.jpg)
កងកម្លាំងរបបស៊ីរីប្រមូលផ្តុំនៅទីវាលមួយក្នុងតំបន់ជនបទនៃខេត្តហាម៉ា។ រូប AFP
ក្រុងដាម៉ាសៈ ប្រព័ន្ធផ្សព្វផ្សាយរដ្ឋបានរាយការណ៍ថា អ៊ីស្រាអែលបានបើកការវាយប្រហារនៅជុំទី២ ប្រឆាំងស៊ីរីនៅក្នុងរយៈពេល ២៤ ម៉ោង កាលពីថ្ងៃអាទិត្យ ខណៈដែលប្រធានាធិបតីអាមេរិក លោក ដូណាល់ ត្រាំ បានអំពាវនាវឲ្យរុស្ស៊ី និងអ៊ីរ៉ង់ «បញ្ឈប់ការវាយប្រហារដ៏អាក្រក់» នៅក្នុងប្រទេសហែកហួរដោយសង្គ្រាមមួយនេះ។
តាមសេចក្តីរាយការណ៍ ប្រទេស ស៊ីរី បានចោទប្រកាន់អ៊ីស្រាអែលពីបទយកទីតាំងមូលដ្ឋានទ័ពអាកាសមួយនៅក្នុងខេត្តហូមជាគោលដៅវាយប្រហារ ដែលបណ្តាលឲ្យមនុស្ស ៥ នាក់ ស្លាប់ទើបតែបានប៉ុន្មានម៉ោង ក្រោយពីធ្វើការវាយបកទៅលើបន្ទាយយោធា និងចារកម្មនៅក្រុងដាម៉ាសភាគខាងត្បូង ដោយបានបង្កឲ្យមនុស្ស ១០ នាក់ស្លាប់។
ប្រភពយោធាមួយបានប្រាប់ទីភ្នាក់ងារសារព័ត៌មាន SANA របស់រដ្ឋកាលពីល្ងាចថ្ងៃអាទិត្យថា៖ «ទ័ពការពារអាកាសរបស់យើង បានរារាំងមិនឲ្យអ៊ីស្រាអែលឈ្លានពាន ហើយបានបំផ្លាញរ៉ុក្កែត ២ គ្រាប់ ដែលបានយកមូលដ្ឋានទ័ពអាកាស T-4 ជាគោលដៅវាយប្រហារ»។
ប្រភពនោះបានបន្ថែមថា គ្រាប់រ៉ុក្កែតផ្សេងទៀត «បានបណ្តាលឲ្យទាហានម្នាក់ស្លាប់ និង ២ នាក់ ផ្សេងទៀតរងរបួស ហើយឃ្លាំងផ្ទុកអាវុធបានរងការខូចខាតទាំងស្រុង» ។
ក្រុមឃ្លាំមើលសិទ្ធិមនុស្សស៊ីរីមានមូលដ្ឋាននៅអង់គ្លេសបានរាយការណ៍ថា មនុស្ស ៥ នាក់ បានស្លាប់ នៅក្នុងនោះ មានទាហានស៊ីរីម្នាក់ដោយបានបន្ថែមថា ឃ្លាំងផ្ទុកអាវុធត្រូវបានបំផ្លាញទាំងស្រុង ដោយគ្រាប់រ៉ុក្កែតរបស់អ៊ីស្រាអែល។
ក្រុមឃ្លាំមើលសិទ្ធិមនុស្សនោះបាននិយាយថា មានកងកម្លាំងរបស់របបស៊ីរី យុទ្ធជនអ៊ីរ៉ង់ និងក្រុមកងកម្លាំងក្រុមឧទ្ទាមហេបូឡាហ៍ ក៏បានឈរជើងនៅមូលដ្ឋានទ័ពអាកាសនោះផងដែរ៕ AFP/SK
