The Phnom Penh Post Search

Search form




Logo of Phnom Penh Post newspaper Phnom Penh Post - ធនាគារ​អេស៊ីលីដា​សម្ពោធ សាខា​ថ្មី​នៅ​ទីរួមខេត្ត​ស្ទឹងត្រែង

ធនាគារ​អេស៊ីលីដា​សម្ពោធ សាខា​ថ្មី​នៅ​ទីរួមខេត្ត​ស្ទឹងត្រែង

អគារ​ទីស្នាក់ការ​របស់​ធនាគារ​អេស៊ីលីដា។
អគារ​ទីស្នាក់ការ​របស់​ធនាគារ​អេស៊ីលីដា។ ផា លីណា

ធនាគារ​អេស៊ីលីដា​សម្ពោធ សាខា​ថ្មី​នៅ​ទីរួមខេត្ត​ស្ទឹងត្រែង

ជាមួយ​នឹង​កំណើន​យ៉ាង​រហ័ស​នៃ​ចំនួន​ប្រជាជន និង​សកម្មភាព​ពាណិជ្ជកម្ម​នៅ​ខេត្ត​ស្ទឹងត្រែង ធនាគារ​អេស៊ីលីដា ដែល​ជា​ធនាគារ​ពាណិជ្ជ​ឈាន​មុខ​គេ​មួយ​ទាក់ទង​នឹង​ទ្រព្យសកម្ម និង​អតិថិជន​បាន​សម្រេច​បើក​ដំណើរការ​សាខា​ថ្មី​មួយ​ជា​ផ្លូវការ​កាលពី​ថ្ងៃ​សុក្រ​នៅ​ខេត្ត​ស្ទឹងត្រែង​ដើម្បី​ឆ្លើយតប​នឹង​ការ​កើនឡើង​នៃ​តម្រូវការ​ហិរញ្ញវត្ថុ​។

លោក ឈាង ឡាក់ អភិបាលរង​នៃ​គណៈអភិបាល​ខេត្ត​ស្ទឹងត្រែង​បាន​មាន​ប្រសាសន៍​ថា​សាខា​ធនាគារ​អេស៊ីលីដា​ខេត្ត​ស្ទឹងត្រែង​ត្រូវ​បាន​បង្កើត​ឡើង ខណៈ​ពេល​ដែល​សេដ្ឋកិច្ច​ជាតិ ជាពិសេស​ខេត្ត​ស្ទឹងត្រែង​កំពុង​រីកចម្រើន​ប្រកប​ដោយ​ស្ថិរភាព និង​កំណើន​លើស​ពី​ការ​រំពឹង​ទុក​ក្នុង​រយៈពេល​ប៉ុន្មាន​ឆ្នាំ​កន្លងមក​នេះ​។

លោក​លើក​ឡើង​ថា​៖ «​ការ​បង្កើត​សាខា​ធនាគារ​អេស៊ីលីដា​នៅ​ខេត្ត​ស្ទឹងត្រែង​គឺជា​ភ័ស្ដុតាង​នៃ​កំណើន និង​ភាព​ស្ថិតស្ថិរ ហើយ​ក៏​បង្ហាញ​ពី​ការ​រួមចំណែក​ក្នុង​ការ​អភិវឌ្ឍ​សេដ្ឋកិច្ច​របស់​កម្ពុជា​ផង​ដែរ ពិសេស​សាខា​ខេត្ត​ស្ទឹងត្រែង​នេះ​តែ​ម្ដង​»។

លោក​បន្ត​ថា​៖ «​នេះ​គឺជា​ភ័ស្ដុតាង​នៃ​សាខា​ខេត្ត​ស្ទឹងត្រែង​សម្រាប់​កំណើន​យ៉ាង​រហ័ស​របស់​ខ្លួន​នៃ​ប្រតិបត្តិការ​របស់​ខ្លួន​និង​ហេដ្ឋារចនា​សម្ព័ន្ធ​។ ការ​បង្កើត​ឡើង​នេះ​បាន​ផ្ដល់​អត្ថប្រយោជន៍​កាន់តែ​ច្រើន​ដល់​ប្រជាជន និង​ពាណិជ្ជករ​គ្រប់រូប​នៅក្នុង​ខេត្ត​នេះ​តាមរយៈ​ការ​ផ្ដល់​ហិរញ្ញប្បទាន និង​ផលិតផល​។

