The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​មាន​ឧកញ៉ា​ជាង ៧០០ នាក់​គិត​ត្រឹម​ដើម​ឆ្នាំ​២០១៤​នេះ

កម្ពុជា​មាន​ឧកញ៉ា​ជាង ៧០០ នាក់​គិត​ត្រឹម​ដើម​ឆ្នាំ​២០១៤​នេះ

ឧកញ៉ា ម៉ុង ឫទ្ធី សេដ្ឋីផ្នែកកសិកម្ម និង ចិញ្ចឹមសត្វ។
ឧកញ៉ា ម៉ុង ឫទ្ធី សេដ្ឋីផ្នែកកសិកម្ម និង ចិញ្ចឹមសត្វ។ ហេង ជីវ័ន

កម្ពុជា​មាន​ឧកញ៉ា​ជាង ៧០០ នាក់​គិត​ត្រឹម​ដើម​ឆ្នាំ​២០១៤​នេះ

ប្រសិន​បើ​ក្រឡេក​ទៅ​មើល​ទំហំ និង​ការ​រីក​ចម្រើន​នៃ​សេដ្ឋកិច្ច​កម្ពុជា​ធៀប​ទៅ​នឹង​កំណើន​ប្រជា​ពលរដ្ឋ​និង​កំណើន​តម្រូវការ​វា​ហាក់​ដូច​ជា​ការ​រីក​ចម្រើន​នៃ​សេដ្ឋកិច្ច​មាន​សន្ទុះ​យឺត​បើ​ធៀប​ទៅ​នឹង​សក្តានុពល​ក្នុង​ស្រុក​ដែល​អាច​ទាញ​យក​ដើម្បី​ជំរុញ​កំណើន​មួយ​ប្រកប​ដោយ​និរន្តរភាព​និង​កំណើន​ដោយ​មាន​ការ​រួម​ផ្សំ។

បើ​ទោះ​បី​ជា​ក្នុង​រយៈ​ពេល​ជាង​មួយ​ទសវត្សរ៍​ចុង​ក្រោយ​នេះ កម្ពុជា សម្រេច​បាន​កំណើន​ជា​មធ្យម​ជាង ៧ ភាគរយ​ដែល​អាច​អនុញ្ញាត​ឲ្យ​ខ្លួន​មាន​លទ្ធភាព​កាត់​បន្ថយ​អត្រា​នៃ​ភាព​ក្រីក្រ​ប្រមាណ​ជា ១ ភាគរយ​ក្នុង ១ ឆ្នាំ​ដោយ​សារ​លំហូរ​មូលធន​ពី​ខាង​ក្រៅ​ក៏​ពិត​មែន ក៏​ក្រុម​អ្នក​វិភាគ​មើល​ឃើញ​ថា លំហូរ​មូលធន​ក្នុង​ស្រុក​ហាក់​ដូច​ជា​មិន​សូវ​ចាក់​បញ្ចូល​ច្រើន​ទេ​បើ​ធៀប​ទៅ​នឹង​សាច់​ប្រាក់​ដែល​មាន​ដោយ​ពុំ​បាន​យក​ធ្វើ​ការ​វិនិយោគ​ដែល​នេះ​អាច​បង្ក​ឲ្យ​មាន​កង្វះ​សាច់​ប្រាក់​ងាយ​ស្រួល​នៅ​ក្នុង​សេដ្ឋកិច្ច​ហើយ​វា​ក៏​ធ្វើ​ឲ្យ​ការ​រីក​ចម្រើន​របស់​សេដ្ឋកិច្ច​ពុំ​មាន​សុខភាព​ដែរ។

អ្នកឧកញ៉ា គិត ម៉េង ប្រធានក្រុមហ៊ុន Royal Group។
អ្នកឧកញ៉ា គិត ម៉េង ប្រធានក្រុមហ៊ុន Royal Group។ ហេង ជីវ័ន

