The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ​សំណង់​កម្ពុជា​ម្នាក់​ទៀត​ស្លាប់​នៅ​ថៃ

កម្មករ​សំណង់​កម្ពុជា​ម្នាក់​ទៀត​ស្លាប់​នៅ​ថៃ

កម្មករ​សំណង់​កម្ពុជា​ម្នាក់​ទៀត​ស្លាប់​នៅ​ថៃ

កម្មករ សំណង់​កម្ពុជា​ម្នាក់ បាន​ធ្លាក់​ពី​ជាន់​ទី ៤ នៅ​ការដ្ឋាន​សំណង់ ដែល​គាត់​ធ្វើការ នៅ​ភាគ​ខាង​ត្បូង​ប្រទេស​ថៃ កាលពី​ថ្ងៃ​អង្គារ ហើយ​បាន​ស្លាប់​ដោយសារ​របួស នៅ​ថ្ងៃ​បន្ទាប់​។ ការ​ស្លាប់​របស់​គាត់ គឺជា​ករណី​ថ្មី​បំផុត​មួយ​នៃ​គ្រោះថ្នាក់​នៅ​ការដ្ឋាន​សំណង់​នៅក្នុង​ប្រទេស​ថៃ នៅ​ឆ្នាំ​នេះ ខណៈ​ដែល​កាលពី​ខែ​សីហា​បាន​ស្លាប់ ៣ នាក់​។

បើ​យោង​តាម​លោក នេត សេរី អគ្គកុងស៊ុល​កម្ពុជា បាន​ឲ្យ​ដឹង​ថា លោក កាំង ឃី អាយុ ២៧ ឆ្នាំ គឺជា​ពលករ​ចំណាក​ស្រុក​ស្រប​ច្បាប់​ម្នាក់ នៅ​គម្រោង​សាងសង់​មួយ​នៅ​ខេត្ត​ចន្ទប៊ូរី ខាង​ត្បូង​ទីក្រុង​បាងកក នៅពេល​កើត​ហេតុ​នោះ។ លោក សេរី បន្ត​ថា៖ «​គាត់​រអិល​ពី​អគារ ហើយ​ធ្លាក់​មក​លើ​ដី។ គាត់​រងរបួស​ធ្ងន់ ហើយ​បាន​បញ្ជូន​ទៅ​មន្ទីរពេទ្យ​ក្នុង​ខេត្ត ប៉ុន្តែ បាន​ស្លាប់​នៅពេល​ក្រោយមក​»។

សព​របស់​លោក ឃី ត្រូវ​បាន​បញ្ជូន​មក​ក្រុម​គ្រួសារ​នៅក្នុង​ខេត្ត​បន្ទាយមានជ័យ កាលពី​យប់​ថ្ងៃ​ពុធ។ លោក កុយ គួង អ្នក​នាំពាក្យ​ក្រសួង​ការបរទេស​បាន​ថ្លែង​ថា៖ «​និយោជក​បាន​បង់​ថ្លៃ​ធ្វើ​បុណ្យ​ប្រហែល ៥ ពាន់​បាត រួច​ហើយ។ បន្ទាប់ពី​បុណ្យសព គ្រួសារ​នឹង​ទៅ​ថៃ ហើយ​ធ្វើការ​ជាមួយ​នឹង​កុងស៊ុល​ដើម្បី​ដាក់​បណ្តឹង​ទាមទារ​សំណង​»​។

ទាំង​លោក គួង និង​លោក សេរី មិន​អាច​ផ្តល់​ឈ្មោះ​ក្រុមហ៊ុន​សាងសង់ ដែល​ជួល​លោក ឃី ឲ្យ​ធ្វើការ​នោះ​ទេ។ ឧស្សាហកម្ម​សំណង់​ដែល​កំពុង​រីកចម្រើន ក្នុង​ប្រទេស​ថៃ ដែល​ជួល​សុទ្ធតែ​ពលករ​ចំណាកស្រុក​បរទេស គឺ​ងាយ​មាន​គ្រោះថ្នាក់​ណាស់​។ ក្នុង​ឆ្នាំ ២០១១ មាន​គ្រោះថ្នាក់​ការងារ​ចំនួន​១០៦១៩ ករណី ដែល​ករណី​មួយ​ចំនួន​បាន​បណ្តាល​ឲ្យ​បាត់បង់​ជីវិត​។ នេះ​បើ​យោងតាម​តួលេខ​របស់​រដ្ឋាភិបាល​ថៃ។

លោក មឿន តុលា ប្រធាន​កម្មវិធី​ការងារ នៅ​មជ្ឈមណ្ឌល​អប់រំ​ច្បាប់​សម្រាប់​សហគមន៍ បាន​ថ្លែង​ថា៖ «​មាន​បទដ្ឋាន​ល្អ និង​លក្ខខណ្ឌ​សុវត្ថិភាព​លើ​ក្រដាស ប៉ុន្តែ ជា​រឿយៗ​ពលករ​ចំណាកស្រុក​កម្ពុជា​រងរបួស»។

ក្រុម​សិទិ្ធមនុស្ស​ថៃ​បាន​លើក​មូលហេតុ​ថា ដោយសារ​កង្វះ​នៃ​ការ​ត្រួតពិនិត្យ បណ្តាល​ឲ្យ​មាន​អត្រា​គ្រោះថ្នាក់​ខ្ពស់ ដូចជា នៅ​ខែ​សីហា នៅពេល​អគារ​ ៦ ជាន់ បាក់ស្រុត និង​សម្លាប់​ពលករ​កម្ពុជា​ដែល​គ្មាន​ឯកសារ​ចំនួន​បី​នាក់​។

គ្រួសារ​ពលករ​បាន​ទទួល​ប្រាក់​ត្រឹមតែ​ពី​១៥៥ ទៅ​២០០ ដុល្លារ​ប៉ុណ្ណោះ ដើម្បី​បង់​ធ្វើ​បុណ្យសព ប៉ុន្តែ​គ្មាន​សំណង​បន្ថែម​ទៀត​ទេ។ គេ​រាយការណ៍​ថា កម្មករ​ថៃ ដែល​ស្លាប់​ដោយសារ​គ្រោះថ្នាក់​ការងារ​បាន​ទទួល​ប្រាក់​បន្ថែម​ចំនួន ៥៥០០០ (១៦៧៦) បាត ពី​ក្រុមហ៊ុន​។ លោក តុលា បាន​បន្ថែម​ថា៖ «ក្រុមហ៊ុន​សំណង់​ត្រូវ​តែ​ទទួល​ខុសត្រូវ​ចំពោះ​គ្រោះថ្នាក់​ដែល​កើតឡើង​មកលើ​ពលករ​ចំណាកស្រុក​ទាំងអស់ ទោះ​មាន​ឯកសារ ឬ​គ្មាន​ឯកសារ កម្មករ​នៅ​តែ​ជា​មនុស្ស​»៕

អត្ថបទគួរចាប់អារម្មណ៍