The Phnom Penh Post Search

Search form




Logo of Phnom Penh Post newspaper Phnom Penh Post - ចំណូល​ទាប​សម្រាប់​ទីផ្សារ​ការងារ​ក្នុង​ស្រុក​ជា​មូល​ហេតុ​ចម្បង​នៃ​ការ​ធ្វើ​ចំណាក​ស្រុក

ចំណូល​ទាប​សម្រាប់​ទីផ្សារ​ការងារ​ក្នុង​ស្រុក​ជា​មូល​ហេតុ​ចម្បង​នៃ​ការ​ធ្វើ​ចំណាក​ស្រុក

លោក នឹម សាវុធ ជាកម្មករចំណាកស្រុកខុសច្បាប់ក្នុងពេលផ្តល់បទសម្ភាសន៍។
លោក នឹម សាវុធ ជាកម្មករចំណាកស្រុកខុសច្បាប់ក្នុងពេលផ្តល់បទសម្ភាសន៍។ ហេង ជីវ័ន

ចំណូល​ទាប​សម្រាប់​ទីផ្សារ​ការងារ​ក្នុង​ស្រុក​ជា​មូល​ហេតុ​ចម្បង​នៃ​ការ​ធ្វើ​ចំណាក​ស្រុក

ខ្ញុំ​គិត​ជាមួយ​ប្រពន្ធ​ថា ពេល​រក​លុយ​គ្រប់​ត្រឡប់​មក​ស្រុក​វិញ ខ្ញុំ​ទិញ​គោ​ធ្វើ​ស្រែ ឯ​ប្រពន្ធ​ខ្ញុំ​បិទ​ស្រា។​គាត់​ចេះ​បិទ​ស្រា ខ្ញុំ​ចេះ​រៀប​ឥដ្ឋ​សង់​ចង្ក្រាន​ឲ្យ​គាត់​បិទ​ស្រា។ រក​ស៊ី​បន្តិច​បន្តួច​នៅ​ក្នុង​ភូមិ​តែ​ឥឡូវ​គម្រោង​នេះ​រលាយ​អស់​ហើយ»។ នេះ​ជា​សម្តី នឹម សាវុធ ជា​កម្មករ​ចំណាក​ស្រុក​ខុស​ច្បាប់​ម្នាក់​ក្នុង​ចំណោម​រាប់​ម៉ឺន​នាក់​ដែល​ត្រូវ​ទាហាន​ថៃ​បញ្ជូន​ត្រឡប់​មក​កម្ពុជា​វិញ​ចាប់​តាំង​ពី​ដើម ខែ​មិថុនា មក។

កាល​ពី ឆ្នាំ​២០១១ នឹម សាវុធ បាន​ចាក​ចេញ​ពី កម្ពុជា ទៅ​ធ្វើ​ជា​កម្មករ​សំណង់​នៅ ប្រទេស​ថៃ ដោយ​មិន​មាន​លិខិត​ឆ្លង​ដែន មិន​ចេះ​ភាសា មិន​មាន​លុយ​ជាប់​ខ្លួន​និង​មាន​តែ​ខោ​អាវ​ត្រឹម​មួយ​កំប្លេ​ប៉ុណ្ណោះ។

៤ ឆ្នាំ​ក្រោយ​មក សាវុធ ត្រឡប់​មក កម្ពុជា វិញ​គ្មាន​លិខិត​ឆ្លង​ដែន គ្មាន​លុយ​កាក់​ជាប់​ខ្លួន គឺ​មាន​តែ​ខោ​អាវ​មួយ​កំប្លេ​ដដែល។

