The Phnom Penh Post Search

Search form




Logo of Phnom Penh Post newspaper Phnom Penh Post - លោក​នាយក​រដ្ឋ​មន្ត្រី ហ៊ុន សែន យល់​ព្រម​ឲ្យ​គណបក្ស​ប្រឆាំង​មាន​ទូរទស្សន៍

លោក​នាយក​រដ្ឋ​មន្ត្រី ហ៊ុន សែន យល់​ព្រម​ឲ្យ​គណបក្ស​ប្រឆាំង​មាន​ទូរទស្សន៍

លោក​នាយក​រដ្ឋ​មន្ត្រី​និង​ប្រធាន​បក្ស​ប្រឆាំង​ស្វាគមន៍​គ្នា​នៅ​វិមាន​រដ្ឋសភា​ម្សិល​មិញ។
លោក​នាយក​រដ្ឋ​មន្ត្រី​និង​ប្រធាន​បក្ស​ប្រឆាំង​ស្វាគមន៍​គ្នា​នៅ​វិមាន​រដ្ឋសភា​ម្សិល​មិញ។ ហេង ជីវ័ន

លោក​នាយក​រដ្ឋ​មន្ត្រី ហ៊ុន សែន យល់​ព្រម​ឲ្យ​គណបក្ស​ប្រឆាំង​មាន​ទូរទស្សន៍

ភ្នំពេញៈ លោក​នាយក​រដ្ឋ​មន្រ្តី ហ៊ុន សែន បាន​បញ្ជា​ឲ្យ​លោក ខៀវ កាញារីទ្ធ រដ្ឋ​មន្រ្តី​ក្រសួង​ព័ត៌មាន អនុញ្ញាត​ផ្តល់ ហ្វ្រេកង់​ប៉ុស្តិ៍​ទូរទស្សន៍​ដល់​គណបក្ស​សង្គ្រោះ​ជាតិ តាម​រយៈ​ក្រុម​ហ៊ុន​ឯកជន ដើម្បី​ដំណើរ​ការ​ផ្សាយ​នៅ​រាជធានី​ភ្នំពេញ និង​តាម​បណ្តា​ខេត្ត​ទូទាំង​ប្រទេស ព្រម​ទាំង​ជំរុញ​ឲ្យ​បញ្ចប់​សេចក្តី​ស្នើ​សេចក្តី​ព្រាង​ច្បាប់​ស្តី​ពី​វិសោធន​កម្ម​ច្បាប់​បោះ​ឆ្នោត​ឲ្យ​រួច​រាល់​នៅ​ដំណាច់ ខែ​កុម្ភៈ ឆ្នាំ​២០១៥ ខាង​មុខ​នេះ។

ការ​សម្រេច​នេះ ធ្វើ​ឡើង​ក្រោម​ជំនួប​បិទ​ទ្វារ​រវាង​ថ្នាក់​ដឹក​នាំ​កំពូល​នៃ​គណបក្ស​ជាប់​ឆ្នោត​ទាំង​ពីរ នៅ​មន្ទីរ​រដ្ឋសភា ក្នុង​ចំណោម​លទ្ធផល បី​ចំណុច។ តាម​សេចក្តី​ប្រកាស​ព័ត៌មាន​រួម​របស់​បក្ស​ទាំង​ពីរ ចុះ​ថ្ងៃ ទី២៨ ខែ​វិច្ឆិកា លោក ហ៊ុន សែន បាន​ផ្តល់​ការ​ឯកភាព​ជា​គោល​ការណ៍​ទៅ​កាន់​ការ​ស្នើ​សុំ​របស់​លោក សម រង្ស៊ី ទាក់​ទង​នឹង​ការ​ដាក់​ដំណើរ​ការ​ស្ថានីយ​ទូរទស្សន៍ និង​ស្ថានីយ​វិទ្យុ​ផ្សាយ​បន្ត​ទៅ​តាម​បណ្តា​ខេត្ត ដោយ​តម្រូវ​ឲ្យ​ក្រុម​ហ៊ុន​ពាក់​ព័ន្ធ​ត្រូវ​បំពេញ​បែប​បទ​ស្នើ​សុំ​អាជ្ញាប័ណ្ណ​នៅ​ក្រសួង​ព័ត៌មាន។

