ក្រុងញូវដែលី៖ ក្រុមមន្ត្រីបាននិយាយថា សភាជាន់ខ្ពស់នៃប្រទេស ឥណ្ឌា ឬ រ៉ាយ៉ា សាបហា (Rajya Sabha) បានអនុម័តការវិសោធនកម្មសេចក្តីព្រាងច្បាប់សញ្ជាតិ (CAB) យ៉ាងចម្រូងចម្រាសកាលពីល្ងាចថ្ងៃពុធ។
សេចក្តីព្រាងច្បាប់នេះនឹងផ្តល់សញ្ជាតិឲ្យក្រុមជនចំណាកស្រុកខុសច្បាប់ ដែលមានសាសនាចំនួន ៦ មានសាសនាហិណ្ឌូ សាសនាស៊ីក ព្រះពុទ្ធសាសនា ជេនសា សនា និងគ្រិស្តសាសនាមកពីប្រទេស បង់ក្លាដែស អាហ្វហ្គានីស្ថាន និងប៉ាគីស្ថាន។ ទោះបីជាយ៉ាងណាក៏ដោយ ក៏សេចក្តីព្រាងច្បាប់នេះបានរារាំងក្រុមអ្នកកាន់សាសនាមូស្លីម មិនឲ្យដាក់ពាក្យសុំសញ្ជាតិដែរ។
មានការជជែកដេញដោលយ៉ាងក្តៅគគុកនៅក្នុងសភានោះអស់ជាច្រើនម៉ោងកាលពីថ្ងៃពុធ ក្រោយពីសេចក្តីព្រាងច្បាប់នេះ ត្រូវបានដាក់ឲ្យបោះឆ្នោតនៅពេលល្ងាចនោះ។
មន្ត្រីម្នាក់បាននិយាយថា ក្រោយពីការពិភាក្សារួចមកសមាជិក ១២៥ រូប បានបោះឆ្នោតគាំទ្រ និង ១០៥ រូប បានបោះឆ្នោតជំទាស់ច្បាប់នេះ។
សេចក្តីព្រាងច្បាប់នេះត្រូវបានប្រកាសនៅក្នុងសភាដោយរដ្ឋមន្ត្រីមហាផ្ទៃលោក អាមីត សាហ៍ ដែលបានប្រឆាំងការអះអាងរបស់បក្សប្រឆាំងដែលថា សេចក្តីព្រាងច្បាប់នេះបានរំលោភរដ្ឋធម្មនុញ្ញរបស់ប្រទេស ឥណ្ឌា។
ក្រុមគណបក្សប្រឆាំងបានរិះគន់ច្បាប់នេះថា ផ្ទុយនឹងគោលការណ៍មិនទាក់ទងសាសនាដែលមានចែងនៅក្នុងរដ្ឋធម្មនុញ្ញរបស់ឥណ្ឌាដោយសារច្បាប់នេះ មិនរាប់បញ្ចូលអ្នកកាន់សាសនាមូស្លីមទេ។
នៅក្នុងសេចក្តីថ្លែងការណ៍មួយប្រធានគណបក្សសមាជលោក សូនៀ ហ្គានឌី បានថ្លែងថា៖ «ថ្ងៃនេះ គឺជាថ្ងៃងងឹតបំផុតនៅក្នុងប្រវត្តិសាស្ត្ររដ្ឋធម្មនុញ្ញរបស់ឥណ្ឌា។ ការអនុម័តច្បាប់សញ្ជាតិនេះ គឺជាជ័យជម្នះរបស់កម្លាំងមានចិត្តចង្អៀតចង្អល់ទៅលើពហុបក្សនិយមរបស់ឥណ្ឌា»។
រដ្ឋាភិបាលរបស់បក្ស បាហារ៉ាធីយ៉ា ចាណាតា (BJP) កាលពីថ្ងៃអង្គារបានខិតខំប្រឹងប្រែងធ្វើការអនុម័តនៅសភា ឬលោក សាបហា (Lok Sabha) ដោយសារសំឡេងភាគច្រើនរបស់ខ្លួន។
សេចក្តីព្រាងច្បាប់នោះនឹងក្លាយជាច្បាប់មួយ ក្រោយពីត្រូវបានចុះហត្ថលេខាដោយប្រធានាធិបតី។
CAB បានបង្កឲ្យមានការតវ៉ាជាទូទៅនៅក្នុងប្រទេសនេះ ជាពិសេសនៅរដ្ឋអាសាម និងទ្រីពួរ៉ាភាគឦសានដែលមានព្រំដែនជាប់បង់ក្លាដែស ខណៈក្រុមអ្នកស្រុកភ័យខ្លាចថា ក្រុមជនចំណាកស្រុកនឹងធ្វើឲ្យប៉ះពាល់ដល់ឋានៈរបស់ពួកគេ។
តាមរយៈសេចក្តីព្រាងច្បាប់នេះរដ្ឋាភិបាលឥណ្ឌានឹងផ្តល់សញ្ជាតិឥណ្ឌាដល់ជនចំណាកស្រុកដែលមិនមែនជាអ្នកកាន់សាសនាមូស្លីមដែលបានចូលមកប្រទេសនេះ ដោយខុសច្បាប់នៅមុនថ្ងៃទី ៣១ ខែ ធ្នូឆ្នាំ ២០១៤៕ Xinhua/PSA