សាវុធ ថ្លែង​ថា៖ «ថ្ងៃ​ដែល​គេ​ចុះ​ទៅ​ចាប់​ពួក​ខ្ញុំ​នោះ តម្រួត​ថៃ​គេ​មិន​ឲ្យ​ខ្ញុំ​យក​អី​តាម​ខ្លួន​ទាំង​អស់។ លុយ​ក្នុង​កាបូប​ខោ​អាវ​ខ្ញុំ ២ ម៉ឺន​បាត។ ម៉ាញ៉េ ទូរទស្សន៍ សម្លៀក​បំពាក់​ខ្ញុំ​និង​ប្រពន្ធ​ខ្ញុំ សម្ភារ​ធ្វើ​សំណង់​របស់​ខ្ញុំ​សរុប​ទៅ​ប្រហែល ៣ ម៉ឺន​បាត​ទៀត។ គេ​ប្រាប់​ខ្ញុំ​ថា គេ​នឹង​ផ្ញើ​អីវ៉ាន់​ខ្ញុំ​មក​តាម​ក្រោយ​រហូត​មក​ដល់​ពេល​នេះ​មិន​ដឹង​ថា របស់​របរ​ខ្ញុំ​នៅ​ឯណា​ទេ»។

៤ ឆ្នាំ​នៅ ប្រទេស​ថៃ សាវុធ ដើរ​ស៊ី​ឈ្នួល​ធ្វើ​ជា​ជាង​សំណង់​ពី​មួយ​កន្លែង​ទៅ​មួយ​កន្លែង​ប្រឈម​មុខ​នឹង​ការ​ចាប់​ចង​ជា​រៀង​រាល់​ថ្ងៃ​ពី​តម្រួត ថៃ។ ជា​កម្មករ​ចំណាក​ស្រុក​ខុស​ច្បាប់ ហើយ​អាច​បន្ត​ធ្វើ​ការ​នៅ ប្រទេស​ថៃ រហូត​ដល់ ៤​ឆ្នាំ សាវុធ ឲ្យ​ដឹង​ថា៖ «តម្រួត​ថៃ​គេ​តែង​ចុះ​មក​សួរ​នាំ​ថៅកែ​ថា តើ​មាន​កម្មករ​ខ្មែរ​ខុស​ច្បាប់​ដែរ​ឬ​ទេ?

ពលករ​ចំណាក​ស្រុក​ខុស​ច្បាប់​ដែល​ត្រូវ​បាន​ដឹក​ជញ្ជូន​ដោយ​កង​កម្លាំង​ទាហាន​កម្ពុជា​កន្លង​មក។
ពលករ​ចំណាក​ស្រុក​ខុស​ច្បាប់​ដែល​ត្រូវ​បាន​ដឹក​ជញ្ជូន​ដោយ​កង​កម្លាំង​ទាហាន​កម្ពុជា​កន្លង​មក។ ម៉ៃ វីរៈ

ថៅកែ​ខ្ញុំ​ប្រាប់​ខ្ញុំ​ថា ឲ្យ​ប្រាប់​គេ​តាម​ត្រង់។ ជា​ពលករ​ខុស​ច្បាប់​តម្រួត​ថៃ​ទារ ៧០០០ បាត ប្រហែល ២០០ ដុល្លារ​អាមេរិក​ដើម្បី​លោះ​ខ្លួន។ ប៉ះ​ថៅកែ​ចិត្ត​ល្អ​ទៅ​គាត់​បង់​ជំនួស ថៅកែ​ខ្លះ​គាត់​ជួយ​បង់​ពាក់​កណ្តាល​ខ្លះ​ទៅ​ឲ្យ​យើង​បង់​ទាំង​អស់​តែ​ម្តង។ តម្រួត​ថៃ​ឲ្យ​តែ​ដល់​ថ្ងៃ​ពួក​ខ្ញុំ​ត្រូវ​បើក​លុយ​គឺ​គេ​ចុះ​មក​ទារ​លុយ​ថ្លៃ​លោះ​ខ្លួន​ហើយ»។

