The Phnom Penh Post Search

Search form




Logo of Phnom Penh Post newspaper Phnom Penh Post - ផ្សារ​មូលបត្រ​ថៃ​ផ្តល់​ឱកាស​ដល់​រដ្ឋាភិបាល កម្ពុជា​ធ្វើ​ការ​បោះ​មូល​បត្រ​បំណុល​ដើម្បី​រក​ចំណូល

ផ្សារ​មូលបត្រ​ថៃ​ផ្តល់​ឱកាស​ដល់​រដ្ឋាភិបាល កម្ពុជា​ធ្វើ​ការ​បោះ​មូល​បត្រ​បំណុល​ដើម្បី​រក​ចំណូល

ផ្ទាំងអេក្រង់នៃប្រតិបត្តិការជួញដូររបស់ផ្សារមូលបត្រថៃ។ រូបថត Bloomberg
ផ្ទាំងអេក្រង់នៃប្រតិបត្តិការជួញដូររបស់ផ្សារមូលបត្រថៃ។ រូបថត Bloomberg

ផ្សារ​មូលបត្រ​ថៃ​ផ្តល់​ឱកាស​ដល់​រដ្ឋាភិបាល កម្ពុជា​ធ្វើ​ការ​បោះ​មូល​បត្រ​បំណុល​ដើម្បី​រក​ចំណូល

ខណៈ​ប្រទេស​ថៃ​គ្រោង​នឹង​ផ្តល់​លទ្ធភាព​ឲ្យ​មូល​បត្រ​បំណុល​កម្ពុជា​ដាក់​លក់​នៅ​ទីផ្សារ​ក្នុង​ស្រុក​របស់​ខ្លួន​នោះ ក្រុម​អ្នក​ជំនាញ​មាន​ទំនុក​ចិត្ត​ថា មូល​ប​ត្រ​បំណុល​ផ្តល់​ចំណូល​ថេរ អាចជា​ផលិតផល​ដែល​មាន​ភាព​ទាក់ទាញ​មួយ​សម្រាប់​វិនិយោគិន​ធំៗ​នៅក្នុង​ទីផ្សារ ព្រម​ទាំង​ផ្តល់​លទ្ធភាព​ដល់​ប្រទេស​កម្ពុជា​ឈាន​ដល់​កម្រិត​ថ្មី​មួយ​នៃ​ភាព​ចាស់​ទុំ​ផ្នែក​សេដ្ឋកិច្ច។

កាលពី​ថ្ងៃទី​២០ ខែតុលា​កន្លង​ទៅ​នេះ រដ្ឋ​មន្ត្រី​ហិរញ្ញវត្ថុ​ថៃ បាន​ប្រកាស​ថា ខ្លួន​បាន​អនុញ្ញាត​ឲ្យ​ប្រទេស​កម្ពុជា វៀតណាម និង​ មីយ៉ាន់ម៉ា ប្រមូល​មូលធន​តាម​រយៈ​ការ​បោះ​ផ្សាយ​មូល​បត្រ​បំណុល​រដ្ឋាភិបាល​នៅ​ទីផ្សារ​ហិរញ្ញ​វត្ថុ​ក្នុង​ប្រទេស​ថៃ។

កាលពី​ខែមករា ឆ្នាំ ២០១៣ រដ្ឋាភិបាល​ថៃ​បាន​ប្រកាស​ពី​ការធ្វើ​វិសោធន​កម្ម​ បទប្បញ្ញតិ្ត មួយ​ចំនួន​ដើម្បី​ផ្តល់​លទ្ធភាព​ឲ្យ​មូលបត្រ​បំណុល​រដ្ឋាភិបាល​ដែល​មិន​ទាន់​បាន​វាយ​តម្លៃ អាច​ដាក់​លក់​នៅ​ទីផ្សារ​របស់​ខ្លួន។

លោក Adisorn Singhsacha អគ្គនាយក​គ្រប់គ្រង​ប្រចាំ​ក្រុមហ៊ុន Twin Pine Consulting ដែល​ជា​ក្រុមហ៊ុន​ប្រឹក្សា​យោបល់​ផ្នែក​ហិរញ្ញវត្ថុ​របស់​ថៃ​ដែល​កំពុង​សហការ​ជាមួយ​នឹង​រដ្ឋាភិបាល​កម្ពុជា​ដើម្បី​សិក្សា​បញ្ចប់​ពី​ការ​បោះ​ផ្សាយ​លក់​មូល​បត្រ​ជា​សាធារណៈ​បាន​ថ្លែង​ថា៖ «ប្រទេស​កម្ពុជា​មាន​ធនធាន​ធម្មជាតិ​ច្រើន ដែល​នៅ​មិន​ទាន់​បាន​រុករក​នៅ​ឡើយ។ ដូច្នេះ​ប្រទេស​នេះ​មាន​សក្តានុពល​ប្រាក់​ចំណូល»។

