The Phnom Penh Post Search

Search form

Logo of Phnom Penh Post newspaper Phnom Penh Post - ភាព​យឺត​យ៉ាវ​នៃ​ការ​អភិវឌ្ឍ​ហេដ្ឋា​រចនា​សម្ព័ន្ធ​នឹង​ប៉ះពាល់​ដល់ AEC

ភាព​យឺត​យ៉ាវ​នៃ​ការ​អភិវឌ្ឍ​ហេដ្ឋា​រចនា​សម្ព័ន្ធ​នឹង​ប៉ះពាល់​ដល់ AEC

កំណាត់​ផ្លូវ​ដែក​របស់​កម្ពុជា​ដែល​ត្រូវ​បាន​ស្តារ​ឡើង​វិញ និង​បាន​ដាក់​ឲ្យ​ដំណើរ​ការ​នា​ពេល​កន្លង​មក​ចាប់​ពី​ស្ថានីយ​រថភ្លើង​ភ្នំពេញ​ទៅ​ដល់​កំពង់ផែ​សមុទ្រ​ទឹក​ជ្រៅ ខេត្ត​ព្រះ​សីហនុ។
កំណាត់​ផ្លូវ​ដែក​របស់​កម្ពុជា​ដែល​ត្រូវ​បាន​ស្តារ​ឡើង​វិញ និង​បាន​ដាក់​ឲ្យ​ដំណើរ​ការ​នា​ពេល​កន្លង​មក​ចាប់​ពី​ស្ថានីយ​រថភ្លើង​ភ្នំពេញ​ទៅ​ដល់​កំពង់ផែ​សមុទ្រ​ទឹក​ជ្រៅ ខេត្ត​ព្រះ​សីហនុ។ ហេង ជីវ័ន

ភាព​យឺត​យ៉ាវ​នៃ​ការ​អភិវឌ្ឍ​ហេដ្ឋា​រចនា​សម្ព័ន្ធ​នឹង​ប៉ះពាល់​ដល់ AEC

អតីត​អគ្គ​លេខាធិការ​អាស៊ាន​បាន​ថ្លែង​កាល​ពី​សប្តាហ៍​មុន​ដោយ​ធ្វើ​ការ​ព្រមាន​ដល់​រដ្ឋាភិបាល​នៃ​បណ្តា​ប្រទេស​ជា​សមាជិក​អាស៊ាន​ទាំង​អស់​គឺ​ត្រូវ​អនុវត្ត​គម្រោង​ហេដ្ឋា​រចនា​សម្ព័ន្ធ​ធំៗ​របស់​ខ្លួន​ឲ្យ​មាន​ប្រសិទ្ធភាព និង​តម្លាភាព បើ​មិន​ដូច្នេះ​ទេ ផែនការ​តភ្ជាប់​តំបន់​អាស៊ាន​អាច​នឹង​បរាជ័យ។

លោក Surin Pitsuwan បាន​អធិប្បាយ​បែប​នេះ ខណៈ​ពេល​ដែល​រូប​លោក​ថ្លែង​សុន្ទរកថា​សំខាន់​មួយ​ដែល​មាន​ចំណង​ជើង​ថា «ផែនទី​បង្ហាញ​ផ្លូវ​សហគមន៍​សេដ្ឋកិច្ច​អាស៊ាន៖ កាលា​នុវត្តភាព និង​បញ្ហា​ប្រឈម» នៅ​កិច្ច​ប្រជុំ​កំពូល​អាស៊ាន​ផ្ទៃ​ក្នុង​ដែល​រៀបចំ​ឡើង​ដោយ​ស្ថាប័ន​នាយក​ប្រតិបត្តិ​វ័យ​ក្មេង​នៅ​ប្រទេស​ថៃ។

លោក​បាន​ថ្លែង​ថា៖ «បើ​ផែនការ​តភ្ជាប់​តំបន់​អាស៊ាន​នេះ​បរាជ័យ វា​នឹង​មាន​ផល​ប៉ះពាល់​ជា​អវិជ្ជមាន​លើ​សហគមន៍​សេដ្ឋកិច្ច​អាស៊ាន (AEC)»។ តែ​ដើម្បី​អនុវត្ត​ផែនការ​ទាំង​នេះ គឺ​យើង​ចាំ​បាច់​ត្រូវ​ធ្វើ​កំណែ​ទម្រង់​ការិយាធិបតេយ្យ»។

