The Phnom Penh Post Search

Search form




Logo of Phnom Penh Post newspaper Phnom Penh Post - នៅ​កម្ពុជា​ការ​ប្រើប្រាស់​អង្គរក្ស​មិន​ទាន់​មាន​បែបផែន​ត្រឹមត្រូវ​នៅ​ឡើយ




នៅ​កម្ពុជា​ការ​ប្រើប្រាស់​អង្គរក្ស​មិន​ទាន់​មាន​បែបផែន​ត្រឹមត្រូវ​នៅ​ឡើយ

អង្គរក្ស​ដែល​ដើរ​ការពារ​ព្រះ​មហាក្សត្រ​នៅ​ពេល​ដែល​ព្រះ​អង្គយាង​មក​ទត​ព្រះ​រាជ​ពិធីបុណ្យ​ អុំទូក​​ អក​អំបុក​​។
អង្គរក្ស​ដែល​ដើរ​ការពារ​ព្រះ​មហាក្សត្រ​នៅ​ពេល​ដែល​ព្រះ​អង្គយាង​មក​ទត​ព្រះ​រាជ​ពិធីបុណ្យ​ អុំទូក​​ អក​អំបុក​​។ ម៉ៃ វីរៈ

នៅ​កម្ពុជា​ការ​ប្រើប្រាស់​អង្គរក្ស​មិន​ទាន់​មាន​បែបផែន​ត្រឹមត្រូវ​នៅ​ឡើយ

ក្នុង​ហាង​កាហ្វេ​មួយ​នៅ​រាជធានី​ភ្នំពេញ កាលពី​ដើម​ឆ្នាំ​នេះ ភ្ញៀវទេសចរ​ម្នាក់ បាន​ជួប​មនុស្ស​ខុស​នៅ​ថ្ងៃ​ស៊យ​។ អ្វីៗ​បាន​ចាប់ផ្តើម​ខណៈ​ដែល​ជម្លោះ​ពាក្យសម្តី​ជាមួយ​អតិថិជន​ម្នាក់​ទៀត បាន​ក្លាយ​ទៅ​ជា​ការ​ប្រឈម​មុខ​ដាក់​គ្នា​យ៉ាង​ហិង្សា​។

ជនរងគ្រោះ និយាយ​ទាំង​កំហឹង​ថា គូបដិបក្ខ​របស់​គាត់​ជា​បុរស​នៅ​ស្រុក​ខ្មែរ ដែល​មាន​ទ្រព្យធន បាន​សម្រុក​បុក​អង្គរក្ស​របស់​គាត់ ដែល​កំពុង​តែ​ឈរ​នៅ​ក្បែរ​។ អង្គរក្ស​រូប​នោះ បាន​ទាញ​កាំភ្លើង ហើយ​បាន​ហុច​វា​ទៅ​ឲ្យ​មេ​របស់​គាត់ ហើយ​គាត់ ក៏​បាន​វាយ​។ ការ​ប្រើប្រាស់​អង្គរក្ស បាន​ក្លាយ​ជា​បាតុភូត​មួយ ដែល​គេ​ចង់ដឹង​ចង់ឮ​នៅ​កម្ពុជា​។

ចាប់​តាំងពី​អ្នក​ហែហម​របស់​សម្តេចតា នរោត្តម សីហនុ មកពី​កងយោធា​កូរ៉េ​ខាង​ជើង កាលពី​ដើម​ទសវត្សរ៍ ១៩៩០ រហូត​ដល់​អង្គរក្ស ដែល​បាន​ព្យាយាម​ហែហម​អ្នក​ឃ្លាំ​មើល​ម្នាក់ ចូល​ក្នុង​បន្ទប់​ប្រឡង​ថ្នាក់​ជាតិ​កាលពី​ខែ​មុន អង្គរក្ស​មាន​ប្រភេទ​ផ្សេងៗ ហើយ​ត្រូវ​គេ​ប្រើប្រាស់​ក្នុង​គោលបំណង​ផ្សេងៗ​ដែរ​។ ខណៈ​ដែល​ការ​ការពារ​បែប​នេះ អាច​ជា​និមិត្តសញ្ញា​នៃ​អំណាច​សម្រាប់​ប្រភេទ​មនុស្ស​ខ្លះ ប៉ុន្តែ​អ្នក​ផ្សេង​មើល​ឃើញ​ថា​ឧស្សាហកម្ម​អង្គរក្ស​នេះ ត្រូវ​មាន​អាជីព​ជា​ផលិតផល​សង្គម​ដែល​សុវត្ថិភាព​មនុស្ស​មិន​អាច​ត្រូវ​បាន​ធានា​ឡើយ​។

