.jpg)
រូបលោក Thae Yongho អតីតអគ្គរដ្ឋទូតរងរបស់កូរ៉េខាងជើងប្រចាំនៅអង់គ្លេស និងជាអ្នករត់ចេញពីប្រទេសត្រូវដាក់បង្ហាញនៅបណ្ណាល័យមួយ។ AFP
ក្រុងសេអ៊ូលៈ មន្ត្រីកំពូលរបស់កូរ៉េខាងជើង ដែលរត់ចេញពីប្រទេស បានថ្លែងមុនពេលកិច្ចប្រជុំរវាងប្រធានាធិបតីអាមេរិក លោក ដូណាល់ត្រាំ និងលោកគីម ជុងអ៊ុន នៅខែក្រោយនោះថា កូរ៉េខាងជើងនឹងមិនបោះបង់ចោលអាវុធនុយក្លេអ៊ែររបស់ខ្លួនទាំងស្រុងនោះទេ។
លោក Thae Yongho ដែលបានបោះបង់ចោលតួនាទីរបស់លោក ខណៈលោកគឺជាអគ្គរដ្ឋទូតរងកូរ៉េខាងជើងប្រចាំនៅអង់គ្លេសកាលពីខែសីហា ឆ្នាំ ២០១៦ បានថ្លែងថា ស្ថានភាពការទូត និងកិច្ចចរចានាពេលបច្ចុប្បន្ន នឹងមិនបិទបញ្ចប់ជាមួយនឹងការបោះបង់ចោលអាវុធនុយក្លេអ៊េរ «ទាំងស្រុង និងដោយស្រេចតែចិត្តនោះទេ» ប៉ុន្តែ «ជាមួយនឹងការថមថយនៃការគំរាមកំហែងពីអាវុធនុយក្លេអ៊ែររបស់កូរ៉េខាងជើង»។
លោក Thae Yongho បានថ្លែងប្រាប់ភ្នាក់ងារព័ត៌មានកូរ៉េខាងត្បូង Newsis ថា ៖ «នៅពេលចុងក្រោយ កូរ៉េខាងជើង នឹងនៅតែជាប្រទេសមហាអំណាច»។
កូរ៉េខាងជើង និងកូរ៉េខាងត្បូង បានបញ្ជាក់ពីការប្តេជ្ញាចិត្តរបស់ពួកគេចំពោះគោលបំណង ធ្វើឲ្យឧបទ្វីបកូរ៉េ គ្មានអាវុធនុយក្លេអ៊ែរនៅជំនួបកាលពីខែមុន និងក្រុងព្យុងយ៉ាងបានប្រកាសនៅចុងសប្តាហ៍មុននេះថា ខ្លួននឹងបំផ្លាញចោលទីតាំងតេស្តនុយក្លេអ៊ែររបស់ខ្លួននៅសប្តាហ៍ក្រោយ។
ប៉ុន្តែខ្លួនមិនបានប្រកាសអ្វីជាសម្បទាន ដែលបានផ្តល់ឲ្យនោះឡើយ។ ក្រុងវ៉ាស៊ីនតោន កំពុងស្វះស្វែងធ្វើឲ្យកូរ៉េខាងជើងបំផ្លាញចោលនុយក្លេអ៊ែរទាំងស្រុងអាចផ្ទៀងផ្ទាត់បាន និងគ្មានការប្រែប្រួលឡើយ ហើយក៏បានបញ្ជាក់ទៀតថា ការផ្ទៀងផ្ទាត់នឹងជាគន្លឹះសំខាន់។
ក្រុងព្យុងយ៉ាង បាននិយាយថា នឹងមិនត្រូវការអាវុធនុយក្លេអ៊ែរទៀតទេ ប្រសិនបើសន្តិសុខនៃរបបរបស់ខ្លួនត្រូវបានធានា៕