លោក​បាន​ថ្លែង​បន្ត​ទៀត​ថា កិច្ច​ព្រម​ព្រៀង​ជា​ច្រើន​ចាំ​បាច់​ត្រូវ​អនុម័ត ហើយ​ច្បាប់ និង​បទ​ប្បញ្ញត្តិ​នានា​ត្រូវ​ធ្វើ​វិសោធនកម្ម​ស្តីពី​បញ្ហា​ផ្សេងៗ ដូច​ជា ពាណិជ្ជកម្ម​តាម​ព្រំដែន និង​ការ​ផ្ទេរ​មូលធន ដើម្បី​សម្រេច​បាន​សមាហរណ​កម្ម​សហគមន៍​សេដ្ឋកិច្ច​អាស៊ាន។

លោក​បាន​មាន​ប្រសាសន៍​ថា៖ «ប្រទេស​ថៃ គឺជា​មូលដ្ឋាន​នៃ​ហេដ្ឋា​រចនា​សម្ព័ន្ធ​ទាំង​អស់​ដែល​នឹង​តភ្ជាប់​តំបន់​អាស៊ាន​នេះ។ ការ​បរាជ័យ​ក្នុង​ការ​អនុវត្ត​គម្រោង​នេះ នឹង​មាន​ផល​ប៉ះពាល់​ជា​អវិជ្ជមាន​ចំពោះ​សហគមន៍​សេដ្ឋកិច្ច​អាស៊ាន»។

លោក​ក៏​បាន​ជំរុញ​ឲ្យ​មាន​ការ​បង្ហាញ​ទិសដៅ​រួម​មួយ​នាពេល​បច្ចុប្បន្ន​ដើម្បី​ធ្វើ​ឲ្យ​គម្រោង​នេះ​អាច​អនុវត្ត​បាន​ដោយ​ជោគជ័យ។

វិស័យ​ហេដ្ឋា​រចនា​សម្ព័ន្ធ​គឺ​ជា​សរសៃ​ឈាម​នៃ​សេដ្ឋកិច្ច ហើយ​ដែល​វា​ជា​បញ្ហា​ចម្បង​របស់​រដ្ឋាភិបាល​កម្ពុជា​ធ្វើ​ការ​ដោះស្រាយ​ដើម្បី​ជួយ​ជំរុញ​កំណើន និង​លើក​កម្ពស់​កម្រិត​ជីវភាព​ប្រជា​ពលរដ្ឋ​ពី​រាជធានី​ដល់​ទី​ជនបទ។
វិស័យ​ហេដ្ឋា​រចនា​សម្ព័ន្ធ​គឺ​ជា​សរសៃ​ឈាម​នៃ​សេដ្ឋកិច្ច ហើយ​ដែល​វា​ជា​បញ្ហា​ចម្បង​របស់​រដ្ឋាភិបាល​កម្ពុជា​ធ្វើ​ការ​ដោះស្រាយ​ដើម្បី​ជួយ​ជំរុញ​កំណើន និង​លើក​កម្ពស់​កម្រិត​ជីវភាព​ប្រជា​ពលរដ្ឋ​ពី​រាជធានី​ដល់​ទី​ជនបទ។ ម៉ៃ វីរៈ

ផែនការ​តភ្ជាប់​តំបន់​អាស៊ាន​នេះ មាន​គោល​បំណង​បំពេញ​បន្ថែម​នូវ​សសរ​សេដ្ឋកិច្ច​របស់​សហគមន៍​សេដ្ឋកិច្ច​អាស៊ាន។ លោក Surin មាន​ប្រសាសន៍​ថា ការិយាធិបតេយ្យ​ចាំ​បាច់​ត្រូវ​មាន​ប្រសិទ្ធភាព និង​តម្លាភាព​ថែម​ទៀត។

