.jpg)
លោកឧត្តមសេនីយ៍ Abdel Fattah Burhan ថ្លែងអំពីការចរចាជាមួយក្រុមអ្នកតវ៉ានៅក្រុងខារទុំ។ AFP
ក្រុងខារទុំៈ ក្រុមមេដឹកនាំតវ៉ាស៊ូដង់ កាលពីថ្ងៃពុធ បានទាត់ចោលការចរចាជាមួយក្រុមប្រឹក្សាយោធា ដែលកំពុងគ្រប់គ្រងអំណាច និងបានទាមទាររកយុត្តិធម៌សម្រាប់ការបង្ក្រាប ដែលក្រុមគ្រូពេទ្យបាននិយាយថា បណ្តាលឲ្យមនុស្ស ១០៨ នាក់ស្លាប់។
មេដឹកនាំយោធានៃប្រទេស ស៊ូដង់ លោកឧត្តមសេនីយ៍ Abdel Fattah Burhan បានថ្លែងកាលពីថ្ងៃពុធថា លោកបានបើកទ្វារចំហដើម្បីធ្វើការចរចាអំពីអនាគតរបស់ប្រទេស មួយថ្ងៃក្រោយពីធ្វើការអំពាវនាវឲ្យពួកគេឈប់តវ៉ា ស្របពេលដែលមានការបង្ក្រាបបង្ហូរឈាមទៅលើក្រុមអ្នកតវ៉ាទាំងអស់នោះ។
លោកឧត្តមសេនីយ៍ បានថ្លែងនៅក្នុងសុន្ទរកថាដែលត្រូវបានគេចាក់ផ្សព្វផ្សាយតាមទូរទស្សន៍រដ្ឋថា៖ «យើងជាក្រុមប្រឹក្សាយោធាបានបើកចំហឲ្យកងកម្លាំងរបស់យើងចរចាដោយគ្មានការដាក់កំហិត ប៉ុន្តែផលប្រយោជន៍ជាតិក្នុងការបន្តកាន់អំណាច ដោយស្របច្បាប់ដែលបានឆ្លុះបញ្ចាំងអំពីមហិច្ឆតានៃការធ្វើបដិវត្តន៍នៅក្នុងប្រទេស ស៊ូដង់ គ្រប់មធ្យោបាយតាមដែលអាចធ្វើទៅបាន»។
ប្រជាជនស៊ូដង់ចូលរួមពិធីបុណ្យ Eid al-Fitr ដែលត្រូវបានគេប្រារព្ធឡើងនៅថ្ងៃបញ្ចប់នៃបុណ្យរ៉ាម៉ាដន។ AFP
គណៈកម្មាធិការរបស់ក្រុមវេជ្ជបណ្ឌិតស្និទ្ធជាមួយក្រុមបាតុករ បានថ្លែងកាលពីថ្ងៃពុធថា មនុស្សជាង ៣០ នាក់ បានស្លាប់នៅក្នុងការបង្ក្រាបរយៈពេល ២ ថ្ងៃ ទៅលើក្រុមអ្នកតវ៉ាស៊ូដង់ ដែលបានធ្វើឡើងដោយក្រុមកងកម្លាំង និងក្រុមយោធា។
ចំនួនអ្នកស្លាប់កាលពីពេលកន្លងទៅ ត្រូវបានផ្តល់ឲ្យដោយគណៈកម្មាធិការមជ្ឈិមរបស់ក្រុមវេជ្ជបណ្ឌិតស៊ូដង់ បានរាប់ឃើញចំនួនអ្នកស្លាប់មានដល់ទៅ ៤០ នាក់ ចាប់តាំងពីធ្វើការបង្ក្រាបបង្ហូរឈាមទៅលើក្រុមអ្នកតវ៉ាអស់ជាច្រើនសប្តាហ៍ នៅខាងក្រៅទីបញ្ជាការយោធានៅក្រុងខារទុំ។
ទិដ្ឋភាពខាងក្រៅរបស់ស្ថានទូតអាមេរិកនៅក្នុងរដ្ឋធានីខារទុំនៃប្រទេស ស៊ូដង់ កាលពីថ្ងៃទី ៥ ខែ មិថុនា ឆ្នាំ ២០១៩។ AFP
លោក Abdel Fattah- Burhan បានថ្លែងនៅក្នុងសុន្ទរកថាកាលពីថ្ងៃពុធថា៖ «យើងពិតជាមានការសោកស្តាយយ៉ាងខ្លាំងចំពោះការបង្រ្កាបរបស់ក្រុមយោធា។
យោធាស៊ូដង់ បានទម្លាក់ប្រធានាធិបតីលោក អូមារ-អាល់-អាសៀរ កាលពីខែមេសា ក្រោយពីមានការតវ៉ាអស់ជាច្រើនខែប្រឆាំងការគ្រប់គ្រងផ្តាច់ការរបស់លោក ហើយ បានឯកភាពធ្វើការផ្លាស់ប្តូររយៈពេល ៣ ឆ្នាំ ទៅឲ្យរដ្ឋការស៊ីវិលគ្រប់គ្រងជំនួសវិញ។
ប៉ុន្តែលោក Abdel Fattah-Burhan បានថ្លែងថា ក្រោយពីមានការបង្ក្រាប ដែលកិច្ចព្រមព្រៀងផ្ទេអំណាច ត្រូវបានលុបចោល ហើយការបោះឆ្នោតមួយ អាចនឹងធ្វើឡើងនៅក្នុងរយៈពេល ៩ ខែ ជាផែនការដែលក្រុមមេដឹកនាំតវ៉ាបាន បដិសេធទាំងស្រុង។
ពួកគេ បានអំពាវនាវឲ្យក្រុមអ្នកគាំទ្ររបស់ពួកគេចូលរួមនៅក្នុងការ «បះបោរស៊ីវិល» ដើម្បីផ្តួលរំលំក្រុមប្រឹក្សាយោធាដែលកំពុងគ្រប់គ្រងអំណាចនៅប្រទេស ស៊ូដង់ នោះ។
ចំពោះការបង្ក្រាបនៅស៊ូដង់ ក្រុងវ៉ាស៊ីនតោនកាលពីថ្ងៃពុធ បានឲ្យក្រុមមេដឹកនាំយោធាឈប់ប្រើអំពើហិង្សា និងបានជំរុញឲ្យធ្វើការចរចាជាមួយ ក្រុមអ្នកតវ៉ា ក្រោយពីក្រុមគ្រូពេទ្យនិយាយថាមានមនុស្ស ១០៨ បានស្លាប់៕ AFP/PSA
