.jpg)
ក្រុងពីថូរ៉ាហ្គារហ៍ៈ មន្ត្រីឥណ្ឌាម្នាក់ បាននិយាយកាលពីថ្ងៃអង្គារថា អ្នកឡើងភ្នំ ៨ នាក់ ដែលត្រូវបានគេជឿថាស្លាប់នៅលើភ្នំហិមាល័យ បានប្រថុយគ្រោះថ្នាក់ ដោយសារផ្លាស់ប្តូរផែនការរបស់ពួកគេដោយគ្មានការអនុញ្ញាត។
ឧទ្ធម្ភាគចក្រយោធាជាច្រើនគ្រឿងដែលបានចូលរួមការស្វែងរកជនជាតិអង់គ្លេស ៤ នាក់ អាមេរិក ២ នាក់ អូស្ត្រាលីម្នាក់ និងឥណ្ឌាម្នាក់ បានរកឃើញសាកសព ៥ នាក់ នៅលើភ្នំ Nanda Devi។
ក្រុមមួយ ដែលដឹកនាំដោយអ្នកឡើងភ្នំអង់គ្លេសដែលមានបទពិសោធលោក Martin Moran កាលពីខែមុនទទួលបានការអនុញ្ញាតឲ្យឡើងកំពូលភ្នំភាគខាងកើត។
ប៉ុន្តែក្រុមអ្នកឡើងភ្នំបានប្រកាសនៅលើគេហទំព័រហ្វេសប៊ុកកាលពីថ្ងៃទី ២២ ខែ ឧសភា ក្រោយពីឡើងទៅដល់ជំរំមូលដ្ឋានទី២ ដែលពួកគេគ្រោងឡើងដល់កំពូលភ្នំមានកម្ពស់ ៦,៤៧៧ ម៉ែត្រ។
មន្ត្រីម្នាក់នៅក្នុងរដ្ឋUttarakhandជាទីដែលភ្នំស្ថិតនៅនោះ បានថ្លែងប្រាប់ AFP ថា៖ «ជួរភ្នំនេះ ពិបាកឡើងជាងភ្នំអេវើរ៉េសទៅទៀត។ ពួកគេដឹងថា ពួកគេប្រថុយគ្រោះដល់អាយុជីវិតក្រោយពីផ្លាស់ប្តូរផែនការរបស់ពួកគេដោយមិនបានជូនព័ត៌មានដល់ក្រុមអាជ្ញាធរ»។
លោក បានថ្លែងថា៖ «ការអនុញ្ញាតត្រូវបានផ្តល់ឲ្យសម្រាប់ភ្នំ Nanda Devi ភាគខាងកើត ហើយការផ្លាស់ប្តូរទិសដៅ គឺខុសច្បាប់។ យើងពិតជាមិនបានដឹងអំពីការផ្លាស់ប្តូរផែនការរបស់ពួកគេ ដែលនាំឲ្យស្លាប់បែបនេះទេ»។
លោក Surendar S. Panwar មកពីក្រុមហ៊ុនទេសចរណ៍ Cosmos Tour and Expedition បាននិយាយថា លោក Moran មានបទពិសោធខ្ពស់ និងធ្លាប់ឡើងភ្នំនៅតំបន់នេះ៕ AFP/PSA