លោក John Muller នាយក​គ្រប់គ្រង​ក្រុមហ៊ុន​ដំណោះស្រាយ​សន្តិសុខ​ពិភពលោក ដែល​មាន​មូលដ្ឋាន​នៅ​រាជធានី​ភ្នំពេញ បាន​ថ្លែង​ថា​៖ «​ភ្នំពេញ​មាន​បទល្មើស​ច្រើន​ជាង​...​។ ជម្លោះ​ជាច្រើន​នៅ​ទីក្រុង​បណ្តាល​មកពី​ជម្លោះ​រកស៊ី​។ អ្នក​ក៏​មាន​ការ​ច្រណែន អំពើ​ហិង្សា​នៅ​កន្លែង​ធ្វើការ និង​ការ​តវ៉ា​ផង​ដែរ​»​។

ក្រុម​អង្គរ​ក្សដើរ​ល្បាត​នៅ​ជុំ​វិញ​កន្លែង​ដែល​ប្រារព្ធពិធីបុណ្យអុំទូក​ ដើម្បីសុវត្ថិភាព ថ្នាក់ដឹក​នាំ​​។
ក្រុម​អង្គរ​ក្សដើរ​ល្បាត​នៅ​ជុំ​វិញ​កន្លែង​ដែល​ប្រារព្ធពិធីបុណ្យអុំទូក​ ដើម្បីសុវត្ថិភាព ថ្នាក់ដឹក​នាំ​​។ ហេង ជីវ័ន

ដោយសារ​តែ​និទ្ទណ្ឌភាព ការ​អនុវត្ត​ច្បាប់​នៅ​ទន់ខ្សោយ និង​ភាព​ក្រីក្រ​«​អ្នក​ចាំបាច់​ត្រូវ​តែ​គិត​ពី​សន្តិសុខ​ផ្ទាល់​ខ្លួន​ឲ្យ​បាន​ច្បាស់លាស់​»​។

លោក Muller បាន​ថ្លែង​ថា​៖ «​ដើម្បី​ជួល​ឃាតករ​ស៊ីឈ្នួល ដែល​ប្រើ​កាំភ្លើង មិន​ថ្លៃ​ទេ ប៉ុន្តែ​ខ្ញុំ​ថា ការ​គំរាមកំហែង​ធំ​បំផុត...​ក្នុង​ប្រទេស​កម្ពុជា​គឺ​ផ្លូវ​ទៅវិញ​ទេ​។ យើង​មាន​គ្រោះថ្នាក់​អាថ៌កំបាំង​ច្រើន​ណាស់​»​។

នៅ​ខណ្ឌ​ចំការមន រាជធានី​ភ្នំពេញ អតីត​ទាហាន​កងយោធពល​ខេមរភូមិន្ទ និង​ជា​គ្រូបង្វឹក​យោធា​លោក យីន សារារ័ត្ន នៅពេល​ថ្មីៗ​នេះ បាន​បើក​ក្រុមហ៊ុន​សន្តិសុខ​ឯកជន​មួយ​ឈ្មោះ Star World Security ។ ជាមួយ​នឹង​សេវា​ធម្មតា​ជាច្រើន​លោក សារារ័ត្ន អាច​ផ្តល់​ប្រភព​អង្គរក្ស​ប្រដាប់​អាវុធ​ពី​ក្រសួង​មហាផ្ទៃ​។

លោក សារារ័ត្ន បាន​ថ្លែង​ថា​៖ «​យើង អាច​រក​ពួកគេ​តាម​តម្រូវការ​។ យើង​គ្រាន់តែ​សរសេរ​លិខិត​ទៅ​ក្រសួង​មហាផ្ទៃ ដើម្បី​ស្នើសុំ​អង្គរក្ស​។ វា​ស្រេច​តែ​លើ​អតិថិជន​ថា​ត្រូវការ​ប៉ុន្មាន​នាក់ និង​រយៈពេល​ប៉ុន្មាន​?