សាវុធ រៀប​រាប់​អំពី​ថ្ងៃ​ដែល​លោក​ត្រូវ​តម្រួត​ថៃ​ចាប់​កាល​ពី​ថ្ងៃ ទី​៦ ខែ​មិថុនា ដូច្នេះ​ថា៖ «ខ្ញុំ​កំពុង​តែ​ដាំ​បាយ ជួយ​ធ្វើ​ម្ហូប​ប្រពន្ធ​ហ្នឹង ស្រាប់​តែ​គេ​បើក​ទ្វារ​ផ្ទះ​ចូល​ទៅ សួរ​ថា ខ្មែរ​ក៏​ថៃ។ គេ​ប្រាប់​ឲ្យ​ចេញ​មក​ពេល​នោះ​ខ្ញុំ​ដឹង​ថា គេ​ចុះ​ចាប់​បាត់​ហើយ»។

លោក​បន្ត​ថា គាត់​មិន​ឲ្យ​បាយ​ទឹក​អី​ទេ ចាប់​មក​ហើយ​បញ្ជូន​មក​តែ​ម្តង។ ពីរ​យប់​ពីរ​ថ្ងៃ​មិន​ឲ្យ​បាយ​ហូប​អី​ទេ​នៅ​ក្នុង​គុក​នៅ អារញ្ញ។ ប៉ូលិស​ថៃ​គេ​ទារ​លុយ ៣០០ បាត​ទើប​ឲ្យ​ចេញ។ ខ្ញុំ​ចាំ​រហូត​ដល់​ម៉ោង ៧ ទៅ ៨ យប់​ទើប​គេ​បញ្ជូន​មក​ប៉ុស្តិ៍​ប៉ូលិស​ព្រំដែន។ មក​ដល់​គុក​ខ្មែរ ប៉ូលិស​ខ្មែរ​ក៏​ទារ​លុយ ២ ម៉ឺន​ទៀត។ មិន​តែ​ប៉ុណ្ណោះ​ប៉ូលិស​ខ្មែរ​គេ​ស្តី​ឲ្យ​ថា ហេតុ​អី​បាន​ខ្ញុំ​ទៅ​ធ្វើការ​នៅ​ស្រុក​គេ​មិន​មាន​ច្បាប់​ទម្លាប់។ ម៉េច​មិន​នៅ​ធ្វើ​ការ​នៅ​ស្រុក​ឯង។ គេ​មិន​សួរ​ថា​ម៉េច​បាន​ដាច់​ចិត្ត​ទៅ​ទេ»។

សាវុធ ឲ្យ​ដឹង​ទៀត​ថា៖ «មក​ដល់​ព្រំដែន​ខ្មែរ អត់​មាន​អី​រលីង ទទេ​តែ​ម្តង។ ម៉ែ​ឪ​រត់​ទៅ​ចង​ការ​គេ ២០ ម៉ឺន​ឲ្យ​ខ្ញុំ​ជិះ​ឡាន​មក​ផ្ទះ​វិញ។ ដាច់​បាយ​អស់ ៥​ថ្ងៃ ទំរាំ​មក​ដល់​ផ្ទះ​ថ្ងៃ ទី១១។ ពលករ​ទាំង​អស់​ប្រហែល ៧០០ នាក់​មក​ថ្ងៃ​ជាមួយ​ខ្ញុំ ហើយ​ដឹក​ចេញ​មក ៤ ឡាន​បែន គឺ​ឡាន​ដឹក​ពោត»។

តប​នឹង​សំណួរ​ថា ហេតុ​អ្វី​បាន​ជា​សម្រេច​ចិត្ត​ចាក​ចេញ​ពី​ស្រុក​កំណើត​ផ្សង​ព្រេង​លើ​ទឹក​ដី​ទាំង​មិន​ចេះ​ភាសា និង​មិន​មាន​លិខិត​ឆ្លង​ដែន សាវុធ ថា ការ​សម្រេច​ចិត្ត​ចេញ​ទៅ ថៃ ក៏​ព្រោះ​ការ​ងារ​ក្នុង​ស្រុក​ទទួល​បាន​ប្រាក់​ខែ​តិច ជួយ​ផ្តល់​ឲ្យ​ក្រុម​គ្រួសារ​មិន​គ្រប់។

