ក្រុងអង់ការ៉ា: អ៊ីរ៉ង់ រុស្ស៊ី និងតួកគី បានរួមគ្នាដើម្បីបង្កើតក្រុមយោធាត្រីភាគីមានគោលបំណងគ្រប់គ្រង និងការពារដែនដីនានានៅក្នុងទឹកដីស៊ីរី ដោយបានឆ្លៀតកេងចំណេញពីភាពស្ទាក់ស្ទើររបស់លោកខាងលិច ដើម្បីចូលធ្វើអន្តរាគមន៍ខាងផ្នែកយោធានៅក្នុងទឹកដីស៊ីរី។
ប្រធានាធិបតីប្រទេសទាំង ៣ ដែលត្រូវបានគេមើលឃើញ ជាយូរអង្វែងមកថាជាគូបដិបក្ខក្នុងតំបន់ ជាជាងជាសម្ព័ន្ធយុទ្ធសាស្ត្រនោះបានជួបប្រជុំនៅថ្ងៃពុធនៅក្នុងទីក្រុងអង់ការ៉ាសម្រាប់កិច្ចជំនួបកំពូល
ត្រីភាគីលើកទី ២ ស្តីពីបញ្ហានៅស៊ីរី ជាការបញ្ជាក់អំពីស្មារតីបង្រួបបង្រួមគ្នាដ៏គួរឲ្យភ្ញាក់ផ្អើលមួយ។
កិច្ចប្រជុំនេះធ្វើឡើងបន្ទាប់ពីជំនួបកំពូលលើកទីមួយរវាងប្រធានាធិបតីតួកគី លោក រ៉េសិប តៃយីប អេរដូហ្គែន ប្រធានាធិបតីរុស្ស៊ី លោក វ្ល៉ាឌីមៀរ ពូទីន និងប្រធានាធិបតី អ៊ីរ៉ង់ លោក ហាស់សាន រ៉ូហានី នៅក្នុងទីក្រុង សូជី កាលពីខែវិច្ឆិកា ឆ្នាំទៅ ធ្វើឡើងដោយមានការស្នើពីតួកគី ដែលស្វែងរកសំឡេងគាំទ្រ បន្ទាប់ពីបានធ្វើប្រតិបត្តិការវាយប្រហារលើក្រុមឧទ្ទាមឃើដ នៅខាងក្នុងទឹកដីស៊ីរី។
ប្រធានាធិបតីអាមេរិក លោកដូណាល់ ត្រាំ បានឲ្យដឹងថា ក្រុងវ៉ាស៊ីនតោន នឹងត្រូវដកកងទ័ពរបស់ខ្លួនពីទឹកដីស៊ីរីនៅក្នុងពេលឆាប់ៗ ជាទង្វើមួយដែលនឹងជួយរឹតបន្តឹងឲ្យកាន់តែខ្លាំងនូវឥទ្ធិពលរបស់ក្រុងអង់ការ៉ា ក្រុងម៉ូស្គូ និងក្រុង តេអេរ៉ង់ ដែលប្រទេសទាំងអស់នេះបានប្តេជ្ញាបញ្ជូនកងកម្លាំងយោធារបស់ខ្លួនទៅកាន់ទីសមរភូមិនោះ។
លោក Sinan Ulgen ប្រធានមជ្ឈមណ្ឌលសេដ្ឋកិច្ចនិងសិក្សាគោលនយោបាយការបរទេស (CEFPS) មានមូលដ្ឋាននៅក្នុងទីក្រុងអ៊ីស្តង់ប៊ុលបានឲ្យដឹងថា ប្រទេសទាំង ៣ ពេលនេះ បានក្លាយជាម្ចាស់ពិតប្រាកដនៅក្នុងសមរភូមិក្នុងទឹកដីស៊ីរី។
លោក Ulgen បានថ្លែងប្រាប់ AFP ថា ប្រទេសទាំង ៣ បានក្លាយជាមហាអំណាចនៅក្នុងតំបន់ និងមានឆន្ទៈក្នុងការធ្វើវិនិយោគផ្នែកប្រភពធនធានយោធា ដើម្បីបង្កឥទ្ធិពលលើលទ្ធផលនៃសង្គ្រាមនេះ»។
ប្រទេសទាំង ៣ កាលពីឆ្នាំទៅបានបើកដំណើរស្វែងរកសន្តិភាពស្រដៀងគ្នាទៅនឹងកិច្ចចរចាផ្តួចផ្តើមដោយអង្គការសហប្រជាជាតិប្រារព្ធធ្វើក្នុងក្រុងហ្សឺណែវ៕