ក្រុងរ៉ូម៖ យោងតាមតួលេខថ្មីចេញពីនាយកដ្ឋានការពារជនស៊ីវិលដែលគ្រប់គ្រងស្ថានភាពគ្រាអាសន្នជំងឺកូវីដ ១៩ បានឲ្យដឹងថា ប្រទេស អ៊ីតាលី កាលពីថ្ងៃអង្គារមានអ្នកឆ្លងវីរុសផ្លូវដង្ហើមកូរ៉ូណាចំនួន ១៣៥ ៥៨៦ នាក់ ក្នុងនោះមានអ្នកស្លាប់ ១៧ ១២៧ នាក់។
ក្នុងចំណោមចំនួននេះ ករណីឆ្លងយ៉ាងសកម្មថ្មីកាលពីថ្ងៃចន្ទ គឺមានចំនួន ៨៨០ នាក់ ដែលបាននាំឲ្យចំនួនអ្នកឆ្លងសរុបឡើងដល់ ៩ ៤ ០៦៧ នាក់នៅទូទាំងប្រទេស ហើយអ្នកជាសះស្បើយបានកើនឡើង ដោយទាក់ទងទៅនឹងមនុស្សចំនួន ១ ៥៥៥ នាក់បន្ថែមទៀត បានជាសះស្បើយ បើប្រៀបធៀបកាលពីមួយថ្ងៃមុន ដែលបានកើនដល់ ២៤ ៣៩២ នាក់ ជាចំនួនសរុបទាំងអស់។
ចំនួនអ្នកជាសះស្បើយថ្មីយ៉ាងច្រើន ដែលលើសពីចំនួនឆ្លងយ៉ាងសកម្មថ្មីប្រចាំថ្ងៃ។
ប្រធាននាយកដ្ឋានការពារជនស៊ីវិលលោក អេនហ្គីឡូ ប៊ូរីលលី បានបញ្ជាក់នៅឯសន្និសីទសារព័ត៌មានមួយថា៖ «ការកើនឡើងនៅក្នុងការឆ្លងថ្មី ត្រូវបានកំពុងអះអាងនៅក្នុងប្រទេស អ៊ីតាលី ហើយចំនួន ៨៨០ នាក់ គឺកើនឡើងទាបបំផុតជារៀងរាល់ថ្ងៃ ដែលយើងបានមើលឃើញចាប់តាំងពីថ្ងៃទី ១០ ខែមីនា»។
លោក អេនហ្គីឡូ ប៊ូររីលលី ដែលបានចូលបម្រើការងារជាប្រធានវិសាមញ្ញនៅក្នុងស្ថានភាពគ្រាអាសន្នជំងឺកូវីដ ១៩ បានពន្យល់អំពីចំនួនជាសះស្បើយជារៀងរាល់ថ្ងៃបានកត់ត្រាកាលពីថ្ងៃអង្គារថា នេះគឺជា «ចំនួនខ្ពស់បំផុតទី២ នៅក្នុងរយៈពេលចុងក្រោយ ចាប់តាំងពីការឆ្លងរីករាលដាលបានចាប់ផ្តើមផ្ទុះឡើង»។
មានចំនួនអ្នកឆ្លងបានកើនឡើង ៣ ០៣៩ ករណី នៅក្នុងរយៈពេល ២៤ ម៉ោងចុងក្រោយ ដោយបាននាំឲ្យចំនួនអ្នកឆ្លងសរុបទាំងអស់ កើនឡើងរហូត ដល់ ១៣៥ ៥៨៦ នាក់។
រហូតមកទល់ពេលនេះ ក្រុមអ្នកដែលបានធ្វើតេស្តរកឃើញមានផ្ទុកវីរុសផ្លូវដង្ហើមកូរ៉ូណាចំនួន ២៨ ៧១៨ នាក់ ត្រូវបានគេបញ្ជូនទៅកាន់មន្ទីរពេទ្យធម្មតា ចំណែក ៣ ៧៩២ នាក់ ស្ថិតនៅក្នុងអង្គភាពថែទាំសុខភាពយ៉ាងយកចិត្តទុកដាក់បំផុត និង ៦១ ៥៥៧ នាក់ផ្សេងទៀត ត្រូវបានទុកឲ្យស្នាក់ក្នុងផ្ទះដាច់ដោយឡែក។
លោក ប៊ូរីលលី បានបញ្ជាក់ថា សម្ពាធទៅលើមន្ទីរពេទ្យនានានៅប្រទេស អ៊ីតាលី បានថយចុះ ហើយជាពិសេសសម្រាប់អង្គភាពដែលថែទាំសុខភាពយ៉ាងយកចិត្តទុកដាក់បំផុត ជាទីដែលមានអ្នកជំងឺតិច គឺ ១០៦ នាក់ប៉ុណ្ណោះ បើប្រៀបធៀបនឹងថ្ងៃមុននេះ។
ចំនួនស្លាប់បានកើនឡើងត្រឹម ៦០៤ នាក់កាលពី ២៤ ម៉ោងចុងក្រោយ។ ចំនួនស្លាប់ថ្មីត្រូវបានកត់ត្រាគឺ ៦៣៦ នាក់ កាលពីថ្ងៃចន្ទ និង ៥២៥ នាក់កាលពីថ្ងៃអាទិត្យ។
លោក ហ្គីអូវ៉ាន់នី រ៉េសហ្សា ប្រធាននាយកដ្ឋានគ្រប់គ្រងជំងឺឆ្លងនៅវិទ្យាស្ថានសុខភាពជាតិបានថ្លែងថា៖ «នៅទីបញ្ចប់ វាហាក់ដូចជា យើងចាប់ផ្តើមមើលឃើញករណីឆ្លងថ្មីធ្លាក់ចុះ»៕ Xinhua/SK