តាម​រយៈ​លិខិត​អនុញ្ញាត​ចុះ​ថ្ងៃ ទី​២៧ ខែ​វិច្ឆិកា ឆ្នាំ​២០១៤ ក្រុម​ហ៊ុន​ដែល​ទទួល​បាន​សិទ្ធិ​ដំណើរ​ការ​ទូរទស្សន៍​នោះ​ឈ្មោះ CAMBODIAN INDEPENDENT MEDIA Co., Ltd មាន​លោក​ស្រី គុណ លំអង ប្រធាន​ក្រុម​ប្រឹក្សា​ភិបាល​ក្រុម​ហ៊ុន។ ក្នុង​លិខិត​នេះ ក្រសួង​ព័ត៌មាន បាន​ពិនិត្យ​ឃើញ​ថា ការ​ស្នើ​ផ្លាស់​ប្តូរ​ប្រព័ន្ធ​ទូរទស្សន៍​ពី Analog ទៅ Digital របស់​ទូរទស្សន៍​ជាតិ​កម្ពុជា (ទទក) នៅ​មាន​រយៈ​ពេល​ច្រើន​ឆ្នាំ​ទៀត​ដោយ​សម្រេច​ដក​ហូត ហ្វ្រេកង់​ពី​ក្រុម​ហ៊ុន​ទូរទស្សន៍​ខ្សែ​កាប​រាជធានី​ភ្នំពេញ​មួយ Channel ហើយ​បាន​អនុញ្ញាត​ឲ្យ​ក្រុម​ហ៊ុន​នេះ ដំណើរ​ការ​ស្ថានីយ​ទូរទស្សន៍​តាម​ប្រព័ន្ធ Analog នៅ​រាជធានី​ភ្នំពេញ និង​តាម​បណ្តា​ខេត្ត ដែល​មាន​កម្លាំង​ផ្សាយ ១០ KW កម្ពស់​បង្គោល​អង់តែន ១២០ម៉ែត្រ និង​ប្រើ Channel UHF-E41 ចំណែក​ស្ថានីយ​តាម​ខេត្ត​មាន​កម្លាំង​ផ្សាយ 1KW កម្ពស់​បង្គោល​អង់តែន ១០០ ម៉ែត្រ និង​ប្រើ Channel ដូច​គ្នា។ តាម​លិខិត​ដដែល​នោះ ក្រុម​ហ៊ុន CAMBODIAN INDEPENDENT MEDIA Co., Ltd ត្រូវ​បំពេញ​បែប​បទ​ស្នើ​សុំ​អាជ្ញាប័ណ្ណ​តាម​ការ​ទាមទារ​របស់​ក្រសួង​ព័ត៌មាន។

ក្នុង​ជំនួប​កំពូល​នេះ​ដែរ ថ្នាក់​ដឹក​នាំ​បក្ស​ទាំង​ពីរ ក៏​បាន​ឯកភាព​គ្នា​ដោះ​ស្រាយ​រាល់​បញ្ហា​សេស​សល់​មិន​ទាន់​ចុះ​សម្រុង​គ្នា លើ​សេចក្តី​ស្នើ​សេចក្តី​ព្រាង​ច្បាប់​ស្តី​ពី​ការ​រៀបចំ​និង​ការ​ប្រព្រឹត្ត​ទៅ​នៃ​គណៈកម្មាធិការ​ជាតិ​រៀបចំ​ការ​បោះ​ឆ្នោត (គជប) ដោយ​ក្រុម​ការងារ​បក្ស​ទាំង​ពីរ បន្ត​ប្រជុំ​នៅ​សប្តាហ៍​ក្រោយ រួម​នឹង​ការ​ជំរុញ​បញ្ចប់​សេចក្តី​ស្នើ​សេចក្តី​ព្រាង​ច្បាប់​ស្តី​ពី​វិសោធន​កម្ម​ច្បាប់​បោះ​ឆ្នោត​ឲ្យ​រួច​រាល់​នៅ​ដំណាច់ ខែ​កុម្ភៈ ឆ្នាំ​២០១៥។