លោក​បាន​បន្ត​ថា៖ «ខ្វះ​ខាត​ជីវភាព​មុខ​ក្រោយ​មួយ​ខែ​បាន ២៥​ម៉ឺន។ នឹក​ឃើញ​រក​នៅ​ទី​នេះ រក​មិន​គ្រប់។ ម៉ែឪ ក្រ ហើយ​ចាស់ៗ ក៏​ដាច់​ចិត្ត​ថា ត្រូវ​តែ​ទៅ។​បើ​នៅ​ធ្វើ​ប៉ាស្ព័រ (Passport​)​​ អស់ ១០០ ទៅ ១៥០ ដុល្លារ​ទៀត។ អត់​មាន​លុយ​ធ្វើ។ អ៊ីចឹង​មាន​តែ​ទៅ​តាម​ផ្លូវ​កាត់។​ទៅ​តាម​មេ​ខ្យល់​បង់​ឲ្យ​គេ ៣០០០ បាត គេ​ដឹក​ដល់​កន្លែង​ធ្វើការ ហើយ​មាន​ការ​ងារ​ឲ្យ​យើង​ធ្វើ​តែ​ម្តង»។

នៅ ប្រទេស​ថៃ សាវុធ ទទួល​បាន​ប្រាក់​កម្រៃ​ប្រមាណ ៣០០ បាត​ស្មើ​នឹង ៩ ដុល្លារ​ក្នុង​មួយ​ថ្ងៃ​មាន​តួនាទី​ជា​ជាង​សំណង់។ ការងារ​របស់​លោក​ចាប់​ផ្តើម​ពី​ម៉ោង ៧ ព្រឹក​ដល់​ម៉ោង ៥ ល្ងាច។

លោក ហោ ណាំហុង (ស្តាំ) និងរដ្ឋមន្រ្តីស្តីទីការបរទេសថៃ។
លោក ហោ ណាំហុង (ស្តាំ) និងរដ្ឋមន្រ្តីស្តីទីការបរទេសថៃ។ ម៉ៃ វីរៈ

រយៈ​ពេល ៤ ឆ្នាំ​នៅ ប្រទេស​ថៃ សាវុធ បាន​ចូល​រួម​សាង​សង់​សណ្ឋាគារ ៣៥ ជាន់​មួយ​ក្នុង ក្រុង​ថេប (បាងកក) ខុនដូ ៤៦ ជាន់​មួយ​នៅ ខេត្ត​ហួហ៊ីន និង​គម្រោង​ផ្ទះ​ល្វែង​រាប់​រយ​ខ្នង​នៅ​ក្នុង ខេត្ត​ឈុនប៊ូរី។ ពេល​ខ្លះ​ក៏​មិន​បាន​ទទួល​ប្រាក់​ខែ​ពី​ថៅកែ​ជាច្រើន​លើក​ច្រើន​សា ក៏​មាន។

បើ​តាម​ប្រសាសន៍​របស់​លោក យ៉ា ណាវុធ នាយក​ប្រតិបត្តិ នៃ​អង្គការ ខារ៉ាម កម្ពុជា ជា​អង្គការ​ដែល​ធ្វើ​ការ​លើ​ការ​លើក​កម្ពស់​និង​ការ​ពារ​សិទ្ធិ​ពលករ​ឲ្យ​ដឹង​ថា ពលករ​ចំណាក​ស្រុក​ខុស​ច្បាប់​ភាគ​ច្រើន​ប្រឈម​នឹង​ការ​កេង​ប្រវ័ញ្ច​ពី​និយោជក ការ​ចាប់​ឃុំ​ពី​សំណាក់​ប៉ូលិស​អន្តោ​ប្រវេសន៍​ថៃ ហើយ​ដោយ​សារ​ពួក​គាត់​មិន​មាន​លិខិត​ឆ្លង​ដែន​និង​ឯកសារ​ស្រប​ច្បាប់​ពួក​គាត់​អាច​នឹង​ត្រូវ​រង​ការ​ជំរិត​ទារ​ពី​មេខ្យល់​ពេល​ដែល​ពួក​គាត់​ចង់​ត្រឡប់​មក​ស្រុក​វិញ។