យោង​តាម​តួលេខ​ដែល​បាន​ចេញ​ផ្សាយ​ជា​សាធារណៈ​នា​ពេល​ថ្មីៗ​នេះ​បាន​ឲ្យ​ដឹង​ថា គិត​ចាប់​ពី ឆ្នាំ​១៩៩៤ រហូត​មក​ត្រឹម ខែ​កុម្ភៈ ឆ្នាំ​២០១៤ បាន​បង្ហាញ​ឲ្យ​ដឹង​ថា ប្រទេស​ដែល​មាន​ចំនួន​ប្រជាជន​ប្រមាណ​ជា​ជាង ១៥ លាន​នាក់ មាន​ចំនួន​សេដ្ឋី​ឬ​ម្យ៉ាង​ទៀត​ថា ឧកញ៉ា​ដល់​ទៅ ៧០៤ នាក់។

ចំនួន​នេះ​ប្រសិន​បើ​យើង​ក្រឡេក​ទៅ​មើល​ប្រទេស​ដែល​មាន​សេដ្ឋកិច្ច​ធំៗ​និង​មាន​ប្រជា​ពលរដ្ឋ​រាប់​រយ​លាន​នាក់​ឯ​ណោះ​វិញ ដូច​ជា ប្រទេស​ចិន មាន​ចំនួន​សេដ្ឋី​ត្រឹម​តែ​ជាង ២ លាន​នាក់​សហរដ្ឋ​អាមេរិក​មាន​ចំនួន​ជាង ៧ លាន​នាក់ ប្រទេស​ជប៉ុន មាន​ជាង ១ លាន​អាល្លឺម៉ង់​មាន​ជិត ៣ ម៉ឺន​នាក់ ប្រទេស​រុស្ស៊ី មាន​ជាង ២ ពាន់ ប្រទស​អូស្រ្តាលី មាន​ជិត ២ ពាន់​និង​ឥណ្ឌា​មាន​ជិត ២ ពាន់​នាក់​យោង​តាម​ទស្សនាវដ្តី Forbe ផ្សាយ​នៅ ឆ្នាំ​២០១៣។

ទោះ​ជា​យ៉ាង​ណា​របាយ​ការណ៍​ដដែល​នេះ​ពុំ​បាន​បញ្ជាក់​ថា តើ​រាល់​បណ្តា​ទ្រព្យ​របស់​ពួក​ឧកញ៉ា​ទាំង​នោះ​មាន​ប្រាក់​ចំនួន​ប៉ុន្មាន​នោះ​ទេ ហើយ​ក្នុង​នោះ​ក៏​មាន​មន្រ្តី​រាជ​រដ្ឋាភិបាល​មួយ​ចំនួន​ក៏​ទទួល​បាន​ងារ​ជា​ឧកញ៉ា​នេះ​ដែរ។

សំណួរ​ត្រង់​ថា តើ​ការ​កើន​ឡើង​នៃ​ចំនួន​សេដ្ឋី​នៅ​ស្រុក​ខ្មែរ​នា​ពេល​បច្ចុប្បន្ន​នេះ​បាន​ចូល​រួម​ចំណែក​ដល់​កម្រិត​ណា​ដែរ​ដល់​សេដ្ឋកិច្ច​ជាតិ?

ឧកញ៉ា ពុង ឃាវសែ ប្រធានធនាគារ Canadia និង ក្រុមហ៊ុន OCIC ដែលអភិវឌ្ឍន៍កោះពេជ្រ។
ឧកញ៉ា ពុង ឃាវសែ ប្រធានធនាគារ Canadia និង ក្រុមហ៊ុន OCIC ដែលអភិវឌ្ឍន៍កោះពេជ្រ។ ហេង ជីវ័ន

ក៏​ដូច​ជា​បាន​បង្កើត​ការងារ​ប៉ុន្មាន​ដែរ?​ហើយ​តើ​ការ​វិនិយោគ​និង​ការ​រកស៊ី​របស់​ពួក​គេ​ទាំង​អស់​នោះ​មាន​ការ​ប្រកួត​ប្រជែង​ដោយ​ស្មើ​ភាព​គ្នា​ឬ​ទេ?​តើ​មន្រ្តី​ដែល​ជា​អ្នក​បង្កើត និង​អនុវត្ត​គោល​នយោបាយ​ជាតិ​ដែល​មាន​ងារ​នេះ​អាច​នឹង​បង្ក​ឲ្យ​មាន​បញ្ហា​យ៉ាង​ណា​ខ្លះ​ដែរ រវាង​តួនាទី​ជា​មន្រ្តី​របស់​រដ្ឋាភិបាល និង​ងារ​ជា​ឧកញ៉ា​នោះ?