អាស៊ាន​គឺ​ជា​ប្រជាជាតិ​ទាំង​ដប់​ដែល​មាន​ចំនួន​ប្រជាជន​សរុប​ចំនួន ៦០០ លាន​នាក់ និង​មាន​ផលិត​ផល​ជាតិ​សរុប (ផសស) ដល់​ទៅ ២ ពាន់​ពាន់​លាន​ដុល្លារ​អាមេរិក និង​ពាណិជ្ជកម្ម​សរុប​ចំនួន ២,២ ពាន់​ពាន់​លាន​ដុល្លារ​អាមេរិក​ក្នុង ឆ្នាំ​២០១១ ដែល​ក្នុង​នោះ ២៦ ភាគរយ​គឺ​នាំ​ចេញ​ទៅ​កាន់​តំបន់​ផ្សេង​ទៀត​ដែល​ជា​ដៃ​គូ​អាស៊ាន។

លើស​ពី​នេះ​ទៅ​ទៀត សហគមន៍​អាស៊ាន​ក៏​បាន​ធ្វើ​ការ​ទាក់​ទាញ​ទឹក​ប្រាក់​វិនិយោគ​ដោយ​ផ្ទាល់​ពី​បរទេស​ប្រមាណ​ជា ៨០ ពាន់​ពាន់​លាន​ដុល្លារ​អាមេរិក​ផង​ដែរ។ នេះ​បើ​យោង​តាម​ទិន្នន័យ​ពី​ស្ថាប័ន​រូបិយវត្ថុ​អន្តជាតិ។

ជាមួយ​នឹង​ការ​កកើត​ឡើង​នៃ​សហគមន៍​សេដ្ឋកិច្ច​អាស៊ាន​នេះ​ដែរ នឹង​ធ្វើ​ឲ្យ​មាន​លំហូរ​ដ៏​សេរី​នៃ​ការ​វិនិយោគ​ពាណិជ្ជកម្ម​កម្លាំង​ពលកម្ម​ជំនាញ​ផ្សេងៗ​ទៀត​ពី​ប្រទេស​សមាជិក​ទៅ​កាន់​គ្នា​ទៅ​វិញ​ទៅ​មក ដែល​នេះ​នឹង​បង្ក​ឲ្យ​ប្រទេស​សមាជិក​ថ្មី​ទំាង​បួន​ដែល​រួម​មាន កម្ពុជា ឡាវ មីយ៉ាន់ម៉ា និង​វៀតណាម (CLMV) ដែល​មាន​ផលិតផល​ជាតិ​សរុប (ផសស) ចំនួន ១៩៤ ពាន់​ពាន់​លាន​ដុល្លារ​អាមេរិក​កាល​ពី ឆ្នាំ​២០១១ នឹង​ទាក់​ទាញ​វិនិយោគ​ដោយ​ផ្ទាល់​ពី​បរទេស​ប្រមាណ​ជា ៨,៦ ពាន់​ពាន់​លាន​ដុល្លារ​អាមេរិក​ដែល​តំណាង​ឲ្យ​ប្រមាណ​ជា ៩,៧ ភាគរយ​នៃ FDI សរុប​នៅ​អាស៊ាន​ទាំង​មូល។

បើ​យោង​តាម​របាយ​ការណ៍​ដែល​បាន​ធ្វើ​ឡើង​រួម​គ្នា​រវាង​ស្ថាប័ន​ហិរញ្ញវត្ថុ​អន្តរជាតិ​កំពូលៗ​មួយ​ចំនួន​ដូច​ជា អង្គការ​សហ​ប្រតិបត្តិការ​អន្តរជាតិ​ជប៉ុន (JICA) ធនាគារ​ពិភពលោក (WB) និង​មូលនិធិ​រូបិយវត្ថុ​អន្តរជាតិ (IMF) បាន​ធ្វើ​ការ​ប៉ាន់​ប្រមាណ​ថា កម្ពុជា​ត្រូវ​ការ​ទឹក​ប្រាក់​ប្រមាណ​ជា ១៣ ពាន់​លាន​ដុល្លារ​សហរដ្ឋ​អាមេរិក​ក្នុង​ការ​ចំណាយ​ទៅ​លើ​ការ​អភិវឌ្ឍ​ហេដ្ឋា​រចនា​សម្ព័ន្ធ​នានា​នៅ​ត្រឹម ឆ្នាំ​២០២០។