លោក​បាន​បន្តថា​៖ «ការ​ធ្វើ​សមាហរណកម្ម​អាស៊ាន​នឹង​ធ្វើ​ឲ្យ​ទីផ្សារ​មួយ​នេះ​កាន់​តែ​ធំ ហើយ​តំបន់​នេះ​នឹង​ទទួល​បាន​ចំណាប់​អារម្មណ៍​កាន់​តែ​ខ្លាំង»។

ដោយសារ​ពុំទាន់​មាន​កាល​បរិច្ឆេទ​កំណត់​ក្នុង​ការ​ចេញ​ផ្សាយ​នៅ​ឡើយ​នោះ លោក Adisorn បាន​ឲ្យ​ដឹងថា ប្រទេស​កម្ពុជា​មាន​លទ្ធភាព​ខ្ពស់​ក្នុង​ការ​បោះផ្សាយ​លក់​មូលបត្រ​បំណុល ដែល​នឹង​ត្រូវ​បោះ​ផ្សាយ​លក់​ជា​ប្រាក់​បាត និង​មិន​ចាំបាច់​ត្រូវ​បាន​វាយ​តម្លៃ​ដោយ​ទីភ្នាក់ងារ​ផ្តល់​ចំណាត់​ថ្នាក់​បំណុល​នោះទេ ហើយ​ការបោះ​ផ្សាយ​មូលបត្រ​បំណុល​នេះ នឹង​ក្លាយ​ជា​ការ​ពិត​នៅ​ក្នុង​ពេល​ដ៏​ខ្លី​ខាង​មុខ​នេះ។

ព័ត៌មាន​នេះ បានចេញ​ផ្សាយ បន្ទាប់ពី​រដ្ឋាភិបាល​ឡាវ បាន​បោះផ្សាយ​លក់​មូលបត្រ​បំណុល​រយៈពេល​ ៣​ឆ្នាំ​តម្លៃ ៥០ ​លាន​ដុល្លារ​កាល​ពី​ខែ ឧសភា ឆ្នាំមុន ដោយ​ផ្តល់​ទិន្នផល​ ៤,៥ ​ភាគរយ។ ការ​ប្រមូល​មូលធន​ជា​បន្ត​បន្ទាប់​ចំនួន​ពីរ​លើក​ទៀត​ត្រូវ​បាន​ធ្វើ​ឡើង​តាម​រយៈ​ការ​បោះ​ផ្សាយ​លក់​មូលបត្រ​បំណុល​បែប​នេះ គឺ​ចំនួន ៣ ពាន់​លាន​បាត និង​ ៤,៥ ​ពាន់​លាន​បាត។

កម្មករ​កំពុង​កាយ​ដី​បង្ហូរ​ទឹក​នៅ​មុខ​សំណង់​ស្ពាន​ជ្រោយ​ចង្វារ​២​កាល​ពី​ខែ​កុម្ភៈ។ ការណ៍​នេះ​រដ្ឋាភិបាល​អាច​នឹង​រក​ចំណូល​បាន​បន្ថែម។
កម្មករ​កំពុង​កាយ​ដី​បង្ហូរ​ទឹក​នៅ​មុខ​សំណង់​ស្ពាន​ជ្រោយ​ចង្វារ​២​កាល​ពី​ខែ​កុម្ភៈ។ ការណ៍​នេះ​រដ្ឋាភិបាល​អាច​នឹង​រក​ចំណូល​បាន​បន្ថែម។ ហុង មិនា

យោងតាម​លោក Adisorn បាន​ឲ្យ​ដឹងថា រដ្ឋាភិបាល​កម្ពុជា នឹង​ទទួល​បាន​ប្រាក់​ចំណេញ​ពី​ការ​បោះ​ផ្សាយ​លក់​មូលបត្រ​បំណុល​ដោយ​គ្មាន​លក្ខខណ្ឌ​នេះ។

លោក​បាន​ថ្លែង​បន្ត​ថា ការ​បោះ​ផ្សាយ​លក់​មូល​ប​ត្រ​បំណុល​នៅ​ទីផ្សារ​មូល​ធន​ថៃ​នេះ អាច​កាត់​បន្ថយ​បាន​ច្រើន​ចំពោះ​ការ​ពឹង​ផ្អែក​របស់​កម្ពុជា​លើ​ម្ចាស់​ជំនួយ​នានា​ដូចជា ធនាគារ​ពិភព​លោក ធនាគារ​អភិវឌ្ឍន៍​អាស៊ី និង​ប្រភព​ជំនួយ​អភិវឌ្ឍន៍​ផ្លូវការ​ផ្សេង​ទៀត ដែល​ភាគ​ច្រើន​មាន​លក្ខខណ្ឌ​រឹតត្បិត ដែល​តម្រូវ​ឲ្យ​បង្ហាញ​ពី​វិធី​ប្រើ​ប្រាស់​ប្រាក់​ជំនួយ​ទាំង​នោះ។