ក្រុម​អ្នក​វិភាគ​បាន​លើក​ឡើង​ថា វា​ហាក់​ដូច​ជា​មាន​ផល​អវិជ្ជមាន​ជា​ជាង​វិជ្ជមាន។ ដោយ​ថា កាល​ណា​មន្រ្តី​របស់​រដ្ឋាភិបាល​ដែល​មាន​ងារ​ជា​ឧកញ៉ា​នេះ​គឺ​ពិត​ជា​បង្ក​ឲ្យ​មាន​ជម្លោះ​ផល​ប្រយោជន៍​និង​អំពើ​ពុក​រលួយ។

លោក កែម ឡី ដែល​ជា​អ្នក​ស្រាវជ្រាវ​បញ្ហា​សង្គម​បាន​លើក​ឡើង​ថា ការ​កើន​ឡើង​នៃ​ចំនួន​ឧកញ៉ា​នេះ​ស​បញ្ជាក់​ឲ្យ​ឃើញ​ការ​ចង់​ប្រើ​ប្រាស់​ងារ​នេះ​ដើម្បី​មុខ​ជំនួញ​រក​ស៊ី​និង​ដើម្បី​ចង់​ប្រើ​អំណាច​កេង​ចំណេញ​លើ​អ្នក​ជំនួញ​និង​ប្រជា​ពលរដ្ឋ​ស្លូត​ត្រង់។

លោក​បាន​លើក​ឡើង​ថា៖ «ធម្មតា​ប្រសិន​បើ​យើង​ចង់​បាន​ងារ​ជា​ឧកញ៉ា​គឺ​គេ​តម្រូវ​ឲ្យ​បង់​លុយ​ជា​សាច់​ប្រាក់​សុទ្ធ​ឬ​ជា​សម្ភារ​ឬ​អាច​ជា​ជំនួយ ហើយ​ជំនួយ​អ៊ីចឹងៗ​គឺ​ភាគ​ច្រើន​ត្រូវ​បាន​គេ​យក​ទៅ​បម្រើ​ផល​ប្រយោជន៍​នយោបាយ។ ដូច​យើង​ឃើញ ពេល​មាន​ពិធិ​សម្ពោធ​អ្វី​មួយ​គឺ​រដ្ឋ​ឲ្យ​ជួយ​ធ្វើ​ប្រឡាយ​ឬ​អ្វី​មួយ ដូច្នេះ​រូបភាព​នេះ​គឺ​គេ​យក​ទៅ​បម្រើ​នយោបាយ​ឬ​បក្ស​ច្រើន​ជាង»។

ឧកញ៉ា ស៊ី គង់​ទ្រីវ ប្រធានក្រុមហ៊ុន British AmericanTobacco (Cambodia) ។
ឧកញ៉ា ស៊ី គង់​ទ្រីវ ប្រធានក្រុមហ៊ុន British AmericanTobacco (Cambodia) ។ ហេង ជីវ័ន

«រឿង ទី២ ការណ៍​ដែល​គេ​ខិតខំ​យក​ងារ​នេះ​ភាគ​ច្រើន​គឺ​គេ​យក​ទៅ​រក​ស៊ី​ធ្វើ​ជំនួញ​កាល​ពី ឆ្នាំ​១៩៩៤ មក​គឺ​យើង​ច្រើន​តែ​យក​ងារ​ហ្នឹង​ទៅ​ប្រើ​ប្រាស់​អំណាច​ដោយ​យក​ងារ​ហ្នឹង​ទៅ​រក​ស៊ី​ប្រកួត​ប្រជែង​មិន​ស្មើ​ភាព​ជាមួយ​អ្នក​ដែល​អត់​មាន​ងារ​ហើយ​ភាគ​ច្រើន​គេ​តែង​តែ​មាន​ទំនាក់​ទំនង​ជាមួយ​មន្រ្តី​រដ្ឋាភិបាល​ដូច្នេះ​បាន​ជា​យើង​ឃើញ​មាន​របាយ​ការណ៍​ជា​ច្រើន​បង្ហាញ​អំពី​ការ​រំលោភ​ដី​ធ្លី​ដោយ​មាន​ឧកញ៉ា​មួយ​ចំនួន​យក​ងារ​នេះ​ទៅ​ប្រើ​ប្រាស់​ជា​ប្រយោជន៍»។

