.jpg)
ក្រុមអ្នកតវ៉ាពាក់អាវកាក់ពណ៌លឿង ស្រែកពាក្យស្លោក និងគ្រវីបដាខណៈចូលរួមការជួបជុំតវ៉ាប្រឆាំងការដំឡើងពន្ធប្រេងកាលពីថ្ងៃទី ២៤ វិច្ឆិកា។ AFP
ក្រុងប៉ារីសៈ ក្រុមអ្នកតវ៉ាប្រឆាំងរដ្ឋាភិបាល បានប៉ះទង្គិចជាមួយប៉ូលិសបារាំងនៅទីលាន Champs-Elysees នៅក្នុងក្រុងប៉ារីសកាលពីថ្ងៃសៅរ៍ ដោយបានបណ្តាលឲ្យតំបន់នោះត្រូវគ្របដណ្តប់ដោយឧស្ម័នបង្ហូរទឹកភ្នែក និងផ្សែងក្នុងពេលតវ៉ាប្រឆាំងនឹងលោកប្រធានាធិបតីអេម៉ានុយអែល ម៉ាក្រុង។
ក្រុមអ្នកតវ៉ាពាក់អាវកាក់ពណ៌លឿងដែលជាតំណាងឲ្យចលនារបស់ពួកគេបានចោលវត្ថុផ្សេងៗទៅលើប៉ូលិស ដែលបានរារាំងពួកគេមិនឲ្យចូលទៅតាមផ្លូវមានលក់ទំនិញច្រើនដែលតុបតែងដោយភ្លើងសម្រាប់បុណ្យណូអែល នៅពេលខាងមុខនេះ។
ពួកគេ ក៏បានដាក់របាំងឃាំងផ្លូវនៅតាមកន្លែងមួយចំនួន និងវាយបំផ្លាញភ្លើងចរាចរណ៍ និងស្លាកសញ្ញានៅតាមដងផ្លូវ ដោយបានបង្កើតទិដ្ឋភាពកុបកម្មដូចជាចលាចលស៊ីវិលនៅបារាំងកាលពីឆ្នាំ ១៩៦៨ ឬ ការបះបោរតាមដងផ្លូវនៅ ពាក់កណ្តាលសតវត្សរ៍ទី ១៩ ដែលមាននៅក្នុងរូបគំនូរ និងខ្សែភាពយន្ត។
នាយកដ្ឋានប៉ូលិសក្រុង និងរដ្ឋមន្ត្រីមហាផ្ទៃលោក Christophe Castaner បានថ្លែងថា ប៉ូលិស បានចាប់ខ្លួនមនុស្ស ១៣០ នាក់ ៦៩ នាក់នៃពួកគេត្រូវចាប់ខ្លួននៅក្នុងក្រុងប៉ារីស និង ២៤ នាក់រងរបួស និង ៥ នាក់ជាមន្ត្រីប៉ូលិស។
នៅកន្លែងផ្សេងទៀត ក្រុមអ្នកតវ៉ាដើរហែក្បួនដោយបានទាមទារឲ្យកាត់បន្ថយពន្ធទៅលើប្រេងរថយន្តជាពិសេសប្រេងម៉ាស៊ូត។
លោកម៉ាក្រុង ដែលត្រូវក្រុមអ្នកតវ៉ាយកជាគោលដៅ ដោយបានទាមទារឲ្យលោកចុះពីតំណែងបានសរសេរនៅលើគេហទំព័រធ្វីធើរអរគុណប៉ូលិស។
លោកម៉ាក្រុង បានថ្លែងថា ជារឿងគួរឲ្យអាម៉ាស់ណាស់ចំពោះអ្នក ដែលវាយប្រហារ ឬ បំភិតបំភ័យពលរដ្ឋ អ្នកកាសែតនិងក្រុមអ្នកនយោបាយ។ គ្មានកន្លែងសម្រាប់បង្កអំពើហិង្សានៅក្នុងប្រទេសបារាំងទេ។ នៅតាមដងផ្លូវខ្លះ បានស្ងប់ស្ងាត់ទៅវិញ ក្រោយពីពាក់កណ្តាលអាធ្រាត្រថ្ងៃសៅរ៍៕