លោក​បាន​បន្ត​ឲ្យ​ដឹងថា៖«​​នៅ​ពេល​ដែល​រដ្ឋាភិបាល​កម្ពុជា​ចាប់​ផ្តើម​បោះផ្សាយ​លក់​មូលបត្រ​បំណុល​រដ្ឋាភិបាល ពួកគេ​អាច​បង្ហាញ​គោល​ការណ៍​នានា ដែល​នឹង​ត្រូវ​ប្រើ​ប្រាស់​ដើម្បី​ធ្វើ​ហិរញ្ញប្បទាន​ថវិកា ពោល​គឺ​គ្រប់​យ៉ាង​អាចអនុវត្ត​បាន»។

លោក​មាន ប្រសាសន៍​ទៀតថា ផលប៉ះពាល់​អវិជ្ជមាន​តែ​មួយ​គត់​គឺថា​ អត្រា​ការប្រាក់​មូលបត្រ​បំណុល​​ដែល​ប្រែ​ប្រួល​តាម​ទីផ្សារ មាន​កម្រិត​ខ្ពស់​ជាង​អត្រា​ការ​ប្រាក់​របស់​ឥណទាន​ជំនួយ​បរទេស​។​

រដ្ឋាភិបាល​កម្ពុជា ទទួល​បាន​ហិរញ្ញប្ប​ទាន​ជាង​ ១,០៦ ពាន់​លាន​ដុល្លារ​ពី​មូលនិធិ​បរទេស​នៅ​ឆ្នាំ​២០១៣ ពោលគឺ​កើន​ឡើង​ជិត​ ១០​ ភាគរយ ធៀប​នឹង​ហិរញ្ញប្បទាន​ចំនួន ៩៧២ ​លាន​ដុល្លារ​នៅ​ឆ្នាំ ​២០១២។ នេះ​បើ​យោង​តាម​​របាយការណ៍​ស្តីពី​ថវិកា​កាលពី​ឆ្នាំមុន​។

របាយការណ៍​ហិរញ្ញវត្ថុ​បាន​ចេញ​ផ្សាយ​កាលពី​ថ្ងៃទី​៨ ខែឧសភា​ឆ្នាំនេះ បង្ហាញ​ថា ឱនភាព​ថវិកា​កម្ពុជា​មាន​ចំនួន ២៧២​ លាន​ដុល្លារ​។​

លោក Adisorn បាន​ប្រាប់​ឲ្យ​ដឹងថា ការ​បោះ​ផ្សាយ​លក់​មូលបត្រ​បំណុល​របស់​រដ្ឋាភិបាល​​កម្ពុជា អាច​បង្កើត​ជា​វិធាន​ការ​នាពេល​អនាគត​សម្រាប់​ស្ថានភាព​សេដ្ឋកិច្ច​ទូទៅ​នៅ​កម្ពុជា និង​ដើរ​តួនាទី​ជា​ការ​វាស់​ស្ទង់​ការ​វិនិយោគ​នា​ពេល​អនាគត។

លោក​មានប្រសាសន៍ថា​៖ «​បើ​រដ្ឋាភិបាល​ដឹក​នាំ​តាម​វិធី​នេះ រដ្ឋាភិបាល​កំពុង​ត្រួស​ត្រាយ​ផ្លូវ​ឲ្យ​ក្រុមហ៊ុន សហគ្រាស​រដ្ឋ ឬ​ភាពជា​ដៃគូ​សាធារណៈ​និង​ឯកជន​ចូល​ទីផ្សារ​មូលបត្រ​បំណុល»។

លោក Jayant Menon សេដ្ឋវិទូ​ជាន់​ខ្ពស់​នៅ​ធនាគារ​អភិវឌ្ឍន៍​អាស៊ី​បាន​ថ្លែង​ថា ការ​បោះ​ផ្សាយ​មូលបត្រ​បំណុល​រដ្ឋាភិបាល​កម្ពុជា​នឹង​ត្រូវ​មាន​ទិន្នផល​ខ្ពស់ ពោល​គឺ​អត្រា​ការ​ប្រាក់​ខ្ពស់​ដើម្បី​ទាក់ទាញ​វិនិយោគិន​មក​ទិញ​មូលបត្រ​បំណុល​រដ្ឋាភិបាល​​ពី​រដ្ឋាភិបាល​ដែល​មាន​ទីផ្សារ​មូលបត្រ​តិច​តួច​និង​មិន​ទាន់​បាន​វាយ​តម្លៃ។