“រឿង ទី៣ ដែល​សំខាន់​គឺ​ការ​ដឹក​នាំ​ប្រទេស​មួយ​កាល​ពី​មុន គឺ​គេ​ប្រើ​គំនិត​បញ្ញា​គឺ​ចេញ​មក​ពី​អ្នក​ដែល​មាន​បទ​ពិសោធ​ដូច​ជា កាល​ពី​សម័យ សីហនុ សម័យ លន់ នល់ សម័យ ប៉ុល ពត ជាដើម។ល។ តែ​ដល់​ក្រោយ​មក​នេះ​សម័យ​បច្ចុប្បន្ន​នេះ​គឺ​ខ្ញុំ​ហាក់​ដូច​ជា​មិន​សូវ​ឃើញ​មាន​ការ​ប្រើ​ប្រាស់​បញ្ញា​ចេះ​ដឹង​តែ​បែរ​ជា​ប្រើ​ប្រាស់​បញ្ញា​ឧកញ៉ា​ដើម្បី​រក​ស៊ី​មាន​បាន ដូច្នេះ​គាត់​មាន​ឥទ្ធិពល​លើ​សេចក្តី​សម្រេច​ចិត្ត​របស់​រដ្ឋាភិបាល។ ដូច្នេះ​នៅ​ពេល​ដែល​ពួក​គេ​មាន​ឥទ្ធិពល​បែប​នេះ​នឹង​ធ្វើ​ឲ្យ​គោល​នយោបាយ​ច្បាប់ កិច្ចការ​របស់​ប្រទេស វា​បែរ​ជា​មាន​ការ​គាំទ្រ​តែ​ទៅ​លើ​ពួក​អ្នក​មាន ព្រោះ​អី​ពួក​ឧកញ៉ា​ហ្នឹង ទៅ​យក​មាត្រា​គោល​ការណ៍​ហ្នឹង​ទៅ​រក​ស៊ី។ អ៊ីចឹង​ហើយ​បាន​ជា​ប្រទេស​យើង​វា​ហៀប​នឹង​ក្រឡាប់​ចាក់​ក្រោយ​ពី ឆ្នាំ​២០០០ វា​ដល់​ដំណាក់​កាល​មួយ​ដែល​អ្នក​នយោបាយ​ធំៗ​លែង​ប្រើ​ប្រាស់​បញ្ញា​បញ្ញវន្ត គឺ​ប្រើ​បញ្ញា​អ្នក​ជំនួញ ដូច្នេះ​កាល​ណា​អ្នក​ជំនួញ​គឺ​ត្រូវ​ការ​ចំណេញ ”នេះ​បើ​តាម​ការ​លើក​ឡើង​របស់​លោក កែម ឡី។

“ខ្ញុំ​និយាយ​ដូច្នេះ​មិន​មែន​ឧកញ៉ា​ទាំង​អស់​សុទ្ធ​តែ​ប្រព្រឹត្ត​ដូច្នោះ​នោះ​ទេ ក៏​មាន​មួយ​ចំនួន​នោះ​គឺ​គាត់​មាន​ក្រុម​ហ៊ុន​ធំៗ​ហើយ​បាន​ផ្តល់​ការងារ​យ៉ាង​ច្រើន​ផង​ដែរ​ដូចជា លោក ឧកញ៉ា ម៉ុង ឫទ្ធី គាត់​មាន​ចម្ការ​ដូង​ប្រេង ចិញ្ចឹម​សត្វ​ពាហនៈ គឺ​គាត់​បាន​ផ្តល់​ការងារ​យ៉ាង​ច្រើន​ដល់​ប្រជា​ពលរដ្ឋ​យើង។