របាយ​ការណ៍​ដដែល​នេះ​បាន​លើក​ឡើង​ថា ប្រទេស​មួយ​នេះ​គឺ​ត្រូវ​ការ​ចំណាយ​យ៉ាង​ហោច​ណាស់ ១,២ ពាន់​លាន​ដុល្លារ​សហរដ្ឋ​អាមេរិក​ក្នុង​មួយ​ឆ្នាំៗ ដោយ​ក្នុង​នោះ​ចំនួន​ពាក់​កណ្តាល​គឺ​ដើម្បី​យក​មក​អភិវឌ្ឍ​គម្រោង​ថ្មី​និង​សល់​ពាក់​កណ្តាល​ផ្សេង​ទៀត​ត្រូវ​ទុក​សម្រាប់​ធ្វើ​ការ​ថែទាំ​គម្រោង​ដែល​ធ្វើ​ការ​សាង​សង់​រួច​ហើយ។

របាយ​ការណ៍​បាន​ផ្តល់​ជា​អនុសាសន៍​ផង​ដែរ​ថា ការ​អភិវឌ្ឍ​ដែល​ត្រូវ​ការ​ការ​ចំណាយ​យ៉ាង​ច្រើន​សន្ធឹក​សន្ធាប់​នេះ​ទៅ​រួច​គឺ​គប្បី​រដ្ឋាភិបាល​បើក​ឲ្យ​មាន​ការ​សហការ​រវាង​វិស័យ​ឯកជន និង​រដ្ឋ។

វិស័យ​ហេដ្ឋា​រចនា​សម្ព័ន្ធ​គឺ​ជា​សរសៃ​ឈាម​នៃ​សេដ្ឋកិច្ច ហើយ​ដែល​វា​ជា​បញ្ហា​ចម្បង​របស់​រដ្ឋាភិបាល​កម្ពុជា​ធ្វើ​ការ​ដោះស្រាយ​ដើម្បី​ជួយ​ជំរុញ​កំណើន និង​លើក​កម្ពស់​កម្រិត​ជីវភាព​ប្រជា​ពលរដ្ឋ​ពី​រាជធានី​ដល់​ទី​ជនបទ។
វិស័យ​ហេដ្ឋា​រចនា​សម្ព័ន្ធ​គឺ​ជា​សរសៃ​ឈាម​នៃ​សេដ្ឋកិច្ច ហើយ​ដែល​វា​ជា​បញ្ហា​ចម្បង​របស់​រដ្ឋាភិបាល​កម្ពុជា​ធ្វើ​ការ​ដោះស្រាយ​ដើម្បី​ជួយ​ជំរុញ​កំណើន និង​លើក​កម្ពស់​កម្រិត​ជីវភាព​ប្រជា​ពលរដ្ឋ​ពី​រាជធានី​ដល់​ទី​ជនបទ។ ម៉ៃ វីរៈ

លោក ឈៀង វណ្ណារិទ្ធ សាស្ត្រាចារ្យ​ផ្នែក​នយោបាយ​លើ​តំបន់​អាស៊ី​ប៉ាស៊ីហ្វិក​នៅ​សាកល​វិទ្យល័យ Leeds របស់​ចក្រភព​អង់គ្លេស បាន​ថ្លែង​ប្រាប់​កម្ពុជា​ចុង​សប្តាហ៍​ផង​ដែរ​ថា នៅ​មាន​បញ្ហា​ប្រឈម​ជា​ច្រើន​ទៀត​ដែល​ទាមទារ​ឲ្យ​បណ្ដា​ប្រទេស​សមាជិក​អាស៊ាន​ទាំង​អស់​ខិតខំ​រួម​គ្នា​ធ្វើ​ការ​ដោះស្រាយ​ដើម្បី​សម្រេច​បាន​នូវ​ការ​ធ្វើ​សមាហរណ​កម្ម​សេដ្ឋកិច្ច​អាស៊ាន​ដែល​នឹង​ត្រូវ​លេច​រូបរាង​ឡើង​ក្នុង ឆ្នាំ​២០១៥។