ថ្លែង​ក្នុង​សន្និសីទ​សារ​ព័ត៌មាន មន្រ្តី​ជាន់​ខ្ពស់​គណបក្ស​ប្រជាជន​កម្ពុជា លោក កើត រិទ្ធិ បាន​ឲ្យ​ដឹង​ថា ថ្នាក់​ដឹក​នាំ​កំពូល​បក្ស​ទាំង​ពីរ បាន​ឯកភាព​គ្នា​លើ​លក្ខខណ្ឌ​ដើម្បី​ក្លាយ​ជា​សមាជិក គ.ជ.ប គឺ​ត្រូវ​មាន​សញ្ជាតិ​ខ្មែរ​ពី​កំណើត​និង​មាន​សញ្ជាតិ​តែ​មួយ។ ជាមួយ​គ្នា​នេះ​សមាជិក គ.ជ.ប មិន​ត្រូវ​ជ្រើស​ចេញ​ពី​សាច់​ញាតិ​លោហិត​របស់​មន្រ្តី​គណបក្ស​នយោបាយ​ឡើយ។

ទាក់ទង​នឹង​បញ្ហា​សញ្ជាតិ​នេះ​លោក គួយ ប៊ុនរឿន មន្រ្តី​ជាន់​ខ្ពស់​របស់ CNRP បាន​ថ្លែង​ថា៖ «សម្រាប់​អ្នក​មាន​បំណង​ឬ​អ្នក​ជាប់​ហើយ​ដែល​មាន​សញ្ជាតិ ២ គឺ​អាច​ដាក់​ពាក្យ​លាលែង​សញ្ជាតិ​របស់​ខ្លួន ដើម្បី​ចូល​កាន់​តំណែង។ នៅ​ពេល​បញ្ចប់​ហើយ ពួក​គេ​ក៏​អាច​ទៅ​ទទួល​យក​សញ្ជាតិ​របស់​ពួក​គេ​វិញ​បាន​ដែរ»។

លោក គួយ ប៊ុនរឿន បាន​បន្ត​ឲ្យ​ដឹង​ថា គណបក្ស​ទាំង​ពីរ​ក៏​បាន​សម្រេច​ជុំវិញ​ការ​ជ្រើស​តាំង អគ្គ​លេខាធិការ និង​អគ្គ​លេខាធិការ​រង​របស់​គណៈ​កម្មាធិការ​ជាតិ​រៀបចំ​ការ​បោះ​ឆ្នោត​ថ្មី​គឺ​តាម​រយៈ​ព្រះ​រាជក្រឹត្យ​លើ​សំណើ​ប្រធាន គ.ជ.ប ចំពោះ​សេចក្តី​សម្រេច​មតិ​ភាគ​ច្រើន​របស់ គ.ជ.ប ទាំង​មូល។

ជុំវិញ​ការ​រៀបចំ គ.ជ.ប ថ្មី​នេះ លោក កើត រិទ្ធិ បាន​ឲ្យ​ដឹង​ទៀត​ថា៖ «គណបក្ស​ទាំង​ពីរ​ក៏​បាន​សម្រេច​ដាក់​បញ្ចូល​មន្រ្តី​ទាំង​ឡាយ​របស់ គ.ជ.ប ទៅ​ក្នុង​ក្របខ័ណ្ឌ​ដោយ​ឡែក​កំណត់​ដោយ​ព្រះ​រាជក្រឹត្យ ហើយ​ច្បាប់ គ.ជ.ប ថ្មី​នេះ​មាត្រា ៥៥ ក៏​នឹង​កំណត់​ថា រដ្ឋសភា​មាន​សិទ្ធិ​ក្នុង​ការ​បោះ​ឆ្នោត​ទម្លាក់ គ.ជ.ប ដូច​ការ​ទម្លាក់​រដ្ឋាភិបាល​ដែរ ដោយ​សារ សភា ជា​អ្នក​បង្កើត គ.ជ.ប»។