លោក​បាន​ថ្លែងបន្តថា៖ «ខ្ញុំ​នឹងមិន​បង្ហាញ​ពី​តួលេខ​ស្តីពី​អត្រា​ការប្រាក់​នេះ​ទេ តែ ដោយ​សារ​ហានិភ័យ​ដែល​មាន​ស្រាប់ វា​នឹង​ក្លាយជា​​ការចំណាយ​ច្រើន​»​។​

ឥណទាន​​របស់​ធនាគា​រ​អភិវឌ្ឍន៍អាស៊ី​ផ្តល់ជូន​​កម្ពុជា​គិត​ត្រឹម​ថ្ងៃទី​៣១ ខែធ្នូ ឆ្នាំ​២០១៣​ មាន​ចំនួន​សរុប​ជាង​ ១,៩​ ពាន់​​លាន​ដុល្លារ​។​

ទីភ្នាក់ងារ​ផ្តល់​ចំណាត់ថ្នាក់​ឥណទាន​អន្តរជាតិ ស​ន្ទ​ស្សន៍​មូល​ប​ត្រ​បំណុល​រដ្ឋ​ដែល​ពុំទាន់​បាន​វាយតម្លៃ​របស់​ក្រុមហ៊ុន Standard and Poors កាលពី​ថ្ងៃទី​២៩ ខែតុលា បាន​បង្ហាញ​ថា ការ​ដល់​កំណត់​សង​រយៈ​ពេល​មធ្យម​របស់​ទីផ្សារ​មូលបត្រ​ដែល​ពុំបាន​វាយ​តម្លៃ មាន​រយៈពេល​១៩​ឆ្នាំ និង​មាន​ទិន្នផល​ជា​មធ្យម ៥,៩៥​ ភាគរយ​។

លោក Menon បាន​បន្ត​ឲ្យ​ដឹង​ទៀតថា មូល​ប​ត្រ​បំណុល​ជា​ប្រាក់​រៀល នឹង​ក្លាយ​ជា​ការ​អភិវឌ្ឍ​ដ៏​ប្រសើរ​មួយ​នៅក្នុង​ការ​កាត់​បន្ថយ​ការ​ពឹង​ផ្អែក​របស់​កម្ពុជា​លើ​ប្រាក់​ដុល្លារ​។ ទន្ទឹម​នឹង​នោះដែរ លោក​មាន ប្រសាសន៍​ថា មូលបត្រ​បំណុល​ជា​ប្រាក់​បាត​នឹង​ដើរ​តួនាទី​ជា​មធ្យោបាយ​សំខាន់​មួយ​នៅក្នុង​ការអភិវឌ្ឍ​សេដ្ឋកិច្ច​កម្ពុជា។

លោក​មានប្រសាសន៍​បន្ត​ថា​៖ «​បច្ចុប្បន្ន​ការ​ខ្ចី​ប្រាក់​ដើម្បី​វិនិយោគ​នាពេល​អនាគត វា​គឺជា​ហានិភ័យ​សំខាន់​មួយ ដែល​ត្រូវ​ដោះ​ស្រាយ​បញ្ហា​ប្រឈម​ចំពោះ​ការ​អភិវឌ្ឍ​ជា​ច្រើន ដើម្បី​កាត់​បន្ថយ​ភាពក្រីក្រ​»​។​

លោក Grant Knuckey នាយក​ប្រតិបត្តិ​ធនាគារ ANZ Royal បានបង្ហាញ​ពី​ទំនុកចិត្ត​ដូច្នេះ​ដែរ​ចំពោះ​ការបោះ​ផ្សាយ​មូលបត្រ​បំណុល​ផ្តល់​ចំណូល​ថេរ​នៃ​រដ្ឋាភិបាល​កម្ពុជា ដោយ​​លើក​ឡើង​ពី​តម្រូវ​ការ​ទីផ្សារ​ចំពោះ​មូល​ប​ត្រ​បំណុល​រដ្ឋាភិបាល​ដែល​មាន​ហានិភ័យ​​ និង​ទិន្នផល​ខ្ពស់​បែបនេះ​។​

លោក​មានប្រសាសន៍​បន្ត​ថា​៖ «​ប្រទេស​ឡាវ បាន​​បោះផ្សាយ​លក់​មូល​ប​ត្រ​បំណុល​ចំនួន​តិច​តួច​រួច​ទៅ​ហើយ​ក្នុង​រយៈពេល​ ១២ ​ខែ​ចុង​ក្រោយ​នេះ ហើយ​នៅ​មិន​ទាន់​មាន​បញ្ហា​អ្វី​កើត​ឡើង​ក្នុងការ​បោះផ្សាយ​លក់​មូលបត្រ​បំណុល​បែប​នេះ​នៅ​ឡើយ​ទេ»៕ BP

អត្ថបទគួរចាប់អារម្មណ៍