.jpg)
ឧទ្ធម្ភាគចក្ររបស់លោកប៉ូរ៉ូសិនកូហោះពីខាងលើទាហានម្នាក់មុនធ្វើសមយុទ្ធ។ AFP
ក្រុងកៀវៈ ក្រុមអាជ្ញាធរអ៊ុយក្រែនកាលពីថ្ងៃចន្ទ បានវាយប្រហារទៅលើព្រះវិហារគ្រិស្តសាសនា ៣ កន្លែង ដែលមានទំនាក់ទំនងជាមួយរុស្ស៊ី ខណៈភាពតានតឹងខាងសាសនា និងនយោបាយរវាងប្រទេសទាំង ២ កំពុងកើនឡើង។
អ្នកនាំពាក្យប៉ូលិសប្រចាំតំបន់ លោកស្រី AllaVashchenko បានថ្លែងប្រាប់ AFP ថា ប៉ូលិស និងសន្តិសុខ បានឆែកឆេរគេហដ្ឋានរបស់ក្រុមបព្វជិត ដែលបានប្រកាសភក្តីភាពរបស់ពួកគេចំពោះសាខារបស់ព្រះវិហារគ្រិស្តនៅរុស្ស៊ី។
ព្រះវិហារគ្រិស្តសាសនា Orthodox អ៊ុយក្រែន កាលពីពេលថ្មីៗនេះ ទទួលបានឯករាជភាពពីក្រុងម៉ូស្គូនៅក្នុងការសម្រេចដ៏មានភាពចម្រូងចម្រាស ដែលបានធ្វើឲ្យក្រុងកៀវសប្បាយចិត្ត ប៉ុន្តែផ្ទុះកំហឹងនៅក្រុងម៉ូស្គូ។
ប្រទេសជិតខាងទាំង ២ បានប៉ះទង្គិចគ្នាកាលពីប៉ុន្មានថ្ងៃថ្មីៗនេះ ក្រោយពីរុស្ស៊ី បានរឹបអូសយកនាវាអ៊ុយក្រែន និងចាប់ខ្លួនទាហានជើងទឹកជាច្រើននាក់ នៅក្នុងការប្រឈមមុខដាក់គ្នាខាងយោធាលើកដំបូងរបស់ប្រទេសទាំង ២ ចាប់តាំងពីដាក់បញ្ចូលតំបន់គ្រីមាជាឧបសម្ព័ន្ធរបស់ក្រុងម៉ូស្គូនៅឆ្នាំ ២០១៤ មកនោះ។
អ្នកនាំពាក្យរូបនោះ បានថ្លែងដោយមិនមានការផ្តល់ព័ត៌មានលម្អិតពីការស៊ើបអង្កេតនោះថា ការវាយប្រហារទៅលើព្រះវិហារនៅអ៊ុយក្រែនភាគខាងជើង ជាផ្នែកនៃការស៊ើបអង្កេតទៅលើលទ្ធភាពរំលោភបំពានច្បាប់ស្តីអំពីភាពស្មើគ្នាខាងជំនឿសាសនា។
លោកស្រី Vashchenko បានបន្ថែមទៀតថា៖ «គ្មាននរណាម្នាក់ ត្រូវបានចាប់ខ្លួននោះទេ»៕
