.jpg)
រថយន្តជាច្រើនគ្រឿងឆេះនៅតាមព្រំដែនលីបង់និងអុីស្រាអែល។ AFP
ក្រុងគីរីយ៉ាតហ្សាម៉ូណា៖ អ៊ីស្រាអែល និងក្រុមហេបូឡាហ៍ បានបាញ់ដាក់គ្នាទៅវិញទៅមកនៅតាមបណ្តោយព្រំដែន ប្រទេស លីបង់ កាលពីថ្ងៃអាទិត្យ ក្រោយពីមានភាពតានតឹងកើនឡើងរយៈពេល ១ សប្តាហ៍ ដោយបង្កឲ្យមានការភ័យខ្លាចកាន់តែខ្លាំងឡើង និងមានការព្រួយបារម្ភពីក្រុមប្រទេសមហាអំណាចពិភពលោកផងដែរ។
អ៊ីស្រាអែលបានថ្លែងថា ខ្លួនបានឆ្លើយតបវិញជាមួយនឹងការបាញ់ផ្លោងកាំភ្លើងធំប្រហែល ១០០ គ្រាប់ ក្រោយពីក្រុមហេបូឡាហ៍ បានបាញ់មីស៊ីលប្រឆាំងរថក្រោះ ២-៣ គ្រាប់ ទៅលើទីបញ្ជាការកងវរសេនាតូច និងឃ្លាំងទុករថយន្តសង្គ្រោះបន្ទាន់របស់យោធាមួយកន្លែង ដោយបានបណ្តាលឲ្យទីបញ្ជាការទាំង ២ កន្លែង រងការវាយប្រហារដោយមីស៊ីលរបស់ក្រុមហេបូឡាហ៍នោះ ។
ក្រុមមន្ត្រីអ៊ីស្រាអែល បានឆ្លើយបដិសេធចំពោះការអះអាងរបស់ចលនាគាំទ្រដោយអ៊ីរ៉ង់ថា ខ្លួនបានសម្លាប់ និងធ្វើឲ្យទាហានជិះក្នុងរថយន្តយោធារងរបួស ដោយបានថ្លែងថា គ្មានអ្នកស្លាប់ និងរងរបួសទេ។
នាយករដ្ឋមន្ត្រីអ៊ីស្រាអែលលោក បេនចាមីន នេតានីយ៉ាហ៊ូ បានថ្លែងថា៖ «យើងកំពុងពិភាក្សាគ្នាអំពីជំហានបន្ទាប់ទៀត»។
«ខ្ញុំបានបញ្ជាថា យើងត្រូវរៀបចំដើម្បីឆ្លើយតបចំពោះការវាយប្រហារណាមួយមកលើពួកយើង»។
UN អំពាវនាវឲ្យអត់ធ្មត់ហើយបារាំងថ្លែងថា ខ្លួនបាន «ទាក់ទងពួកគេជាច្រើនលើក» ដើម្បីបញ្ចៀសជម្លោះ៕ AFP