លោក អ៊ិន ចាន់នី ប្រធាន​នាយកប្រតិបត្តិ​ធនាគារ​អេស៊ីលីដា​បាន​ថ្លែង​ថា បច្ចុប្បន្ន​ធនាគារ​អេស៊ីលីដា មាន​ការិយាល័យ​ស្ដង់ដារ​ចំនួន​១៤៣ និង​ការិយាល័យ​ស្ដង់ដារ​កំពុង​សាងសង់​ចំនួន​ ១៧​ ដើម្បី​ជួយ​សម្រួល​និង​បម្រើ​ដល់​អតិថិជន​របស់​ខ្លួន​នៅក្នុង​ប្រតិបត្តិការ​ហិរញ្ញវត្ថុ​ជាមួយ​ធនាគារ​អេស៊ីលីដា ហើយ​ជាពិសេស​ដើម្បី​ការពារ​ទ្រព្យសម្បត្តិ​របស់​អតិថិជន​ដែល​កំពុង​ប្រើប្រាស់​សេវា និង​ផលិតផល​របស់​ធនាគារ ព្រម​ទាំង​ដើម្បី​ផ្ដល់​នូវ​អនាម័យ​និង​សុវត្ថិភាព​សម្រាប់​បុគ្គលិក​ទាំងអស់​ដែល​ធ្វើ​ការងារ​នៅក្នុង​ធនាគារ​នេះ​។

លោក​បញ្ជាក់​ថា​៖ «​ការ​កើនឡើង​នៅក្នុង​ជំនឿ និង​ទំនុក​ចិត្ត​ពី​អតិថិជន​គឺជា​ចក្ខុវិស័យ​ដ៏សំខាន់​របស់​ធនាគារ​អេស៊ីលីដា​ភីអិលស៊ី។ អាស្រ័យ​ហេតុនេះ ធនាគារ​នេះ​ត្រូវ​បាន​បង្កើត​ដោយ​ផ្ដោត​លើ​និរន្តរភាព​អស់​រយៈពេល​២១​ឆ្នាំ​កំពុង​ផ្ដល់​សេវា​ហិរញ្ញវត្ថុ​ផ្ដាច់មុខ​សម្រាប់​គ្រប់​មជ្ឈដ្ឋាន​នៃ​សហគមន៍ ទាំង​វិស័យ​ឯកជន និង​វិស័យ​សាធារណៈ​តាមរយៈ​សាខា និង​ការិយាល័យ​ចំនួន​២៥២ ទូទាំង​ប្រទេស​កម្ពុជា​»។

លោក យ៉ាំ ឡាង អនុប្រធាន​សាខា និង​ជា​នាយក​គ្រប់គ្រង​របស់​សាខា​នៅ​ខេត្ត​ស្ទឹងត្រែង​បាន​បញ្ជាក់​ថា គិត​មក​ត្រឹម​ថ្ងៃ​ទី​៣០ ខែ​កក្កដា ឆ្នាំ​២០១៤ សាខា​ខេត្ត​ស្ទឹងត្រែង​មាន​ការិយាល័យ​២ មាន​បុគ្គលិក​៧៥​នាក់ ទ្រព្យសកម្ម​សរុប​ជាង​១៧​លាន​ដុល្លារ​អាមេរិក មាន​អតិថិជន ២ ៥៨៨​នាក់ ដែល​កំពុង​ផ្ដល់​ឥណទាន ​១៥ ​លាន​ដុល្លារ​អាមេរិក អតិថិជន​ចំនួន​១០ ២២៥ នាក់​កំពុង​ដាក់​ប្រាក់​បញ្ញើ​សរុប​៧​លាន​ដុល្លារ​អាមេរិក ហើយ​អតិថិជន​ផ្សេង​ទៀត​កំពុង​ប្រើប្រាស់​សេវា​ផ្សេងៗ​ដែល​រួមមាន សេវា ACLEDA Unity យូនីធី អេស៊ីលីដា វីសាកាត កាតឥណទាន និង​សេវា​ធនាគារ​អ៊ីនធឺណិត​អេស៊ីលីដា​ថ្មី​មួយ​។

បើ​យោងតាម​របាយការណ៍ ប្រចាំ​ឆ្នាំ​របស់​ធនាគារ​ជាតិ គិត​ត្រឹម​ដំណាច់​ឆ្នាំ​២០១៣ ប្រទេស​កម្ពុជា មាន​ធនាគារ​ពាណិជ្ជ​ទាំងអស់​ចំនួន​៣៣ ដែល​ក្នុង​នោះ​មាន​ធនាគារ ឯកទេស​ចំនួន​៧ និង​ការិយាល័យ​តំណាង​ចំនួន​៥ ។ ជាមួយ​គ្នា​នេះ​ដែរ កម្ពុជា​ក៏​មាន​ស្ថាប័ន​មីក្រូហិរញ្ញវត្ថុ​ចំនួន​៣៧ ដោយ​ក្នុង​នោះ​មាន​៧​ស្ថាប័ន​ដែល​ទទួល​បាន​អាជ្ញាប័ណ្ណ​ពី​ធនាគារជាតិ​ក្នុង​ការ​ទទួល​ប្រាក់បញ្ញើ៕

អត្ថបទគួរចាប់អារម្មណ៍