ឧកញ៉ា សុខ គង់ ប្រធានក្រុមហ៊ុន Sokimex Group។
ឧកញ៉ា សុខ គង់ ប្រធានក្រុមហ៊ុន Sokimex Group។ ហេង ជីវ័ន

លោក ព្រាប កុល ប្រធាន​អង្គការ​តម្លាភាព​អន្តរជាតិ​កម្ពុជា​បាន​លើក​ឡើង​ដែរ​ថា បញ្ហា​នេះ វា​ឆ្លុះ​បញ្ចាំង​ឲ្យ​ឃើញ​ថា នៅ​ក្នុង​ប្រទេស​ដែល​មាន​ប្រជាជន​ប្រមាណ​ជា ២០ ភាគ​រយ​រស់​នៅ​ក្រោម​បន្ទាត់​ភាព​ក្រី​ក្រ តែ​បែរ​ជា មាន​អ្នក​ដែល​មាន​ងារ​ជា​ឧកញ៉ា​ឬ​អ្នក​មាន​លុយ​ច្រើន​វា​ជា​មុខ​សញ្ញា​មួយ​ដែល​ឆ្លុះ​បញ្ចាំង​ពី​គម្លាត​រវាង​អ្នក​មាន និង​អ្នក​ក្រ។

លោក​បាន​ថ្លែង​ថា៖ «តាម​ដែល​យើង​ដឹង​ថា មាន​ឧកញ៉ា​មួយ​ចំនួន​ព្យាយាម​ប្រើ​ប្រាស់​មុខ​ងារ​របស់​គាត់​និង​ទំនាក់​ទំនង​ដែល​គាត់​មាន​ជាមួយ​នឹង​អ្នក​មាន​អំណាច​ទៅ​ប្រកប​មុខ​របរ​រំលោភ​ដី​ធ្លី ប៉ះពាល់​ដល់​ទ្រព្យ​សម្បត្តិ​ប្រជា​ពលរដ្ឋ ឬ​ក៏​រក​ស៊ី​មុខ​របរ​ដែល​ប៉ះពាល់​ដល់​ធនធាន​ធម្មជាតិ​បរិស្ថាន»។

យោង​តាម​កម្រង​សៀវភៅ​ព្រះ​រាជក្រឹត្យ​ចុះ​ថ្ងៃ ទី​៥ ខែ​មេសា ឆ្នាំ​១៩៩៤ គឺ​មាន “សប្បុរសជន​ដែល​បាន​ធ្វើ​អំណោយ​ជូន​រដ្ឋ​ជា​ថវិកា​ឬ​សម្ភារ​មាន​តម្លៃ​លើស​ពី ១០ ម៉ឺន​ដុល្លារ​អាមេរិក​ឡើង​ទៅ​នឹង​ត្រូវ​បាន​មេដាយ​ស្ថាបនា​ជាតិ​ថ្នាក់​លេខ ១ និង​ត្រូវ​រាជ​រដ្ឋាភិបាល​ស្នើ​សុំ​ព្រះ​រាជ​យោបល់​ដើម្បី​ទ្រង់​ព្រះ​រាជទាន​គោរម្យ​ងារ​ជា​ឧកញ៉ា។