យើង​គិត​ប្រាក់​ទៅ​តាម​នោះ​។ អង្គរក្ស​ទាំងនោះ​មាន​បទពិសោធ​ច្រើន​ជាង​សន្តិសុខ​។ នៅពេល​យើង​និយាយ​ដល់​ការ​ការពារ​ផ្ទាល់​ខ្លួន ហើយ​ពួកគេ អាច​មាន​សិទ្ធិ​កាន់​កាំភ្លើង​»​។

លោក ខៀវ សុភ័គ អ្នក​នាំពាក្យ​ក្រសួង​មហាផ្ទៃ មិន​អាច​ទាក់ទង​បាន​ទេ នៅ​សប្តាហ៍​នេះ រីឯ​លោក ទូច ណារ៉ុថ ប្រធាន​នាយកដ្ឋាន​អង្គរក្ស បាន​បដិសេធ​មិន​ធ្វើ​អត្ថាធិប្បាយ​លើ​សេវា​ឯកជន​ដែល​ក្រសួង​ផ្តល់​ឲ្យ​ទេ​។

សម្រាប់​អ្នក​ដែល​មិន​អាច​រក​អង្គរក្ស​ប្រដាប់​អាវុធ​របស់​រដ្ឋាភិបាល ឬ​អ្នក​ដែល​មិន​ត្រូវការ​សន្តិសុខ​ផ្ទាល់​ខ្លួន គឺជា​រឿង​មួយ​ផ្សេង​ទៀត​។ លោក Steven ជា​ជនបរទេស ដែល​ក្រុមហ៊ុន​របស់​លោក​ឈ្មោះ Cambodia Bodyguard.com ផ្តល់​អង្គរក្ស​សម្រាប់​ពាណិជ្ជករ ដែល​មក​ទស្សនកិច្ច​កម្ពុជា​បាន​ថ្លែង​ថា​៖«​កម្ពុជា ជា​ប្រទេស​ស្វ័យគ្រប់គ្រង​។ ប្រសិន​បើ​មាន​អ្វី​មួយ​កើតឡើង​ចំពោះ​អ្នក តើ​អ្នក​ហៅ​នរណា​? តើ​នរណា​នឹង​មក​ជួយ​អ្នក​?​»​។

លោក បាន​បញ្ជាក់​ថា អង្គរក្ស​របស់​លោក Steven ត្រូវ​បាន​គេ​ទុក​ចិត្ត​ថា ជា​អ្នក​ដែល​មាន​អាជីព​និង​មាន​ទំនាក់ទំនង​ល្អ​ជាមួយ​អតិថិជន​របស់​ពួកគេ​។

Content image - Phnom Penh Post

លោក បាន​ថ្លែង​បន្ត​ថា​៖«​ការងារ​ប្រមាណ ៩០ ភាគរយ គឺ​មនោគមវិជ្ជា ដែល​រារាំង​មិន​ឲ្យ​ឧបទ្ទវហេតុ​កើតឡើង​។ ការ​ធ្វើ​បទសម្ភាស​អតិថិជន​លើក​ដំបូង ជា​រឿង​សំខាន់​។ អ្នក​មិន​ត្រូវការ​នរណា​ម្នាក់​ដែល​មក​ទី​នេះ​ហើយ​មិន​គោរព​វប្បធម៌​ទេ​»​។

ក្រុមហ៊ុន​របស់​លោក Muller ឈ្មោះ GSS ផ្តល់​«​ការ​ការពារ​ពិសេស»​ដែល​រួមមាន​ភ្ញៀវ​លំដាប់​ខ្ពស់​ដែល​មក​ទស្សនកិច្ច​ប្រទេស​កម្ពុជា​។ ប៉ុន្តែ​សេវា​ការពារ​បែប​នេះ ពិតជា​ថ្លៃ ហើយ​គេ​ក៏​កម្រ​រក​ដែរ​។ លោក Muller បាន​បញ្ជាក់​ថា ការ​ការពារ​អាជីព ថ្លៃ​ជាង​ប្រាក់​ឈ្នួល​អប្បបរមា​ច្រើន​ណាស់ ដោយ​ធ្វើឲ្យ​អ្នក​ដែល​មិន​មាន​លទ្ធភាព​រក​អង្គរក្ស​អាជីព​ទៅ​ជួល​មិត្តភក្តិ ឬ​ក៏​គ្រួសារ​របស់​ពួកគេ ជាពិសេស អ្នក​ដែល​ធ្វើការ​ជា​ប៉ូលិស ឬ​យោធា​។

លោក​ថ្លែង​ថា​៖ «​ពួកគេ​ទាំងនោះ គ្រាន់តែ​ជា​ប៉ូលិស​ចរាចរណ៍ ដែល​មាន​កាន់​កាំភ្លើង​តែ​ប៉ុណ្ណោះ​»​។

សន្តិសុខ​ផ្ទាល់​ខ្លួន គឺជា​អ្នក​ជិតស្និទ្ធ​របស់​អ្នកចម្រៀង ខេមរៈ សេរីមន្ត​។ នៅពេល​លោក​បង្ហាញ​ខ្លួន​ជា​សាធារណៈ លោក​ចង់​ឲ្យ​បងប្អូន​ជីដូន​មួយ​ពីរ​នាក់​ទៅ​ជាមួយ​គាត់។

