The Phnom Penh Post Search

Search form

Logo of Phnom Penh Post newspaper Phnom Penh Post - ក្រុមហ៊ុន​ក្នុង​ស្រុក​បោះទុន​រួម​គ្នា​២៥​លានដុល្លារ​ក្នុង​ការ​ចែកចាយ​ឧបករណ៍​អគ្គិសនី

ក្រុមហ៊ុន​ក្នុង​ស្រុក​បោះទុន​រួម​គ្នា​២៥​លានដុល្លារ​ក្នុង​ការ​ចែកចាយ​ឧបករណ៍​អគ្គិសនី

បុគ្គលិក​របស់​អគ្គិសនី​កម្ពុជា​កំពុង​ឡើង​មើល​បណ្តាញ​ខែ្សភ្លើង​ក្នុង​រាជធានី​ភ្នំពេញ​នា​ពេល​កន្លងមក។
បុគ្គលិក​របស់​អគ្គិសនី​កម្ពុជា​កំពុង​ឡើង​មើល​បណ្តាញ​ខែ្សភ្លើង​ក្នុង​រាជធានី​ភ្នំពេញ​នា​ពេល​កន្លងមក។ ហេង ជីវ័ន

ក្រុមហ៊ុន​ក្នុង​ស្រុក​បោះទុន​រួម​គ្នា​២៥​លានដុល្លារ​ក្នុង​ការ​ចែកចាយ​ឧបករណ៍​អគ្គិសនី

ក្រុមហ៊ុន វីសាន់ឌី​វើឡុបមេន​អេឡិច​ទ្រីស៊ីធី​ខូអិលធីឌី​ដែល​ជា​ក្រុមហ៊ុន​ក្នុង​ស្រុក​បាន​ចាប់​ដៃគូ​វិនិយោគ​រួម​គ្នា​ជាមួយ​នឹង​ក្រុមហ៊ុន យ៉ាង​គ័ង របស់​ចិន​ក្នុង​ទឹកប្រាក់​វិនិយោគ​ប្រមាណ​ជា​២៥​លាន​ដុល្លារអាមេរិក​ក្នុង​ការ​ចែកចាយ​បរិក្ខារ​ថាមពល អគ្គិសនី និង​ស្ថាបត្យកម្ម​អគ្គិសនី​នៅ​កម្ពុជា និង​ធ្វើ​ជា​ច្រក​ចែកចាយ​នាំ​ចេញ​ទៅកាន់​ប្រទេស​មួយ​ចំនួន​ទៀត​ក្នុង​តំបន់​។

លោក សេង សាវី ប្រធាន​ក្រុមហ៊ុន​វីសាន់ឌី​វើឡុបមេន​អេឡិច​ទ្រីស៊ីធី​ខូអិលធីឌី បាន​មាន​ប្រសាសន៍​ក្នុង​ពិធី​សម្ពោធ​ជា​ផ្លូវការ​កាលពី​ថ្ងៃ​ព្រហស្បតិ៍​សប្តាហ៍​នេះ​ថា ការ​សម្រេចចិត្ត​វិនិយោគ​របស់​ចិន​នេះ​ជា​លើក​ដំបូង​ហើយ​ក្នុង​ការ​សហការ​ជាមួយ​ក្រុមហ៊ុន​ក្នុង​ស្រុក​របស់​កម្ពុជា​ធ្វើ​ជា​ស្នាក់ការ​កណ្តាល​សម្រាប់​ចែកចាយ​ផលិតផល​បរិក្ខារ​អគ្គិសនី​ក្នុង​ស្រុក និង​ចែកចាយ​បន្ត​ទៅក្នុង​តំបន់​។

លោក​បាន​បន្ត​ថា​«​ការ​ចែកចាយ​ផលិត ដែល​នាំ​ចូល​មកពី​ប្រទេស​ចិន​នេះ​គឺ​ក្រុមហ៊ុន​វីសាន់ឌី​វើឡុបមេន​អេឡិច​ទ្រីស៊ីធី​ខូអិលធីឌី​បាន​សហការ​ជាមួយ​ក្រុមហ៊ុន​យ៉ាងគ័ង ប្រទេស​ចិន​ដោយ​ជំហាន​ដំបូង​ប្រើប្រាស់​ទុនវិនិយោគ​ប្រមាណ​ ២៥​ លាន​ដុល្លារ​»។

