The Phnom Penh Post Search

Search form




Logo of Phnom Penh Post newspaper Phnom Penh Post - វិស័យ​កាត់​ដេរ​នៅ​តែ​មាន​ភាព​ទាក់​ទាញ

វិស័យ​កាត់​ដេរ​នៅ​តែ​មាន​ភាព​ទាក់​ទាញ

អ្នករាំរបាំកំពុងរាំរបាំជូនពរក្នុងពិធីបើក​សម្ពោធពិព័រណ៍គ្រឿងម៉ាស៊ីនអន្តរជាតិ​កម្ពុជាលើកទី៤ ឆ្នាំ២០១៤ នៅ​សាល​សន្និសីទ​​កោះ​ពេជ្រ។
អ្នករាំរបាំកំពុងរាំរបាំជូនពរក្នុងពិធីបើក​សម្ពោធពិព័រណ៍គ្រឿងម៉ាស៊ីនអន្តរជាតិ​កម្ពុជាលើកទី៤ ឆ្នាំ២០១៤ នៅ​សាល​សន្និសីទ​​កោះ​ពេជ្រ។ ម៉ៃ វីរៈ

វិស័យ​កាត់​ដេរ​នៅ​តែ​មាន​ភាព​ទាក់​ទាញ

មន្ត្រី​ជាន់​ខ្ពស់​របស់​សមាគម​រោងចក្រ​កាត់ដេរ​សម្លៀក​បំពាក់ និង​វាយន​ភ័ណ្ឌ​កម្ពុជា (GMAC) បាន​អះអាង​​កាល​ពី​ថ្ងៃ​សុក្រ​ថា បើ​ទោះ​​បី​ជាមាន​បញ្ហា​ប្រឈម​ជា​ច្រើន​​ដូចជា​ការធ្វើ​បាតុកម្ម​ដោយ​កម្មករ​នាពេល​កន្លង​មក​ក៏​ដោយ ក៏​វិស័យ​នេះ​នៅ​តែ​មាន​ភាព​ទាក់​ទាញ​អ្នក​វិនិយោគ​ទុន​ថ្មី​មក​យ៉ាងច្រើន​ជា​រៀង​រាល់​ឆ្នាំ។

លោក John Cha Peng Koi អនុប្រធាន​ទី២ របស់ GMAC បាន​ថ្លែង​បែប​នេះ​ក្នុង​ពិធី​សម្ពោធ​ពិព័រណ៍​ឧស្សាហកម្ម​រោងចក្រ​កាត់​ដេរ​សម្លៀក​បំពាក់ និង​វាយន​ភ័ណ្ឌ​អន្តរជាតិ​កម្ពុជា​លើក​ទី៤ ឆ្នាំ ២០១៤ នា​សាល​សន្និសីទ​កោះ​ពេជ្រ​កាល​ថ្ងៃ​សុក្រ​ថា វិស័យកាត់​ដេរ​សម្លៀកបំពាក់ និង​វាយនភ័ណ្ឌ​កម្ពុជា​គឺជា​វិស័យ​ដ៏​ទាក់ទាញ​សម្រាប់​កំណើន​សេដ្ឋកិច្ច​កម្ពុជា។

លោកបាន​ថ្លែងថា៖ «បើ​គិត​មកដល់​បច្ចុប្បន្ន​នេះ បរិយាកាស​វិនិយោគ​ក្នុង​វិស័យ​សម្លៀក​បំពាក់ និង​វាយនភ័ណ្ឌ​គឺ​នៅតែ​រក្សា​កំណើន និង​​មាន​ការ​ទាក់​ទាញ​វិនិយោគិន​បរទេស បើ​ទោះ​ជា​យើង​បាន​ជួប​ប្រទះ​​នូវ​បញ្ហា​ប្រឈម និង​ឧបសគ្គ​ខ្លះៗ​នា​ពេល​កន្លង​មក​ក៏​ដោយ ប្រទេស​កម្ពុជា​​ទាក់​ទាញ​អ្នក​វិនិយោគ​ថ្មី​ច្រើន​ជាង ១០០ នាក់​ជា​រៀង​រាល់​ឆ្នាំ​សម្រាប់ វិស័យ​​សម្លៀ​កបំពាក់ និង​វាយនភ័ណ្ឌ​នេះ»។