លោក​ថា ពលករ​ចំណាក​ស្រុក​ដោយ​ខុស​ច្បាប់​ព្រោះ​តែ​គ្មាន​ជម្រើស​ប្រសើរ​ជាង​នេះ។

លោក​ថ្លែង​ថា៖ «មូល​ហេតុ​ដែល​នាំ​ឲ្យ​ពលករ​ចំណាក​ស្រុក ទីមួយ ប្រាក់​ឈ្មួល​ខ្ពស់ ការ​ធ្វើ​កសិកម្ម​ថ្លៃ​ដើម​ខ្ពស់ ហើយ​ខ្វះ​ទីផ្សារ លក់​បាន​ថោក​មិន​ចំណេញ ទី៣ គឺ​ការ​ប្រែ​ដី​កសិកម្ម​ទៅ​ជា​ដី​សម្បទាន​សេដ្ឋកិច្ច​ច្រើន​ពេក ទី៤ ពលករ​ខ្វះ​ពត៌មាន​អំពី​លក្ខខណ្ឌ​ការងារ​ក្នុង​ប្រទេស​ទទួល ទី៥ គឺ​ការ​ប្រែ​ប្រួល​អាកាសធាតុ ទី៦ អត្រា​មិន​មាន​ការងារ​ធ្វើ​ខ្ពស់»។

លោក​បាន​និយាយ​ឲ្យ​ដឹង​ថា៖ «ពលករ​ចំណាក​ស្រុក​ទៅ​ដោយ​ខុស​ច្បាប់​ដោយ​សារ​ចំណាយ​ពេល​ខ្លី និង​តម្លៃ​អស់​តិច​ជាង ហើយ​ទៅ​ដោយ​ស្រប​ច្បាប់​ជួន​កាល​ក្រុម​ហ៊ុន​កាត់​ប្រាក់​ឈ្មួល​ពី ៦ ទៅ ១០ ខែ​នៃ​ប្រាក់​ខែ​របស់​គាត់​ឯ​ណោះ។ និតីវិធី​ទៅ​តាម​ក្រុម​ហ៊ុន​មាន​លក្ខណៈ​ការិយាធិបតេយ្យ ស្មុគ​ស្មាញ មាន​តម្លៃ​ខ្ពស់ និង​ចំណាយ​ពេល​យូរ​ដែល​ធ្វើ​ឲ្យ​ពួក​គាត់​ជ្រើស​ទៅ​តាម​មេ​ខ្យល់​ជាង​ក្រុម​ហ៊ុន​ស្រប​ច្បាប់»។

បន្ទាប់​ពី​មាន​ការ​ប្រកាស​ចាប់​បញ្ជូន​ពលករ​ចំណាក​ស្រុក​មក​កម្ពុជា​វិញ រដ្ឋាភិបាល​យោធា​ថៃ​កាលពី​ដើម ខែ​មិថុនា បាន​ប្រកាស​បញ្ចូន​ពលករ​ខ្មែរ​ដែល​កំពុង​បម្រើ​ការ នៅ ប្រទេស​ថៃ ដែល​មិន​មាន​ឯកសារ​ស្រប​ច្បាប់​បាន​សម្រេច​ឲ្យ​វិល​មក​កម្ពុជា​វិញ​ជា​បន្ត​បន្ទាប់​ដែល​ធ្វើ​ឲ្យ​តួលេខ​កើន​ដល់​ជាង ២០ ម៉ឺន​នាក់​បើ​គិត​ដល់​ដើម ខែ​កក្កដា នេះ។

