ក្រុងហៃហ្វា: អ្នករាយការណ៍ AFP ម្នាក់បានឲ្យដឹងថា ក្រុមអ៊ីស្រាអែលអារ៉ាប់រាប់រយនាក់ បាននាំគ្នាធ្វើបាតុកម្មកាលពីល្ងាចថ្ងៃសៅរ៍នៅក្នុងក្រុងហៃហ្វា ដោយរួមសាមគ្គីជាមួយតំបន់ហ្គាហ្សា ជាទីដែលក្រុមជនប៉ាឡេស្ទីនជាង ៦០ នាក់ បានស្លាប់ពីការបាញ់ប្រហារដោយអ៊ីស្រាអែលអំឡុងរយៈពេលប៉ុន្មានថ្ងៃថ្មីៗនេះ។
ក្រុមអ្នកប្រឆាំងតវ៉ា បាននាំគ្នាស្រែកថា «ឈប់ធ្វើការត្រួតត្រា បញ្ឈប់លទ្ធិហ្វាស៊ីសនិយម» និងបានថ្កោលទោសចំពោះការចាប់ខ្លួនក្រុមមនុស្ស ១៩ នាក់កាលពីថ្ងៃសុក្រនៅក្នុងក្រុងភាគខាងជើង អំឡុងការជួបជុំលើកមុនៗ ធ្វើឡើង ដោយការសាមគ្គីជាមួយក្រុមពលរដ្ឋក្នុងតំបន់ហ្គាហ្សា។
ពួកគេ បានគ្រវីអក្សរធំៗ ៤ តួ ពណ៌ក្រហមស្រាល ដែលបង្កើតបានជាពាក្យថា «Gaza» និងបានស្រែកពាក្យស្លោកជាច្រើនរួមទាំង «ក្រុមជ្វីហ្វនិងក្រុមអារ៉ាប់ ពួកយើងមិនមែនជាសត្រូវនឹងគ្នាទេ»។
ក្រុមជនប៉ាឡេស្ទីនសរុប ៦២ នាក់ត្រូវបានសម្លាប់ ដោយការបាញ់ប្រហារដោយកងកម្លាំងក្រុមអ៊ីស្រាអែល កាលពីថ្ងៃចន្ទ ខណៈក្រុមពលរដ្ឋប៉ាឡេស្ទីនរាប់ពាន់នាក់ បាននាំគ្នាធ្វើការប្រឆាំងតវ៉ា ខណៈក្រុមមន្ត្រីអាមេរិក បានផ្លាស់ប្តូរទីតាំងស្ថានទូតរបស់ខ្លួនពីក្រុងតែល អាវីវ ទៅកាន់ទីក្រុងហ្ស៊េរុយសាឡិម បន្ទាប់ពីបានទទួលស្គាល់ក្រុងនេះ ប្រកបដោយភាពចម្រូងចម្រាស ជារដ្ឋធានីរបស់អ៊ីស្រាអែលរួចមកនោះ។
យោងតាមក្រុមអាជ្ញាធរនៅក្នុងតំបន់ហ្គាហ្សា ដែលគ្រប់គ្រងដោយចលនាអ៊ិស្លាមនិយម ហាម៉ាស បានឲ្យដឹងថា ពួកគេ ស្ថិតនៅក្នុងចំណោមក្រុមជនប៉ាឡេស្ទីន ១១៩ នាក់ ដែលត្រូវបានក្រុមទាហានអ៊ីស្រាអែលសម្លាប់ នៅតាមបណ្តោយព្រំដែនចន្លោះតំបន់ហ្គាហ្សា និងរដ្ឋជ្វីហ្វ ចាប់តាំងពីបាតុកម្មដ៏ធំមួយ បានផ្ទុះឡើងនៅថ្ងៃទី ៣០ ខែមីនា។
យោធាអ៊ីស្រាអែល បានទទូចឡើងថា សកម្មភាពរបស់ខ្លួនមានភាពចាំបាច់ក្នុងការការពារព្រំដែន និងទប់ស្កាត់ការលួចឆ្លងដែនទាំងហ្វូង។
ក្រុមយោធានបានចោទប្រកាន់ក្រុមហាម៉ាស ពីការប្រើប្រាស់បាតុកម្មដើម្បីចូលដល់និងបំផ្លាញរបងព្រំដែនរួមទាំងការដាក់គ្រឿងផ្ទុះ និងធ្វើការវាយប្រហារក្រុមទាហាន។
កាលពីថ្ងៃអាទិត្យ ប្រភពព័ត៌មានពីប៉ាឡេស្ទីន និងអ៊ីស្រាអែល បានឲ្យដឹងថា អ្នកទោសប៉ាឡេស្ទីនម្នាក់ បានស្លាប់ដោយសារជំងឺគាំងបេះដូងខណៈកំពុងស្ថិតនៅក្នុងមន្ទីរឃុំឃាំងនៅឡើយនោះ។
ក្លឹបអ្នកទោស ប៉ាឡេស្ទីន បានឲ្យដឹងថា បុរសឈ្មោះ Aziz Ewisat បានជាប់ពន្ធនាគារ ៣០ ឆ្នាំ ចាប់តាំងពីឆ្នាំ ២០១៤ និងមានជំងឺគាំងបេះដូង នាដើមខែនេះ៕