លោក​បាន​ថ្លែង​ថា៖ «​ពួកគេ​ការពារ​ខ្ញុំ នៅពេល​មនុស្ស​មក​ស្វាគមន៍​ខ្ញុំ​។ ពួកគេ​ត្រូវ​ទុក​ចន្លោះ​ជុំវិញ​ខ្ញុំ។ ម្នាក់​គឺជា​អ្នក​បើកបរ​របស់​ខ្ញុំ​»។ លោក​បន្ថែម​ថា ម្នាក់​ទៀត​គឺជា​ជំនួយការ​ផ្ទាល់​ខ្លួន ដែល​មាន​ការងារ​ផ្តល់​យោបល់​ឲ្យ​លោក ខេមរៈ សេរីមន្ត​អំពី​ការ​សម្តែង​របស់​លោក​។

តំណែង​ទាំងនេះ គឺ​ទទួល​បាន​ប្រាក់ឈ្នួល ប៉ុន្តែ​ការងារ​ទាំងនេះ មិនមែន​ជា​ការងារ​ផ្លូវការ​ពេញ​ម៉ោង​ទេ។ លោក​បាន​បន្ថែម​ថា៖ «​អ្នក​ខ្លះ​គិត​ថា គេ​ជា​អង្គរក្ស​ខ្ញុំ ប៉ុន្តែ​គេ​ក៏​មាន​ការងារ​ផ្ទាល់​ខ្លួន​ដែរ។ ប្រសិន​បើ​គេ​ជាប់​រវល់ ខ្ញុំ​ហៅ​បងប្អូន​ជីដូន​មួយ​ផ្សេង​ទៀត​របស់​ខ្ញុំ»។

ក្នុង​វិស័យ​ដទៃ​ទៀត សន្តិសុខ​ផ្ទាល់ខ្លួន មាន​លក្ខណៈ​បណ្តោះអាសន្ន​ដូច​គ្នា​។

ល្បី​ថា​មាន​អំពើ​ពុករលួយ និង​ចលាចល​កម្មករ វិស័យ​កាត់ដេរ គឺជា​វិស័យ​នាំ​ចេញ​ធំ​បំផុត​របស់​កម្ពុជា។ ចាប់​តាំងពី​ចលនា​សហជីព​ឯករាជ្យ ទទួល​រង​ការ​ប៉ះទង្គិច​ក្នុង​ទសវត្សរ៍​ទី ៩០ មេដឹកនាំ​សហជីព​ជាច្រើន​ត្រូវ​បាន​គេ​សម្លាប់ នៅពេល​បំពេញ​ការងារ​របស់​ខ្លួន។

នៅពេល​លោក អាត់ ធន់ ប្រធាន​សហជីព ស៊ីខៅឌូ បាន​ទទួល​ពាក្យ​គំរាម​សម្លាប់​ដោយសារ​វិវាទ​រោងចក្រ លោក​មិន​មាន​លទ្ធភាព​ជួល​អង្គរក្ស​អាជីព​ទេ។ ដូច្នេះ លោក​ជួល​សេវា​មិត្ត​សហជីព ២ នាក់ ឲ្យ​ការពារ​លោក។

លោក​បាន​បន្ត​ថា៖ «​នៅពេល​ខ្ញុំ​ទៅ​ចរចា ជា​ធម្មតា មនុស្ស​ម្នាក់ ឬ​ពីរ​នាក់​ទៅ​តាម​។ ប្រាកដ​ណាស់ ជា​ការ​ល្អ​ប្រសើរ ដែល​មាន​អង្គរក្ស​ផ្ទាល់​ខ្លួន ប៉ុន្តែ ឥឡូវ​នេះ ខ្ញុំ​គ្មាន​ប្រាក់​ទេ»។

លោក ជួន មុំថុល ប្រធាន​សហព័ន្ធ​សហជីព​កម្ពុជា ដែល​ចងសម្ព័ន្ធ​នឹង​រដ្ឋាភិបាល ដឹង​ថា ខ្លួន​ទទួល​បាន​ការ​ការពារ​ពី​រាល់​ការ​គំរាម បើ​ទោះបី​ជា​លោក​មិន​ដឹង​ថា តើ​ការ​គំរាម​ទាំងនោះ អាច​ជា​អ្វី​ក៏ដោយ។