«​មូលហេតុ​ដែល​នាំឲ្យ​លោក​ក៏ដូចជា​ក្រុមហ៊ុន យ៉ាងគ័ង​បោះទុន​វិនិយោគ​លើ​វិស័យ ថាមពល​អគ្គិសនី​នៅ​កម្ពុជា​នេះ​គឺ​ដោយសារ​តែ​បច្ចុប្បន្ន​នេះ​ប្រទេស​កម្ពុជា​មាន​តម្រូវការ​ខ្ពស់​លើ​វិស័យ​នេះ​ទើប​យើង​សម្រេច​ធ្វើការ​នាំចូល​ផលិតផល​ពី​ប្រទេស​ចិន​មក​លក់​នៅ​កម្ពុជា​ដើម្បី​ផ្តល់​នូវ​បច្ចេកវិទ្យា​ទំនើប​ដែល​មាន​គុណភាព​អាច​កែច្នៃ​ឲ្យ​ស៊ីភ្លើង​តិច​និង​តម្លៃ​ថោក​សមរម្យ​ដែល​មាន​គុណភាព​តាម​បទដ្ឋាន​ត្រឹមត្រូវ​»។ នេះ​បើ​យោងតាម​ការ​លើក​ឡើង​របស់​លោក សេង សាវី​។

លោក ឃួង ស្រេង អភិបាលរង​រាជធានី​ភ្នំពេញ​បាន​ថ្លែង​ក្នុង​ពិធី​នោះ​ថា រដ្ឋាភិបាល​មាន​ការ​គាំទ្រ​ឲ្យ​មាន​អ្នក​វិនិយោគ​ក្នុង​ការ​ចូលរួម​អភិវឌ្ឍវិស័យ​អគ្គិសនី​នៅ​កម្ពុជា​។

លោក​បាន​ថ្លែង​ថា​«​ការ​បើក​សម្ពោធ​ដាក់​ឲ្យ​ប្រើប្រាស់​ជា​ផ្លូវការ ក្រុមហ៊ុន​វីសាន់ ឌីវើឡុបមេន មិន​ត្រឹម​តែ​ជា​សក្ខីភាព​បញ្ជាក់​ឲ្យ​ឃើញ​អំពី​ការ​ចូលរួម និង​គាំទ្រ​ចំពោះ​កិច្ចសហការ​ធ្វើ​អាជីវកម្ម​រវាង​ពាណិជ្ជករ​កម្ពុជា និង​ពាណិជ្ជករ​ចិន​ប៉ុណ្ណោះ​ទេ ប៉ុន្តែ​ថែម​ទាំង​បាន​ឆ្លុះបញ្ចាំង​ឲ្យ​ឃើញ​នូវ​ភាព​ជោគជ័យ​ថ្មី​មួយ​ទៀត ដែល​កម្ពុជា​បាន​ខិតខំ​ទាក់ទាញ​វិនិយោគិន​ទាំង​ក្នុង និង​ក្រៅ​ប្រទេស​ក្នុង​ការ​បណ្តាក់ទុន​ធ្វើ​អាជីវកម្ម​នៅ​កម្ពុជា​»។

លោក​ស្រេង​បាន​ថ្លែង​បន្ត​ទៀត​ថា​« ក្រុមហ៊ុន​វីសាន់ មាន​កម្មវត្ថុ​នៃ​ការ​ធ្វើ​ពាណិជ្ជកម្ម​បម្រើ​ដល់​វិស័យ​ថាមពល​អគ្គិសនី បរិក្ខារអគ្គិសនី សំណង់​អគ្គិសនី និង​គំនិត​ច្នៃប្រឌិត​ថ្មី ដើម្បី​អភិវឌ្ឍលើ​វិស័យ​នេះ​»។

លោក សាវី បាន​មាន​ប្រសាសន៍​ឲ្យ​ដឹង​ទៀត​ថា ក្រុមហ៊ុន​របស់​លោក​ក៏​មាន​មាន​បំណង​ចូលរួម​ចំណែក​ក្នុង​ការ​អភិវឌ្ឍវិស័យ​ថាមពល​អគ្គិសនី​និង​ផ្គត់ផ្គង់​បរិក្ខារ​អគ្គិសនី​ទំនើបៗ ដល់​សហគ្រាស​ធុន​តូច និង​មធ្យម​និង​ប្រជាជន​កម្ពុជា​ប្រកប​ដោយ​គុណភាព​និង​មាន​ភាព​ទាន់សម័យ​នៃ​បច្ចេកវិទ្យា​ចុងក្រោយ​បង្អស់។