លោក​បាន​ថ្លែង​បន្ត​ថា «ពិធី​នេះ​គឺ​ពិត​ជាមាន​សារៈសំខាន់​ខ្លាំងណាស់​សម្រាប់​វិស័យ​ឧស្សាហកម្ម​របស់​កម្ពុជា​នា​ពេល​នេះ គឺ​វា​ជា​ឱកាស​ដ៏​ល្អ​មួយ​សម្រាប់​ទាំង​អ្នក​ដាក់​តាំង អ្នក​ទស្សនា និង​ជាពិសេស​អ្នក​ដែល​នៅក្នុង​វិស័យ​នេះ​បាន​ឃើញ​និង​ទិញ​នូវ​ផលិតផល​បច្ចេក​វិទ្យា​​ចុង​ក្រោយ​សម្រាប់​ប្រើប្រាស់​នៅ​ក្នុង​ខ្សែ​ចង្វាក់​ផលិតកម្ម​របស់​ខ្លួន ជាពិសេស​សម្រាប់​វិស័យ​សម្លៀក​បំពាក់ និង​វាយនភ័ណ្ឌ ក្រុមហ៊ុន​វេច​ខ្ចប់ និង​សម្ភារ​សម្រាប់​វិស័យ​កសិកម្ម​ផងដែរ។ សម្រាប់​អ្នក​ដែល​ចង់​សហការ​វិនិយោគ ឬក៏​ចង់​ឈាន​ជើង​ចូល​វិនិយោគ​ក្នុង​ឧស្សាហកម្ម​ថ្មី កម្មវិធី​​នេះ​នឹង​អាចជួយ​អ្នក​បាន»។ នេះ​​បើ​យោងតាម​ការ​លើក​ឡើង​របស់​លោក John Cha។

គ្រឿង​ម៉ាស៊ីន​សម្រាប់​​ផ្គត់​ផ្គង់​ក្នុង​វិស័យ​កាត់​ដេរ​សម្លៀក​បំពាក់ ​និង​វាយនភ័ណ្ឌ​ដែល​ត្រូវ​បាន​ដាក់​តាំង​​បង្ហាញ រយៈពេល​បួន​ថ្ងៃ​ដល់​អតិថិជន​នានា ជា​ពិសេស​គឺ​អ្នក​ដែល​នៅ​ក្នុង​ឧស្សាហកម្ម​នេះ វិស័យ​សុខាភិបាល និង​វិស័យ​​កសិកម្ម៕  រូប​ថត ម៉ៃ វីរៈ
គ្រឿង​ម៉ាស៊ីន​សម្រាប់​​ផ្គត់​ផ្គង់​ក្នុង​វិស័យ​កាត់​ដេរ​សម្លៀក​បំពាក់ ​និង​វាយនភ័ណ្ឌ​ដែល​ត្រូវ​បាន​ដាក់​តាំង​​បង្ហាញ រយៈពេល​បួន​ថ្ងៃ​ដល់​អតិថិជន​នានា ជា​ពិសេស​គឺ​អ្នក​ដែល​នៅ​ក្នុង​ឧស្សាហកម្ម​នេះ វិស័យ​សុខាភិបាល និង​វិស័យ​​កសិកម្ម៕ ម៉ៃ វីរៈ

លោកស្រី Judy Wang ប្រធាន​ក្រុមហ៊ុន Yorkers Trade & Marketing ដែលមាន​មូលដ្ឋាន​នៅ​ទីក្រុង​ហុងកុង និង​ជា​អ្នក​រៀប​ចំ​ពិព័រណ៍​នេះ​ក៏បាន​​លើកឡើង​ដែរ​ថា ព្រឹត្តិការណ៍​នេះ​នឹង​ដើរ​តួ យ៉ាង​សំខាន់​សម្រាប់​ឧស្សាហកម្ម​កាត់ដេរ​សម្លៀក​បំពាក់ និង​វាយនភ័ណ្ឌ​របស់​កម្ពុជា​ក្នុង​ការ​ធ្វើ​ទំនើបកម្ម​គ្រឿង​ចក្រ​របស់​ខ្លួន និង​មាន​ឱកាស​បាន​ជួប​ពិភាក្សា​ជាមួយ​អ្នក​ជំនួញ​ផ្សេងៗ​ទៀត។

លោក​ស្រី​បាន​ថ្លែងថា៖ «យើង​ដឹង​ហើយ​ថា សមាហរណកម្ម​សេដ្ឋកិច្ច​អាស៊ាន (AEC) នឹង​ត្រូវ​បាន​​បង្កើតឡើង​នៅ​ចុងឆ្នាំ ២០១៥ ដូច្នេះ​គឺ​ទាមទារ​ឲ្យ​ប្រទេស​​កម្ពុជា​ត្រូវ​តែ​ខិតខំ​ធ្វើ​ពិពិធ​កម្ម​សកម្មភាព​សេដ្ឋកិច្ច​របស់​ខ្លួន និង​ខិតខំ​ជំរុញ​ការ​នាំចេញ​ដើម្បី​ធ្វើ​ឲ្យ​សម្រេច​បាន​កំណើន​សេដ្ឋកិច្ច​បាន​ខ្ពស់​ប្រកប​ដោយ​និរន្តរភាព និង​មាន​ផលិតផល​ដែល​មាន​តម្លៃ​បន្ថែម​ខ្ពស់»។