លោក​បន្ត​ថា៖ «​ខ្ញុំ​មាន​អង្គរក្ស​ពីរ​នាក់។ ខ្ញុំ​គ្មាន​អ្នក​ណា​គំរាម​ខ្ញុំ​ទេ។ ប៉ុន្តែ អ្នក​មិន​ដឹង​ទេ​ថា​តើ អ្នក​ណា​ដែល​ស្អប់​អ្នក​»។ អង្គរក្ស​របស់​លោក មុំថុល បាន​ហាត់​ក្បាច់គុន ប៉ុន្តែ ពួកគេ​ក៏​ធ្វើ​ជា​ជំនួយការ​ផ្ទាល់​ខ្លួន​ដែរ ដោយ​ម្នាក់​គឺជា​អ្នក​បើកបរ​ដែល​ប៉ិនប្រសប់​ក្នុង​ការ​ជួសជុល​ម៉ាស៊ីន។

នៅពេល​ក្រសួង​មហាផ្ទៃ​ផ្តល់​ការ​ការពារ​ដល់​មន្រ្តី​រដ្ឋាភិបាល​ជាន់ខ្ពស់​មន្រ្តី​រដ្ឋាភិបាល​មួយ​ចំនួន ក៏​ចង់​បាន​មនុស្ស​ផ្ទាល់​ខ្លួន ជាពិសេស ប្រសិន​បើ​ពួកគេ​មាន​ផលប្រយោន៍​ផ្នែក​ពាណិជ្ជកម្ម។

លោក​ឧកញ៉ា ម៉ុង ឫទ្ធី ព្រឹទ្ធសមាជិក​គណបក្ស​កាន់​អំណាច ដែល​មាន​អាជីវកម្ម​ប្រេង​ដូង និង​សត្វ​ចិញ្ចឹម បាន​ថ្លែង​ថា៖ «​ខ្ញុំ​មិន​ជួល​មនុស្ស​ដែល​ខ្ញុំ​មិន​ស្គាល់​ឲ្យ​ធ្វើ​ជា​អង្គរក្ស​ខ្ញុំ​ទេ​»។

លោក​បញ្ជាក់​ថា៖ «​ខ្ញុំ​មាន​ក្មួយ​ពីរ​នាក់​តាម​ខ្ញុំ គឺ​អស់​រយៈពេល​១៨ ឆ្នាំ​មក​ហើយ។ ម្នាក់​គឺជា​អ្នក​បើក​ឡាន​ម្នាក់​ទៀត​ការពារ​ខ្ញុំ​ឬ​ថែរក្សា​ឯកសារ​សំខាន់ៗ»​។

លោក​បន្ថែម​ថា ពាណិជ្ជករ​ភាគច្រើន​គ្មាន​អង្គរក្ស​ឬ​អាវុធ​ទេ។ លោក​បន្ថែម​ថា៖ «​តើ​ក្មួយ​ខ្ញុំ​គឺជា​អង្គរក្ស​ឬ?ខ្ញុំ​មិន​អាច​និយាយ​បាន​ទេ។ គេ​គ្មាន​កាន់​កាំភ្លើង​ទេ​»។

ដោយ​អង្គរក្ស​អាជីព អាច​ជួល​ដោយ​ផ្ទាល់​ពី​ក្រសួង​មហាផ្ទៃ វា​ប្រហែល​មិនមែន​ជា​ការ​ភ្ញាក់ផ្អើល​ទេ ដែល​ពួកគេ​មាន​វត្តមាន​ច្រើន​ក្នុង​វិស័យ​សាធារណៈ។

ខណៈ​ដែល​ទ្រឹស្តី​មួយ គឺ​អង្គរក្ស​ល្អ គ្មាន​គេ​មើល​ឃើញ អង្គរក្ស​មួយ​ចំនួន ដែល​ធ្វើការ​ឲ្យ​មន្រ្តី​ជាន់ខ្ពស់ បាន​លេច​ឈ្មោះ លើ​សារព័ត៌មាន​ពី​បទ​កិបកេង កាន់​អាវុធ​ខុស​ច្បាប់ និង​ឧក្រិដ្ឋកម្ម​ដទៃ​ទៀត។ ក្នុង​ឆ្នាំ ១៩៩៨ អង្គរក្ស​អភិបាល​ខេត្ត​កំពង់ស្ពឺ បាន​សម្លាប់​ក្មេងប្រុស​១៦ ឆ្នាំ​ម្នាក់ ដែល​បាន​ឡើង​របង​ផ្ទះ​របស់​អភិបាល ដើម្បី​លួច​មាន់​។