កាល​ពី​ថ្ងៃ ទី​២៨ ខែ​មិថុនា បន្ទាប់​មាន​ការ​ប្រជុំ​រវាង​ភាគី​ថៃ​និង​កម្ពុជា​រួច​មក រដ្ឋាភិបាល​យោធា​ថៃ​បាន​ព្រម​ព្រៀង​អនុញ្ញាត ទទួល​យក​ពលករ ចំណាក​ស្រុក​កម្ពុជា​វិញ ដោយ​សារ​តែ​កង្វះ​កម្លាំង​ពលកម្ម​នៅ​ក្នុង​ឧស្សាហកម្ម​ជា​ការ​ឆ្លើយ​តប​រដ្ឋាភិបាល​កម្ពុជា កាល​ពី​ថ្ងៃ ១ ខែ​កក្កដា បាន​សម្រេច​ក្នុង​ការ​ជួយ​សម្រួល​ការ​វិល​ត្រឡប់​របស់​ពលករ​ខ្លួន​ទៅ​កាន់​ទឹក​ដី​ថៃ​ដោយ​ស្រប​ច្បាប់​គឺ​តម្រូវ​ឲ្យ​ពលករ​ចំណាយ​ត្រឹម​តែ ២០ ដុល្លារ​ប៉ុណ្ណោះ ក្នុង​ការ​ទទួល​បាន​ទិដ្ឋាការ​ទៅ​ធ្វើ​ការ​ស្រប​ច្បាប់​នៅ ប្រទេស​ថៃ។

ទោះ​ជា​យ៉ាង​ណា លោក យ៉ា ណាវុធ លើក​ឡើង​ថា៖ «ពលករ​អាច​សម្រេច​ទៅ​ដោយ​ស្រប​ច្បាប់​លុះ​ត្រា​តែ​មាន​ការ​យល់​ព្រម​ពី​និយោជក​នៅ​ប្រទេស​ទទួល​ពាក់ព័ន្ធ​នឹង​ការ​ចេញ​ចំណាយ​ឲ្យ​ពលករ ទៅ​លើ​ប័ណ្ណ​អនុញ្ញាត​ការងារ ការ​ពិនិត្យ​សុខភាព ការ​ធានា​រ៉ាប់​រង​សុខភាព និង​ពាក្យ​សុំ​ផ្សេងៗ​ហើយ​និង​ការ​ដឹក​ជញ្ជូន​ពី កម្ពុជា ទៅ ទីក្រុង​បាងកក»។

លោក នឹម សាវុធ និងភរិយា។
លោក នឹម សាវុធ និងភរិយា។ ហេង ជីវ័ន

ខណៈ​មាន​ការ​សម្រប​សម្រួល​ពី​រដ្ឋាភិបាល​នៃ​ប្រទេស​ទាំង​ពីរ​យ៉ាង​ច្រើន​ពាក់​ព័ន្ធ​នឹង​ការ​ធ្វើ​ឲ្យ​ពលករ​ក្លាយ​ជា​ស្រប​ច្បាប់​នោះ លោក នឹម សាវុធ ដែល​បច្ចុប្បន្ន​មាន​អាយុ ៣៥​ឆ្នាំ និង​ភរិយា​និយាយ​ថា នឹង​ធ្វើ​ការ​ពិចារណា​ថា តើ​ត្រូវ​ត្រឡប់​ទៅ​វិញ​ឬ​យ៉ាង​ណា? តែ​លោក​ថា បទ​ពិសោធ​ដែល​លោក​បាន​ឆ្លង​កាត់​រយៈ​ពេល​ប៉ុន្មាន​ឆ្នាំ​នៅ ប្រទេស​ថៃ និង​ពេល​ដែល​លោក​ត្រូវ​ចាប់​បញ្ជូន​មក​វិញ​នេះ ធ្វើ​ឲ្យ​លោក​មិន​ចង់​ចាក​ចេញ​ទៅ​វិញ​នោះ​ទេ។

សាវុធ និយាយ​ថា៖ «ខ្ញុំ​ផ្តាំ​ដល់​បង​ប្អូន​ខ្មែរ​យើង បើ​ចង់​ទៅ​ថៃ​គួរ​តែ​ទៅ​ដោយ​ស្រប​ច្បាប់​កុំ​ទៅ​ដោយ​ខុស​ច្បាប់។ ពិបាក​ណាស់ មក​វិញ​គ្មាន​យក​បាន​អី​មក​ទេ។ យក​ល្អ​រក​ការងារ​ធ្វើ​នៅ​ក្នុង​ស្រុក ឬ​នៅ​ជួយ​ធ្វើ​ស្រែ​ចម្ការ​របស់​ឪពុក​ម្តាយ​វិញ។ មាន​ស៊ី​អត់​ស៊ី​បាន​នៅ​ក្បែរ​គ្រួសារ»។

