ក្រុងហ្ស៊េរុយសាឡិមៈ កងទ័ពអ៊ីស្រាអែល បានឲ្យដឹងកាលពីថ្ងៃអង្គារថា ខ្លួនបានរកឃើញបណ្តាញផ្លូវរូងក្រោមដីរបស់ក្រុមឧទ្ទាមហេសបូឡាហ៍ (Hezbollah) ដែលលួចចូលដែនដីរបស់ខ្លួនពីលីបង់ ហើយបានបើកប្រតិបត្តិការមួយ ដើម្បីកម្ទេចផ្លូវរូងក្រោមដីទាំងនោះ ជាវិធានការមួយ ទំនងជាបង្កឲ្យមានភាពតានតឹងកាន់តែខ្លាំងឡើងជាមួយនឹងក្រុមគាំទ្រដោយអ៊ីរ៉ង់។
សេចក្តីប្រកាសគួរឲ្យភ្ញាក់ផ្អើលនោះ បានកើតឡើងប៉ុន្មានម៉ោង ក្រោយពីនាយករដ្ឋមន្ត្រីអ៊ីស្រាអែល លោក បេនចាមីន នេតានីយ៉ាហ៊ូ បានជួបជាមួយរដ្ឋមន្ត្រីការបរទេស លោក ម៉ៃក៍ ប៉ុមប៉េអូ នៅក្រុងប្រ៊ុចសែល អំពីគ្រោះថ្នាក់នានានៅក្នុងតំបន់ ដែលភាគីទាំង ២ បានកំពុងតែព្រមានគ្នាម្តងហើយម្តងទៀតអំពីរាល់សកម្មភាពរបស់អ៊ីរ៉ង់ ដែលជាសត្រូវដ៏ធំរបស់អ៊ីស្រាអែលនោះ។
លោកនេតានីយ៉ាហ៊ូ បានថ្លែងថា លោកបានពិភាក្សាអំពីប្រតិបត្តិការជាមួយ លោកប៉ុម ប៉េអូ ហើយបានហៅការជីករូងក្រោមដីនោះថាជាការរំលោភ បំពានសេចក្តីសម្រេចរបស់អង្គការសហប្រជាជាតិដែលបានឲ្យបញ្ចប់សង្គ្រាមនៅឆ្នាំ ២០០៦ រវាងអ៊ីស្រាអែល និងក្រុមហេសបូឡាហ៍។
ក្រោយមក នៅក្នុងសុន្ទរកថាដែលត្រូវបានចាក់ផ្សាយតាម ទូរទស្សន៍នោះ មេដឹកនាំអ៊ីស្រាអែល បានប្រកាសអ្វីដែលលោកបានហៅថា អ៊ីរ៉ង់ ចូលរួមក្នុងការកសាងសង់ផ្លូវរូងក្រោមដីនោះ។
លោកបានថ្លែងថា៖ «យើងកំពុងតែចាត់វិធានការ ដោយបេ្តជ្ញាទប់ស្កាត់អ៊ីរ៉ង់មិនឲ្យចាក់ឫសនៅក្នុងប្រទេសស៊ីរី យើងកំពុងតែចាត់វិធានការប្រឆាំងសកម្មភាពភេរវកររបស់អ៊ីរ៉ង់នៅប្រទេសលីបង់»។
លោកនេតានីយ៉ាហ៊ូ បានថ្លែងថា លោកនឹងពិភាក្សាបញ្ហានោះជាមួយមេដឹកនាំពិភពលោកនៅប៉ុន្មានថ្ងៃខាងមុខនេះ ហើយនិយាយថាលោកកំពុងស្វែងរកជំនួបបន្ទាន់មួយរបស់ក្រុមប្រឹក្សាសន្តិសុខអ.ស.ប.៕