លោក​បាន​ថ្លែង​ថា៖ «ដំណើរ​វិវឌ្ឍន៍​នៃ​នយោបាយ​របស់​ប្រទេស​សមាជិក​មួយ​ចំនួន​នៅ​ក្នុង​អាស៊ាន​មិន​បាន​រួម​ចំណែក​ជួយ​សម្រួល​ដល់​ដំណើការ​កកើត​ឡើង​នៃ AEC ឡើយ។ មាន​កម្លាំង​នយោបាយ​មួយ​ចំនួន​គឺ​វា​ហាក់​ដូច​ជា​មើល​ទៅ​នៅ​មាន​ភាព​លាក់​បាំង​នៅ​ឡើយ ហើយ​ក៏​នៅ​មាន​ក្តី​បារម្ភ​ថា វា​គឺ​ត្រូវ​បាន​គ្រប់​គ្រង​ដោយ​កិច្ចការ​នៅ​ក្នុង​បណ្ដា​ប្រទេស​ទាំង​នោះ»។

ទាក់​ទង​ទៅ​នឹង​ការ​កកើត​ឡើង​នៃ AEC លោក វណ្ណារិទ្ធ សង្កេត​ឃើញ​ថា ប្រទេស​សមាជិក​ដែល​ក្រីក្រ​គឺ​នៅ​តែ​ស្ថិត​នៅ​ពី​ក្រោយ​គេ​ដដែល។

លោក​បាន​ថ្លែង​ថា គម្លាត​នៃ​ការ​អភិវឌ្ឍ គឺ​នៅ​តែ​ធំ ជា​ពិសេស​គឺ​នៅ​កម្រិត​ថ្នាក់​ជាតិ។ ដរាប​ណា​អាស៊ាន​នៅ​តែ​ធ្វើ​ការ​ណែនាំ និង​អនុវត្ត​តាម​ដំណើការ​នៃ​ការ​ធ្វើ​សមាហរណ​កម្ម​ថ្នាក់​តំបន់​ដ៏​ទន់​ខ្សោយ និង​តាម​បែប​ប្រកាន់​យក​តែ​ការ​ធ្វើ​ជំនួញ​នោះ​គឺ​វា​នឹង​មិន​អាច​ទៅ​រួច​នោះ​ឡើយ។

លោក​បាន​ថ្លែង​បន្ត​ថា៖ «កម្ពុជា គឺ​ត្រូវ​ការ​ដាក់​ចេញ​នូវ​របៀប​វារៈ​ទាំង​អស់​នោះ​នៅ​លើ​តុ​ដើម្បី​ធ្វើ​ការ​ពិភាក្សា​ជា​លក្ខណៈ​ចង្អៀត​នូវ​ការ​អភិវឌ្ឍ និង​ជំរុញ​ការ​ការពារ​សង្គម​នៅ​ក្នុង​ក្រប​ខ័ណ្ខ​អាស៊ាន ហើយ​កម្ពុជា​ក៏​ទាមទារ​ផង​ដែរ​នូវ​ការ​ជំរុញ​ឲ្យ​មាន​តម្លាភាព​និង​ប្រសិទ្ធភាព​ការងារ»។

ប្រទេស​កម្ពុជា បាន​ចូល​ជា​សមាជិក​របស់​សមាគម​ប្រជាជាតិ​អាស៊ី​អាគ្នេយ៍​ហៅ​កាត់​ថា អាស៊ាន​នេះ​កាល​ពី ឆ្នាំ​១៩៩៩ ប៉ុន្មាន​ឆ្នាំ​បន្ទាប់​ពី​ខ្លួន​បាន​ធ្វើ​ការ​ផ្លាស់​ប្តូរ​របប​សេដ្ឋកិច្ច​ផែនការ​មក​ជា​របប​សេដ្ឋកិច្ច​តាម​បែប​ទីផ្សារ​សេរី​ក្នុង ឆ្នាំ​១៩៩៥។ បើ​យោង​តាម​តារាង​ពិន្ទុ​របស់​អាស៊ាន​អំពី​ភាព​រួច​រាល់​របស់ AEC បាន​បង្ហាញ​ថា កម្ពុជា​សម្រេច​បាន​ពិន្ទុ​ជាង ៧០ ភាគរយ​ហើយ៕

អត្ថបទគួរចាប់អារម្មណ៍