ ពូទីន (ស្តាំ) និងលោក រ៉េសិបតៃយីប អេរដូហ្គែន ធ្វើសន្និសីទសារព័ត៌មានរួមនៅវិមានក្រឹមឡាំង។ AFP
លោក អេរដូហ្គែន បានចុះកិច្ចព្រមព្រៀងជាមួយក្រុងម៉ូស្គូ ហើយមិនមែនមានតែមួយនោះទេ ដែលតួកគី នឹងដកខ្លួនចេញពីកិច្ចព្រមព្រៀងនោះ។
លោកបានថ្លែងថា៖ «បញ្ហាប្រព័ន្ធការពារមីស៊ីល S-400 ត្រូវបានអនុវត្តទាំងស្រុង។ វាមិនមានបញ្ហាលំបាកនោះទេ» ដោយលោកបានថ្លែងទៅកាន់ក្រុមអ្នកកាសែតតួកគីនៅលើយន្តហោះរបស់លោកទៅកាន់ប្រទេស តួកគី ក្រោយពីធ្វើដំណើរទស្សនកិច្ចទៅកាន់ប្រទេស តាហ្ស៊ីគីស្ថាន ដើម្បីកិច្ចប្រជុំមួយ។
លោកអេរដូហ្គែន បានបន្ថែមថា៖ «បច្ចុប្បន្ន ប្រសិនបើយើងមិនគោរពពាក្យសន្យារបស់យើងទេនោះ បញ្ហានេះនឹងមិនអាចស្របតាមលក្ខណៈរបស់ រដ្ឋយើងឡើយ ហើយវានឹងមិនស័ក្ដិសមទៅនឹងឋានៈជារដ្ឋបុរសនោះដែរ»។
លោកក៏បានរំពឹងទុកថា ការដឹកជញ្ជូនប្រព័ន្ធការពារមីស៊ីល S-400 លើកដំបូងពីរុស្ស៊ី អាចនឹងចាប់ផ្តើមធ្វើឡើងនៅដើមខែកក្កដា ប៉ុន្តែរុស្ស៊ី បានថ្លែងកាលពីដើមខែមិថុនានេះ ថា នឹងចាប់ផ្តើមដឹកជញ្ជូនប្រព័ន្ធមីស៊ីលនេះ មានរយៈពេល ២ ខែ៕ AFP/SK