យោងតាម​អង្គការ​សិទិ្ធមនុស្ស បាន​ឲ្យ​ដឹង​ថា ជនរងគ្រោះ​ត្រូវ​បាន​គេ​ចង ធ្វើ​ទារុណកម្ម និង​បាញ់ យ៉ាង​ហោច​ណាស់ ១០ ដង​។ គ្មាន​ការ​ចោទប្រកាន់​ឡើយ​ក្នុង​ករណី​នេះ។ រីឯ​អង្គរក្ស​ដែល​ទទួល​បន្ទុក​ការពារ​លោក សម រង្ស៊ី ប្រធាន​គណបក្ស​សង្គ្រោះ​ជាតិ បាន​ថ្លែង​ថា លោក​បាន​ហាត់​ក្បាច់គុន ដែល​បង់​ដោយ​គណបក្ស នៅ​ជប៉ុន និង​ចិន ដើម្បី​ការពារ​មេដឹកនាំ​គណបក្ស​ប្រឆាំង​ពី​ការ​គំរាមកំហែង។

លោក​បាន​បន្ត​ថា៖ «​យើង​ត្រូវ​គិត​ពី​របៀប​ការពារ​មេ​យើង​។ ពេល​មេ​ដេក ឬ​រីករាយ ជា​ពេល​យើង​ត្រូវ​ត្រៀម​ខ្លួន»។

ទោះ​ជា​យ៉ាង​ណា លោក យឹម សុវណ្ណ តំណាងរាស្រ្ត​គណបក្ស​សង្គ្រោះ​ជាតិ បាន​ថ្លែង​ថា គណបក្ស​ប្រឆាំង​មិន​បាន​បង់​ថ្លៃ​ហាត់​ទេ។ សន្តិសុខ​ដែល​គណបក្ស​មាន​គឺ​ភាគច្រើន​ជា​អ្នក​ស្ម័គ្រចិត្ត ដែល​អម​ដំណើរ​លោក សម រង្ស៊ី និង​លោក​អនុប្រធាន កឹម សុខា។

លោក សុវណ្ណ​ផ្ទាល់​មាន​អ្នក​បើក​ឡាន តែ​គ្មាន​អង្គរក្ស​ទេ។ លោក​បាន​បញ្ជាក់​ថា៖ «​ពី​មុន​មាន​ការ​ធ្វើ​ឃាត​ជាច្រើន​។ ឥឡូវ​នេះ គេ​ប្រើ​តុលាការ​»។

ទោះ​ជា​យ៉ាង​នេះ​ក្តី ក្នុង​អំឡុង​ពេល​ជាប់គាំង​នយោបាយ បន្ទាប់ពី​ការ​បោះឆ្នោត​ឆ្នាំ​មុន លោក សុវណ្ណ បាន​ថ្លែង​ថា លោក និង​តំណាងរាស្រ្ត​ដទៃ​ទៀត បាន​មើល​ឃើញ​បុរស​ពាក់​ឯកសណ្ឋាន​ស៊ីវិល ឃ្លាំមើល​ពួក​លោក​ពី​ខាង​ក្រៅ​ផ្ទះ។

លោក​បាន​បន្ថែម​ថា៖ «​ពួកគេ​នៅ​ទី​នោះ​អស់​ច្រើន​ខែ។ នៅ​ចុង​ផ្លូវ​ទាំង​ពីរ ខ្ញុំ​បាន​ជួប​ពួកគេ ថតរូប​ពួកគេ ហើយ​ប្រាប់​ពួកគេ​ថា ខ្ញុំ​ដឹង​ថា​ពួកគេ​ឃ្លាំ​មើល​ខ្ញុំ​។ យើង​ត្រូវ​ក្លាហាន»។

ការ​វាយ​ឬ​អំពើ​គឃ្លើន​ដទៃៗ​ទៀត​ពី​សំណាក់​ក្រុម​អង្គរក្ស​នៅ​បៀរហ្គាឌិន ក្លិប និង​ភោជនីយដ្ឋាន រឹតតែ​ធ្វើឲ្យ​មាន​គំរូ​មិន​ល្អ​នេះ​។ នោះ​ជា​មន្រ្តី​ជាន់ខ្ពស់​ឬ​ឧកញ៉ា ឬ​កូន​របស់​ពួកគេ ដែល​ដើរ​ចូល​ទៅ​កន្លែង​ទាំងនោះ​បង្ក​បញ្ហា​តាម​អំពើចិត្ត។ វា​បង្កើត​ឲ្យ​មាន​ទិដ្ឋភាព​ដែល​បង្ក​ក្តីបារម្ភ​ដល់​អាជីវកម្ម​មួយ​ចំនួន​។