លោក ព្រាប កុល ពន្យល់​ថា ពុំ​ដែល​មាន​របាយ​ការណ៍​ជាក់​លាក់​ណា​មួយ​ឲ្យ​ដឹង​អំពី​ចំណូល​រដ្ឋ​ដែល​បាន​មក​ពី​ការ​ចូល​រួម​របស់​ឧកញ៉ា​ទាំង​នេះ​ឡើយ។ «វា​គ្មាន​តម្លាភាព​ចំពោះ​លុយ​ដែល​ពួក​គាត់​ឲ្យ​ហ្នឹង​យក​ទៅ​ធ្វើ​អ្វី​ខ្លះ មាន​ចុះ​បញ្ជី​សារពើពន្ធ​ឬ​ក៏​មាន​របាយ​ការណ៍​ខ្ទង់​ចំណាយ​ចំណូល​ឲ្យ​ច្បាស់​លាស់​នោះ​ទេ។ វា​ហាក់​ដូច​ជា​មិន​មាន​ព័ត៌មាន​ជា​សាធារណៈ យើង​ចង់​ដឹង​ពី​រឿង​ទាំង​នោះ​គឺ​គ្មាន ហើយ​យើង​ក៏​មិន​ដឹង​ថា អ្នក​ខ្លះ​គាត់​ពិត​ជា​ចំណាយ​លុយ​ពិត​ឬ​យ៉ាង​ណា?»។

ឧកញ៉ា លឹម ឈីវហូ ប្រធានក្រុមហ៊ុន Attwood។
ឧកញ៉ា លឹម ឈីវហូ ប្រធានក្រុមហ៊ុន Attwood។ ហេង ជីវ័ន

បើ​យោង​តាម​របាយ​ការណ៍​ដដែល​បាន​ឲ្យ​ដឹង​ថា លោក ចម ប្រសិទ្ធ ដែល​ជា​អតីត​រដ្ឋ​មន្រ្តី​ក្រសួង​ពាណិជ្ជកម្ម និង​បច្ចុប្បន្ន​ជា​រដ្ឋ​មន្រ្តី​ក្រសួង​ឧស្សាហកម្ម និង​សិប្បកម្ម ហើយ​ភរិយា​របស់​លោក​រដ្ឋ​មន្រ្តី​រូប​នេះ​ក៏​ទទួល​បាន​ងារ​នេះ​ផង​ដែរ ចំណែក​ឯ​រដ្ឋ​មន្រ្តី​ក្រសួង​មហាផ្ទៃ លោក ស ខេង ក៏​មាន​ងារ​នេះ​ដែរ និង​មាន​មន្រ្តី​រដ្ឋាភិបាល​ជា​ច្រើន​ទៀត​ផង​ដែរ។

លោក កែម ឡី បាន​លើក​ឡើង​ថា ការណ៍​នេះ​នឹង​បង្ក​ឲ្យ​មាន​ជម្លោះ​ផល​ប្រយោជន៍​ដល់​សង្គម។

«កាល​ពី​ដប់​ឆ្នាំ​មុន​កូនៗ​របស់​គាត់​មិន​ទាន់​ចេញ​រក​ស៊ី​ទេ ដូច​ជា​កូន សុខ អាន កូន ហ៊ុន សែន កាល​ពី​ដប់​ម្ភៃ​ឆ្នាំ​មុន​គាត់​នៅ​តូចៗ​នៅ​រៀន ដូច្នេះ​ដល់​ពេល​គាត់​ចេញ​រក​ស៊ី គឺ​គាត់​មាន​ទំនាក់​ទំនង​ជា​មួយ​ពួក​ឧកញ៉ា​ទាំង​អស់​ហ្នឹង ដូច្នេះ​ដល់​តែ​មាន​ទំនាក់​ទំនង​ទៅ​វា​ធ្វើ​ឲ្យ​ទៅ​ជា​មាន​ព្យុះ​មាន​ភ្លៀង​ផ្គរ​ខ្លាំង​នៅ​ក្នុង​ស្រុក​យើង​អ៊ីចឹង។ ដូច្នេះ​អាហ្នឹង​ពេល​ខ្លះ​យើង​មើល​ទៅ​ឃើញ​អវិជ្ជមាន​ច្រើន​ជាង​វិជ្ជមាន» នេះ​បើ​យោង​តាម​លោក កែម ឡី។

