.jpg)
ម៉ូហាម៉ាដ ចាវ៉ាដហ្សារីហ្វ ថ្លែងក្នុងសន្និសីទសារព័ត៌មាននៅក្រុងតេអេរ៉ង់។ AFP
ក្រុងតេអេរ៉ង់៖ ប្រទេស អ៊ីរ៉ង់ កាលពីថ្ងៃចន្ទ បានប្រកាសបដិសេធថា វិធានការណាមួយរបស់ប្រទេស តួកគីដើម្បីបង្កើតមូលដ្ឋានយោធាជាច្រើនកន្លែងនៅក្នុងទឹកដីស៊ីរី «មិនអាចទទួលយកបានជាដាច់ខាត» ដោយនិយាយថា ដំណាក់កាលមួយបែបនេះ នឹងប្រឈមមុខទៅនឹងការប្រឆាំងពីសាធារណរដ្ឋអ៊ិស្លាម និងប្រទេសផ្សេងទៀត។
ប្រធានាធិបតីតួកគីលោក រ៉េសិប តៃយីប អេរដូហ្គែន បានថ្លែងកាលពីថ្ងៃសុក្រថា ប្រទេស តួកគី នឹងបង្កើតប៉ុស្តិ៍ត្រួតពិនិត្យ ១២ កន្លែង នៅក្នុងទឹកដីប្រទេស ស៊ីរី ខណៈលោកបានព្រមានថា ក្រុងអង់ការ៉ានឹងចាប់ផ្តើមធ្វើប្រតិបត្តិការឡើងវិញ ប្រឆាំងកងកម្លាំងឃើដនៅតាមព្រំដែននោះ។
អ្នកនាំពាក្យក្រសួងការបរទេសអ៊ីរ៉ង់លោក អាប់បាស់-ម៉ូសាវី បានរិះគន់វិធានការផែនការនៅក្នុងការឆ្លើយតបទៅនឹងសំណួរមួយនៅឯសន្និសីទសារព័ត៌មានមួយនោះ។
លោក ម៉ូសាវី បានថ្លែងនៅក្នុងសុន្ទរកថា ដែលបានចាក់ផ្សាយនៅក្នុងទូរទស្សន៍រដ្ឋថា៖ «ប្រទេស តួកគី អាចមានមូលដ្ឋានណាមួយ ហើយអាចធ្វើរឿងអ្វីមួយនៅលើទឹកដីខ្លួនឯង និងនៅក្នុងទឹកដីព្រំដែនរបស់ពួកគេ ប៉ុន្តែប្រសិនបើអ្នកចង់មានន័យថា ដោយចង់បង្កើតមូលដ្ឋានយោធាតួកគីនៅក្នុងទឹកដីស៊ីរីនោះ នេះជារឿងមួយដែលមិនអាចទទួលយកបានជាដាច់ខាត»។
លោកបានថ្លែងថា ដំណាក់កាលមួយបែបនេះ នឹងត្រូវបានមើលឃើញដោយអ៊ីរ៉ង់ថា ជា«ការឈ្លានពានប្រឆាំងអធិបតេយ្យ បូរណភាពទឹកដីស៊ីរីជាប្រទេសឯករាជ្យ៕ AFP/SK