លោក រស្មី មន្រ្តី​ផ្នែក​រដ្ឋបាល​នៅ​ក្លិប​រាត្រី​មួយ​ក្នុង​រាជធានី​បាន​ថ្លែង​ថា​៖ «​ពួកគេ​ជា​មនុស្ស​ជាន់ខ្ពស់ ពួកគេ​យក​អង្គរក្ស​មក​ជាមួយ​»។ «ពួកគេ​គិត​អំពី​សុវត្ថិភាព​របស់​ពួកគេ​ឬ​ក៏​ដើម្បី​បង្ហាញ​អំណាច​របស់​ខ្លួន។ អង្គរក្ស​របស់​ពួកគេ​ពេល​ខ្លះ​ជា​ទាហាន​។ ពួកគេ​មាន​កាំភ្លើង​។ យើង​បារម្ភ​អំពី​បញ្ហា​នោះ​»។

ដូច​ក្លិប​ដទៃៗ​ទៀត​ក្នុង​រាជធានី​ភ្នំពេញ​ដែរ លោក Tyler Chan ម្ចាស់​ក្លិប BLVD នៅ​ផ្លូវ​សុធា​រស់ ថ្លែង​ថា​ក្លិប​របស់​លោក​ហាមប្រាម​យ៉ាង​តឹងរ៉ឹង​មិន​ឲ្យ​មាន​ការ​យក​អាវុធ​ចូល​។ ការ​ការពារ​សន្តិសុខ គឺ​មាន​លក្ខណៈ​តឹងរ៉ឹង​មាន​សុវត្ថិភាព ប៉ុន្តែ​ពេល​ខ្លះ​អតិថិជន​ជា​អ្នក​មាន​ឬ​មនុស្ស​ជាន់ខ្ពស់​ដែល​នាំ​យក​អង្គរក្ស​មកជា​មួយ​។

លោក​បន្ត​ថា ទោះ​យ៉ាង​ណា​ក្តី វត្តមាន​របស់​ពួកគេ​មិន​បង្ក​បញ្ហា​អ្វី​ទេ​។ លោក Chan បន្ត​ថា​៖ «​យើង​ឃ្លាំមើល​ពួកគេ​ជានិច្ច ហើយ​ពេល​ខ្លះ​ឲ្យ​ពួកគេ​ទៅ​កន្លែង​មួយ​ដាច់​ដោយឡែក​មិនមែន​ជា​ការ​ប្រព្រឹត្ត​ពិសេស​សម្រាប់​ពួកគេ​ទេ ប៉ុន្តែ​ដើម្បី​បញ្ចៀស​ជម្លោះ​ជាមួយ​ភ្ញៀវ​ដទៃ​ទៀត​។ មិន​មាន​បញ្ហា​ទេ​»។

សម្រាប់​មនុស្ស​ជាច្រើន​ក្នុង​រាជធានី​ភ្នំពេញ នោះ​គឺជា​បទពិសោធ​។ ការ​ប្រុងប្រយ័ត្ន​ជានិច្ច គឺ​ធ្វើឲ្យ​ពួកគេ​ចៀសផុត​ពី​បញ្ហា​ជាមួយ​អង្គរក្ស​ភ្ញៀវ​ដទៃ​ទៀត​។ ប៉ុន្តែ​ប្រសិន​បើ​អ្នក​មាន​លុយ​និង​ត្រូវការ​ការពារ អ្នក​គួរ​តែ​រក​អង្គរក្ស​។

Muller នៅ​ក្លិប GSS បាន​ថ្លែង​ថា​៖ «​អ្នក​មិន​ត្រូវ​ធ្វើ​ជា លី ស៊ាវឡុង ទេ ឬ​ដើម្បី​ឈ្នះ​ការ​បាញ់​កាំភ្លើង​ចម្ងាយ​២​គីឡូម៉ែត្រ​ជាមួយ​ទាហាន​នោះ​ទេ​»។ «​ជំនាញ​មួយ​ក្នុង​ចំណោម​ជំនាញ​ដ៏ធំ​បំផុត គឺ​ត្រូវ​តែ​បង្កើតឡើង តាមរយៈ​ប្រាជ្ញា​របស់​អ្នក​។ ប្រសិន​បើ​អ្នក​ដកកាំភ្លើង​ចេញ​មក អ្នក​ប្រាកដ​ជា​មិន​សប្បាយ​ចិត្ត​»។

