.jpg)
លោកប៉ូរ៉ូសិនកូ ថ្លែងក្នុងជំនួបជាមួយសាច់ញាតិទាហានជើងទឹក។ AFP
ក្រុងប្រ៊ុចសែលៈ អ៊ុយក្រែន កាលពីថ្ងៃអង្គារ បានស្នើឲ្យអង្គការណាតូឆ្លើយតបជាបន្ទាន់មួយចំពោះការឈ្លានពានរបស់រុស្ស៊ីនៅសមុទ្រខ្មៅ ខណៈក្រុមសម្ព័ន្ធមិត្តមានការព្រួយបារម្ភថា ភាពតានតឹងអាចកើតឡើងថែមទៀត។
រដ្ឋមន្ត្រីការបរទេសអ៊ុយក្រែនលោក PavloKlimkin បានព្រលយពាក្យថា យ៉ាងហោចណាស់ក៏មានសមាជិកណាតូមួយបានត្រៀមខ្លួនបង្កើនវត្តមានរបស់ខ្លួននៅក្នុងសមុទ្រខ្មៅ ជាការឆ្លើយតបទៅនឹងការអំពាវនាវពីក្រុងកៀវ បន្ទាប់ពីរុស្ស៊ី បានរឹបអូសយកនាវា និងចាប់ឃុំខ្លួនទាហានជើងទឹកនៅដែនទឹក Kerch។
ជំនួបរដ្ឋមន្ត្រីការបរទេសណាតូនៅក្រុងប្រ៊ុចសែល បានពិភាក្សាអំពីភាពមិនចាញ់មិនឈ្នះនៅសមុទ្រខ្មៅ Azov ប៉ុន្តែមិនបានឯកភាពចំពោះវិធានការថ្មីណាមួយ ដើម្បីជួយប្រទេសអ៊ុយក្រែនទេ។
លោក Klimkin បានថ្លែងប្រាប់ក្រុមអ្នកសារព័ត៌មានថា៖ «អ្វីដែលសំខាន់នោះ គឺថាត្រូវឆ្លើយតបជាបន្ទាន់ចំពោះទង្វើឈ្លានពានរបស់រុស្ស៊ី ហើយរុស្ស៊ី បានរំលោភបំពានសន្តិសុខនៅសមុទ្រខ្មៅ »។
ការប៉ះទង្គិចគ្នា កាលពីសប្តាហ៍មុននៅឆ្នេរសមុទ្រគ្រីមា ដែលបានត្រូវដាក់បញ្ចូលជាឧបសម្ព័ន្ធរបស់ក្រុងម៉ូស្គូនៅឆ្នាំ ២០១៤ នោះ បានបណ្តាលឲ្យទាហានជើងទឹកអ៊ុយក្រែន ២៤ នាក់ និងនាវា ៣ គ្រឿងធ្លាក់នៅក្នុងកណ្តាប់ដៃរបស់រុស្ស៊ី និងបានធ្វើឲ្យមានភាពតានតឹង កើនឡើងយ៉ាងខ្លាំង។
ក្រុមមេដឹកនាំអឺរ៉ុប បានច្រានចោលការអំពាវនាវរបស់អ៊ុយក្រែន ឲ្យមានការគាំទ្រឲ្យបានច្រើនក្នុងការប្រឆាំងនឹងក្រុងម៉ូស្គូ៕