ត្រឹម​ត្រូវ​ហើយ​នៅ​ក្នុង​លក្ខន្តិកៈ​មន្រ្តី​រាជការ​ស៊ីវិល​គឺ​មន្រ្តី​រដ្ឋាភិបាល​មិន​ត្រូវ​អនុញ្ញាត​ឲ្យ​ធ្វើ​ជំនួញ​ទេ បើ​ធ្វើ​ជំនួញ​គឺ​ត្រូវ​លាលែង​ពី​មន្រ្តី​រដ្ឋាភិបាល​តែ​ឥឡូវ​នេះ វា​ហាក់​ដូច​ជា ច្របូក​ច្របល់​ហើយ តែ​គ្រាន់​តែ​គាត់​មិន​ធ្វើ​ខ្លួន​ឯង​ទេ​គឺ​គាត់​ដាក់​ប្រពន្ធ​ឬ​កូន​ជាដើម ហើយ​នេះ​វា​អាច​បណ្តាល​ឲ្យ​មាន​ភាព​ក្រឡាប់​ចាក់។

គំនរឈើប្រណីតរបស់លោក ឧកញ៉ា ទ្រី​ ភាព នៅក្នុងខេត្តរតនគិរី។
គំនរឈើប្រណីតរបស់លោក ឧកញ៉ា ទ្រី​ ភាព នៅក្នុងខេត្តរតនគិរី។ ហេង ជីវ័ន

ចំណែក​ឯ​លោក ព្រាប កុល ថ្លែង​ថា៖ «មន្រ្តី​រដ្ឋាភិបាល​ដែល​មាន​ងារ​នេះ គឺ​ពិត​ជា​មាន​ទំនាស់​ផល​ប្រយោជន៍​បើ​សិន​ជា​យើង​យក​រូបភាព​អំពើ​ពុក​រលួយ​មក​ធ្វើ​ការ​វិភាគ​ទំនាស់​ផល​ប្រយោជន៍​ក៏​ជា​ទម្រង់​នៃ​អំពើ​ពុក​រលួយ​ដែរ។ ដូច្នេះ​វា​នឹង​ធ្វើ​ឲ្យ​សង្គម​របស់​យើង​វា​មិន​មាន​តម្លាភាព វា​មិន​មាន​តុល្យភាព​នៃ​សិទ្ធិ​និង​ឱកាស​នៃ​អ្នក​មាន មាន​មធ្យម និង​អ្នក​ក្រ អ្នក​មាន​អំណាច មាន​តួនាទី​សាធារណៈ និង​គាត់​មាន​មុខ​ងារ​ជា​អ្នក​ជំនួញ​ទៀត ដូច្នេះ​ឱកាស​នៃ​ការ​រក​ស៊ី​របស់​គាត់​មាន​ច្រើន ជួន​កាល​ទៅ​គាត់​ទៅ​រក​ស៊ី​ផ្តាច់​មុខ​គាត់​ទៅ​ផ្តួល​មុខ​ជំនួញ​របស់​អ្នក​ផ្សេង​ទៀត​ដែល​គាត់​គ្មាន​អំណាច​នោះ​ក៏​មាន ពេល​ខ្លះ​គាត់​អាច​ឃុប​ឃិត​រួច​ពន្ធ ដូច្នេះ​គឺ​វា​មាន​ភាព​អយុត្តិធម៌​ច្រើន។ នេះ​ជា​បញ្ហា​មួយ​ដែល​យើង​សង្កេត​ឃើញ​មាន​នៅ​កម្ពុជា»។

បើ​យោង​តាម​លោក សុន ឆ័យ មន្រ្តី​ជាន់​ខ្ពស់​របស់​គណបក្ស​សង្គ្រោះ​ជាតិ​ធ្លាប់​បាន​ប្រាប់​ឲ្យ​ដឹង​ថា កម្ពុជា បាត់​បង់​ថវិកា​ជិត ១ ពាន់​លាន​ដុល្លារ​ក្នុង​មួយ​ឆ្នាំៗ​ទៅ​លើ​អំពើ​ពុក​រលួយ​ដោយ​សារ​ការ​ឃុប​ឃិត​ពី​សំណាក់​មន្រ្តី​ជាមួយ​នឹង​ក្រុម​ហ៊ុន​ធំៗ​ដែល​មិន​បាន​បង់​ពន្ធ​ជូន​ជាតិ៕

អត្ថបទគួរចាប់អារម្មណ៍