Muller ថ្លែង​បន្ត​ថា ការ​ដាក់​ខ្លួន​ទាប និង​ការ​កំណត់​ហានិភ័យ សម្រាប់​អតិថិជន​នៅ​កន្លែង​ណា​ដែល​ពួកគេ​ទៅ ហើយ​ពី​មុន​ពេល​អ្នក​ទៅ​ទី​នោះ វា​សំខាន់​ណាស់​។ ឧបករណ៍​ឃ្លាំមើល​ទំនើប ក៏​សំខាន់​ខ្លាំង​ផង​ដែរ​។ «​អ្វី​ដែល​ខ្ញុំ​គាំទ្រ​ឲ្យ​មាន​គឺ​ការ​ប្រើ​បច្ចេកទេស​»។

អ្នកស្រី ម៉ាលីស ដែល​ជា​ស្រ្តី​អ្នក​ជំនួញ​ម្នាក់​ក្នុង​រាជធានី​ភ្នំពេញ មាន​អង្គរក្ស​ដើរ​តាម​គ្រប់​ទីកន្លែង​។

អ្នកស្រី​បាន​ថ្លែង​ថា​៖ «​នៅពេល​គ្រួសារ​របស់​អ្នក​មាន​លុយ អ្នក​ត្រូវការ​អង្គរក្ស​»។ «​វា​មិនមែន​មាន​ន័យ​ថា កម្ពុជា​មិនមែន​ជា​កន្លែង​សុវត្ថិភាព​ទេ... ប៉ុន្តែ​អង្គរក្ស​អាច​ការពារ​អ្នក​»។ អ្នកស្រី ម៉ាលីស ប្រើ​អង្គរក្ស​ការពារ​សមាជិក​គ្រួសារ​និង​អាជីវកម្ម ដោយសារ​អង្គរក្ស​នោះ​អាច​ទុក​ចិត្ត​បាន​។ គាត់​ជា​ទាហាន​ដែល​ទទួល​ការ​បណ្តុះបណ្តាល​នៅ​កងអង្គរក្ស​នៃ​ក្រសួង​មហាផ្ទៃ​។

អ្នកស្រី​បន្ត​ថា​៖ «​ជីវិត​ប្រសើរ​ជាង​ប្រសិន​បើ​យើង​មាន​អង្គរក្ស​»។

ចំណែកឯ​លោក ចន្ថា ដែល​ជា​អង្គរក្ស​ការពារ​ស្ត្រី​អ្នក​ជំនួញ​បាន​ថ្លែង​ថា ដំបូង​លោក​ធ្វើការ​នៅ​ក្រុមហ៊ុន​របស់​ចៅហ្វាយ​របស់​លោក ក្រោយមក​គេ​ដឹង​ថា​លោក​ជា​ទាហាន​អង្គរក្ស ហើយ​ចៅហ្វាយ​ទុកចិត្ត​ទើប​គាត់​ក៏​ត្រូវ​បាន​ចៅហ្វាយ​ជ្រើស​យក​មក​ធ្វើ​ជា​អង្គរក្ស​ប្រចាំ​នៅក្នុង​គ្រួសារ​របស់​ចៅហ្វាយ។

លោក​បាន​ថ្លែង​ថា៖ «​ការងារ​របស់​ខ្ញុំ​គឺ​ការពារ​សុត្ថិភាព​ចៅ​និង​ក្រុម​គ្រួសារ​ជាពិសេស​នៅពេល​ចេញ​ទៅ​ក្រៅ​និង​ជូន​កូនចៅ​ហ្វាយ​ទៅ​សាលារៀន​»។

លោក​បាន​ថ្លែង​ថា លោក​ខុស​ពី​អង្គរក្ស​ដទៃ​ដោយសារ​តែ​ទទួល​បាន​ការ​រៀនសូត្រ​ត្រឹមត្រូវ​អំពី​របៀប​ការពារ មិនមែន​ដូច​អង្គរក្ស​ខ្លះ​ដែល​ជា​សាច់ញាតិ​ពុំ​បាន​ទទួល​ការ​រៀនសូត្រ​ត្រឹមត្រូវ​ដោយ​គ្រាន់តែ​ចេះ​ដើរ​អមៗ​ចៅហ្វាយ​របស់​ខ្លួន​នោះ​ទេ។

លោក​បាន​ថ្លែង​ថា ៖«យើង​បាន​រៀន​ដូច្នេះ​យើង​ដឹង​ពី​របៀប​ការពារ»៕ PS

រាយការណ៍​បន្ថែម​ដោយ ម៉ៃ ទិត្យថារ៉ា

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។