លោក សេង សាវី បាន​បន្ត​ទៀត​ថា៖​«​ការ​បង្កើត​ក្រុមហ៊ុន​នេះ​យើង​បាន​សហការ​ជាមួយ​បណ្តា​ក្រុមហ៊ុន​អគ្គិសនី សំណង់​វារីអគ្គិសនី និង​ជាមួយ​រាជរដ្ឋាភិបាល​ក្នុង​ការ​ចែកចាយ​ថាមពល​អគ្គិសនី​ដល់​រដ្ឋ និង​ប្រជាពលរដ្ឋ​ដោយ​យើង​បាន​កំពុង​តែ​ធ្វើ​ទំនាក់ទំនង​នៅ​តាម​បណ្តា​ខេត្ត​មួយ​ចំនួន​ដូចជា ខេត្ត​កំពត កំពង់ចាម ព្រះសីហនុ និង​រាជធានី​ភ្នំពេញ ជាដើម​»​។

លោក ស៊ុយ សែម រដ្ឋមន្រ្តី​ក្រសួង​រ៉ែ និង​ថាមពល​ថ្លែង​កាលពី​ថ្ងៃ​ពុធ​ថា រហូត​មក​ទល់​នឹង​ពេល​នេះ​កម្ពុជា​មាន​សមត្ថភាព​ក្នុង​ការ​ផ្គត់ផ្គង់​ថាមពល​អគ្គិសនី​បាន​៦០​ភាគរយ​នៃ​ភូមិ​ទាំងអស់​ក្នុង​ប្រទេស​កម្ពុជា។

លោក​ថា «ក្នុង​ផែនដី​ខ្មែរ ៦០ ភាគរយ​មាន​ភ្លើងអគ្គិសនី​ដែល បញ្ជូន​ទៅ​តាម​បណ្តាញ ទាំង​ពីរ​គឺ​បណ្តាញ​តង់ស្យុង​ខ្ពស់ បណ្តាញ​រង បណ្តាញ​តង់ស្យុង​មធ្យម​ដល់​បណ្តាញ​ចែកចាយ គឺ​មាន​ភ្លើង​អគ្គិសនី​ទៅ​ទាំងអស់​ហើយ​គ្រប់គ្រាន់​តាម​សេចក្តី​ត្រូវការ​របស់​ប្រជាជន​យើង។ ពី​ឆ្នាំ​នេះ​ទៅ ដល់​ឆ្នាំ​២០១៨ លែង​មាន​ខ្វះ​ភ្លើង​ទៀត​ហើយ»​។

គួរ​រំឭក​ផង​ដែរ​ថា អគ្គិសនី​កម្ពុជា​ក៏​មាន​គម្រោង​ចំណាយ​ប្រាក់​ជាង​២​លាន​ដុល្លារ​សហរដ្ឋអាមេរិក​ក្នុង​ការ​ទិញ​សម្ភារ​បរិក្ខារ​អគ្គិសនី​ដូចជា ខ្សែភ្លើង និង​កុងទរ័​ដើម្បី​តភ្ជាប់​បណ្តាញ​ដល់​បន្ទប់​ជួល​របស់​កម្មករ កម្មការិនី​រោងចក្រ​កាត់ដេរ​។ រដ្ឋាភិបាល​កម្ពុជា​កាលពី​ដើម​សប្តាហ៍​នេះ​ក៏​បាន​ធ្វើការ​អះអាង​ផង​ដែរ​អំពី​ការ​កំណត់អត្រា​ថ្លៃ​ភ្លើង​ថ្មី​ចាប់ពី​ឆ្នាំ​នេះ​រហូត​ដល់​ឆ្នាំ​២០២០ ខណៈ​ដែល​ប្រទេស​កម្ពុជា​កំពុង​ទទួល​បាន​នូវ​ប្រភព​ភ្លើង​បន្ថែម​ទៀត​ពី​ទំនប់​វារីអគ្គិសនី​ផ្សេងៗ៕

អត្ថបទគួរចាប់អារម្មណ៍