.jpg)
លោក Joseph Dunford មេបញ្ជាការនៃសេនាធិការចម្រុះរបស់មន្ទីរបញ្ចកោណ ចូលរួមពិធីរំឭកវិញ្ញាណក្ខន្ធនៅកន្លែងបញ្ចុះសព Arlington។ AFP
ក្រុងវ៉ាស៊ីនតោនៈ ឧត្តមសេនីយ៍យោធាជាន់ខ្ពស់អាមេរិក បានថ្លែងកាលពីថ្ងៃពុធថា លោកប្រធានាធិបតីចិន ស៊ី ជីនភីង មិនគោរពពាក្យសន្យាថា មិនឲ្យមានយោធានៅតំបន់សមុទ្រចិនខាងត្បូង ហើយអាមេរិក បានអំពាវនាវឲ្យ «មានវិធានការរួម» ដើម្បឲ្យក្រុងប៉េកាំងទទួលខុសត្រូវ។
លោកឧត្តមសេនីយ៍ Joseph Dunford ជាមេបញ្ជាការនៃសេនាធិការរបស់មន្ទីរបញ្ចាកោណ បានថ្លែងថា លោកមិនអំពាវនាវឲ្យមានវិធានការយោធាទេ ប៉ុន្តែលោកបានសង្កត់ធ្ងន់ថា មានតម្រូវការចាំាបាច់ គឺអនុវត្តច្បាប់អន្តរជាតិ។
លោក Joseph Dunford បានថ្លែងនៅក្នុងកិច្ចពិភាក្សាមួយស្តីពីសន្តិសុខ និងការការពារអាមេរិកនៅឯវិទ្យាស្ថាន Brooking ថា៖ «កាលពីឆ្នាំ ២០១៦ លោកប្រធានាធិបតីចិន ស៊ី ជីនភីង បានសន្យាជាមួយលោកអតីតប្រធានាធិបតី បារ៉ាក់ អូបាម៉ា ថា ពួកគេនឹងមិនឲ្យមានយោធានៅប្រជុំកោះមានជម្លោះនោះទេ ដូច្នេះហើយអ្វីដែលយើងមើលឃើញនៅថ្ងៃនេះ គឺចិនបានសាងសង់ព្រលានយន្តហោះមានទាំងឃ្លាំងផ្ទុកអាវុធយុទ្ធភណ្ឌជាច្រើនកន្លែង និងមានការដាក់ពង្រាយប្រព័ន្ធការពារមីស៊ីលផងដែរ។
«ដូច្នេះ ពិតជាច្បាស់ណាស់ពួកគេ មិនគោរពតាមការសន្យារបស់ពួកគេទេ»។
លោកបានបន្តថា៖ «សមុទ្រចិនខាងត្បូងស្ថិតនៅក្នុងការវិនិច្ឆ័យរបស់ខ្ញុំមិនមែនជាគំនរដុំថ្មទេ ដោយបាននិយាយយោងដល់តំបន់ថ្មប៉ប្រះទឹក និងផ្ទាំងថ្ម ដែលត្រូវបានអះអាងជាទឹកដីរបស់ចិន ដែលបានចាប់យក និងពង្រីក ដើម្បីផ្តល់ជាកន្លែងជម្រកដល់កងកម្លាំងយោធា និងយន្តហោះធំៗរបស់ចិន។
លោកបានបន្ថែមថា៖ «អ្វីជាបញ្ហាគ្រោះថ្នាក់នៅសមុទ្រចិនខាងត្បូង និងនៅកន្លែងផ្សេងទៀត ដែលមានការទាមទារទឹកដី គឺគោលការណ៍ច្បាប់ បទដ្ឋាន និងច្បាប់អន្តរជាតិ»។ «អ្វីជាតម្រូវការចាំបាច់នោះ គឺការអនុវត្តតាមច្បាប់ និងបទដ្ឋានអន្តរជាតិនៅតំបន់សមុទ្រខាងត្បូងនោះ»៕ AFP/SK