បើ​យោង​តាម​មន្រ្តី​ជាន់​ខ្ពស់​របស់​ក្រសួង​ការងារ​កម្ពុជា​បាន​ធ្វើ​ការ​ព្យាករ​ថា ពលករ​ខ្មែរ​ដែល​ធ្វើ​ការ​នៅ ប្រទេស​ថៃ ទាំង​ស្រប​ច្បាប់ និង​ខុស​ច្បាប់​បាន​ផ្ញើ​ប្រាក់​មក​ផ្ទះ​វិញ​ប្រមាណ​ជា ៨០ លាន​ដុល្លារ​ក្នុង​មួយ​ឆ្នាំៗ។

លោក ហេង សួរ អ្នក​នាំ​ពាក្យ​ក្រសួង​ការងារ និង​បណ្តុះ​បណ្តាល​វិជ្ជាជីវៈ​បាន​ថ្លែង​កាល​ពី​ថ្ងៃ ទី​១៦ មិថុនា ថា៖ «ដូច្នេះ​នៅ​ពេល​ដែល​ពលករ​កម្ពុជា​ទាំង​អស់​ត្រូវ​បញ្ជូន​មក​វិញ កម្ពុជា​អាច​នឹង​បាត់​បង់​ប្រាក់​ចំណូល​ទាំង​នេះ​ក្នុង​តម្លៃ​សេដ្ឋកិច្ច»។

បើ​ទោះ​បី​យ៉ាង​នេះ​ក្តី លោក​អះអាង​ថា កម្ពុជា​នឹង​មិន​ខាត​បង់​ខ្លាំង​ឡើយ ខណៈ​កម្លាំង​ពលកម្ម​ទាំង​នោះ​នឹង​មក​ជំនួស​កម្លាំង​ពលកម្ម​ក្នុង​ស្រុក​វិញ ដូច​ជា​រួម​ចំណែក​បង្កើន​ចំណូល​ក្នុង​វិស័យ​កសិកម្ម និង​ឧស្សាហកមុ្ម​ជាដើម។

លោក​ថ្លែង​ថា៖ «បើ​យើង​បាត់​ចំណូល​ពី​ក្រៅ ក៏ប៉ុន្តែ​ខាង​ក្នុង​របស់​យើង​វា​កើន មាន​ន័យ​ថា ផល​សរុប​ចុង​ក្រោយ​របស់​យើង​វា​នៅ​តែ​ស្មើ​ដដែល»។

ក្នុង​ជំនួប​រវាង​លោក ហោ ណាំហុង រដ្ឋ​មន្រ្តី​ការ​បរទេស​កម្ពុជា ជាមួយ​នឹង​លោក ស៊ីហាសាក់ ភួងកេតកែវ រដ្ឋ​មន្រ្តី​ស្តី​ទី​នៃ​ក្រសួង​ការ​បរទេស​ថៃ​នៅ​រាជធានី​ភ្នំពេញ​កាល​ពី​ថ្ងៃ ទី១ ខែ​កក្កដា លោក ហោ ណាំហុង បាន​ថ្លែង​ថា រហូត​មក​ទល់​នឹង​ពេល​នេះ​មាន​ពលករ​ជាង ១ ម៉ឺន​នាក់​ហើយ​ដែល​បាន​ទទួល​នូវ​ទិដ្ឋាការ​ពី​ស្ថានទូត​ថៃ ដើម្បី​បំពេញ​បែប​បទ​ត្រឡប់​ទៅ​ធ្វើ​ការ​នៅ​ប្រទេស​ថៃ​វិញ៕

អត្ថបទគួរចាប់អារម្មណ៍