បើ​តាម​មន្រ្តី​ជាន់​ខ្ពស់​បក្ស​ទាំង​ពីរ​ក្នុង​ជំនួប​កំពូល​នេះ លោក សម រង្ស៊ី ក៏​បាន​ស្នើ​ទៅ​កាន់​លោក ហ៊ុន សែន ពិនិត្យ​មើល​លទ្ធភាព​ក្នុង​ការ​ដោះ​លែង​លោក មាជ សុវណ្ណារ៉ា មន្រ្តី​គណបក្ស​សង្គ្រោះ​ជាតិ​ផង​ដែរ។ ប៉ុន្តែ​បញ្ហា​នេះ លោក កើត រិទ្ធិ បាន​ឲ្យ​ដឹង​ថា នោះ​ជា​កំហុស​របស់​លោក មាជ សុណ្ណារ៉ា ដែល​មិន​បាន​ចូល​ខ្លួន​តាម​នីតិវិធី​និង​ដីកា​កោះ​របស់​តុលាការ។ លោក​ថ្លែង​ថា៖ «នេះ​មក​ពី​គាត់​មិន​ចូល​ខ្លួន​តាម​ដីកា​កោះ​ចំនួន​ពីរ​លើក ដូច​នេះ តុលាការ មាន​សិទ្ធិ​ក្នុង​ការ​ឃាត់​ខ្លួន និង​ឃុំ​ខ្លួន​គាត់។ យ៉ាង​ណា​ក៏​ដោយ លោក មាជ សុវណ្ណារ៉ា មាន​សិទ្ធិ​ក្នុង​ការ​ពឹង​ពាក់​មេធាវី​របស់​គាត់ ពិនិត្យ​មើល​លទ្ធភាព​ស្នើ​នៅ​ក្រៅ​ឃុំ​និង​ប្តឹង​ជំទាស់​ទៅ​កាន់​តុលាការ​ជាន់​ខ្ពស់​ទៀត។

លោក មាជ សុវណ្ណារ៉ា ត្រូវ​បាន​ជាប់​ពន្ធនាគារ​ចាប់​តាំង​ពី​ថ្ងៃ ទី១១ ខែ​វិច្ឆិកា ពាក់​ព័ន្ធ​នឹង​បាតុកម្ម​ដឹក​នាំ​ដោយ​គណបក្ស​សង្គ្រោះ​ជាតិ កាល​ពី​ថ្ងៃ ទី១៥ ខែ​កក្កដា ក្នុង​គ្រា​ដែល​មាន​ការ​ប៉ះ​ទង្គិច​គ្នា​រវាង​សមត្ថកិច្ច និង​បាតុករ ហើយ​កាល​ពី​ថ្មីៗ​នេះ ដើម្បី​ដោះ​លែង​លោក សុវណ្ណារ៉ា គណបក្ស​សង្គ្រោះ​ជាតិ បាន​រៀបចំ​ផែនការ​ធ្វើ​ឲ្យ​លោក​ក្លាយ​ទៅ​ជា​តំណាង​រាស្រ្ត ប៉ុន្តែ​ផែនការ​នោះ​ត្រូវ​បាន​ជំទាស់​ដាច់​ខាត​ដោយ​សហសេវិក​គណបក្ស​ដែល​លោក​ត្រូវ​ចូល​ជំនួស៕

អត្ថបទគួរចាប់អារម្មណ៍