.jpg)
ក្រុមនិស្សិតមូស្លីមឥណ្ឌូនេស៊ី គោរពវិញ្ញាណក្ខន្ធជនរងគ្រោះនៃការវាយ ប្រហារគ្រាប់បែកនៅស្រីលង្កាកាលពីថ្ងៃទី ២២ ខែ មេសា។ រូបថតAFP
ក្រុងកូឡុំបូៈ អ្នកនាំពាក្យប៉ូលិស បានថ្លែងកាលពីថ្ងៃអង្គារថា ចំនួនអ្នកស្លាប់ដោយសារការវាយប្រហារគ្រាប់បែកអត្តឃាតនៅស្រីលង្កា បានកើនឡើងដល់ ៣១០ នាក់ហើយ ដោយមនុស្សមួយចំនួនស្លាប់ដោយសាររបួស ធ្ងន់ធ្ងរ។
នៅក្នុងសេចក្តីថ្លែងការណ៍មួយ លោក Ruwan Gunasekera បានថ្លែងឲ្យដឹងថា មនុស្សប្រហែល ៥០០ នាក់ បានរងរបួសនៅក្នុងការបំផ្ទុះគ្រាប់បែកនោះ។
លោក Ruwan Gunasekera បានបន្ថែមថា មនុស្ស ៤០ នាក់ ត្រូវបានចាប់ខ្លួននៅក្នុងការជាប់ពាក់ព័ន្ធជាមួយនឹងការវាយប្រហារទាំងនោះ ដែលរដ្ឋាភិបាលស្រីលង្កា បានស្តីបន្ទោសទៅលើក្រុមអ៊ិស្លាមនៅក្នុងតំបន់ ដែលគេមិនសូវស្គាល់ ក្រុមនោះមានឈ្មោះថា ក្រុម National Thowheeth Jama''ath។
ទង់ជាតិត្រូវគេទម្លាក់ចុះនៅត្រឹមពាក់កណ្តាលនៅលើអគាររដ្ឋាភិបាលមួយចំនួន ហើយប្រជាជន បានស្មិងស្មាធិ៍ឱនគោរព ដោយស្ងៀមស្ងាត់ ចំពោះអំពើហិង្សាដែលបានបណ្តាលឲ្យមានការផ្ទុះកំហឹងជាអន្តរជាតិ។
ការស្ងៀមស្ងាត់បានចាប់ផ្តើមនៅម៉ោង ៨ កន្លះព្រឹក ជាពេលដែលគ្រាប់បែក ៦ គ្រាប់ដំបូងបានផ្ទុះកាលពីព្រឹកថ្ងៃអាទិត្យ៕ AFP/SK