Content image - Phnom Penh Post

លោកស្រី​បាន​មាន​ប្រសាសន៍​បន្ត​ទៀតថា៖ «យើង​​រំពឹង​យ៉ាង​មុតមាំ​ថា វា​[ពិព័រណ៍] នេះ​នឹង​នាំមក​នូវ​ឱ​កាស​ដ៏​ធំធេង​​មួយ​ពី​ក្រុមហ៊ុន​ដែល​បាន​មក​ដាក់​តាំង​​បង្ហាញ​ផលិត​ផល និង​ការ​វិនិយោគ​បន្ថែម​ទៀត​ដល់​កម្ពុជា»។

បើ​យោងតាម​អ្នកស្រី Judy Wang សម្រាប់​ឆ្នាំនេះ​គឺមាន​ការចូលរួម​អ្នក​តាំង​ពិព័រណ៍​មក​ពី ២១ ប្រទេស​នៅក្នុង​តំបន់ និង​មាន ២៦០ ស្តង់​ដាក់​តាំង​បង្ហាញ​​នូវ​គ្រឿង​មាស៊ីន​ទំនើបៗ​សម្រាប់​ផ្គត់ផ្គង់​ក្នុង​វិស័យ​វាយនភ័ណ្ឌ និង​សម្ភារ​ដែល​ពាក់​ព័ន្ធ​ផ្សេងៗ​ទៀត។

លោក ឈួន តារា រដ្ឋលេខាធិការ​ក្រសួង​ពាណិជ្ជកម្ម​ទទួល​ស្គាល់​ថា​ការ​រៀប​ចំ​ពិពរ័ណ៍​នេះ​ គឺ​ពិត​ជា​ការ​រៀបចំ​មួយ​​ដ៏​ទាន់​ពេលវេលា​សម​ស្រប​ទៅ​នឹង​ការ​រីក​ចម្រើន​និង​ការវិវឌ្ឍ​នៃ​វិស័យ​នេះ។

លោកបាន​ថ្លែងឲ្យដឹង​ថា​៖​«ព្រឹតិ្តការណ៍​នេះ​នឹង​ជួយ​ជំរុញ​ការ​អភិវឌ្ឍ​វិស័យ​នេះ និង​ទាក់​ទាញ​ការ​វិនិយោគ​ថ្មីៗ ជា​ពិសេស គឺ​បង្កើន​សកម្មភាព​នៃ​ការ​នាំចេញ​នាំ​ចូល ហើយ​ក៏​នឹង​អាច​ផ្តល់​ឱកាស​សម្រាប់​ពាណិជ្ជករ​នៅ​ក្នុង​ឧស្សាហកម្ម​នេះ​ អាច​​ធ្វើ​ការ​អភិវឌ្ឍ​ម៉ាស៊ីន និង​ឧបករណ៍​ផ្សេងៗ​របស់​ខ្លួន និង​អាច​ស្វែង​រក​​ដៃ​គូ​បន្ថែម​ទៀត​ផង»។

វិស័យ​កាត់ដេរ​សម្លៀកបំពាក់ និង​វាយនភ័ណ្ឌ គឺជា​វិស័យ​មួយ​យ៉ាង​សំខាន់​ក្នុង​ការ​រួម​ចំណែក​ដល់​កំណើន​នៃ​ការ​នាំ​ចេញ​របស់​កម្ពុជា​ប្រមាណ​ជា​ ៨០​ភាគរយ​នៃ​ការ​នាំ​ចេញ​សរុប ហើយ​វា​ក៏​ជា​វិស័យ​មួយ​​ក្នុងការ​ជំរុញ​កំណើន​សេដ្ឋកិច្ច​របស់​កម្ពុជា​យ៉ាង​ធំធេង​ផងដែរ។

បើ​យោងតាម​របាយការណ៍​របស់​ក្រសួង​ការងារ គិត​ដល់​ពេល​នេះ កម្ពុជា​មាន​រោងចក្រ​កាត់​ដេរ និង​វាយនភ័ណ្ឌ​និង ស្បែក​ជើង​ជាង ៩៦០ និង​ស្រូប​ទាញ​កម្មករ​ប្រមាណ​ជា​ជាង ៦២០ ០០០ នាក់។

បើ​យោង​តាម​តួលេខ​ពី​ក្រសួង​ពាណិជ្ជកម្ម​​បាន​បង្ហាញ​ថា ប្រទេស​កម្ពុជា​បាន​ធ្វើ​ការ​នាំចេញ​ផលិត​ផល​​សម្លៀកបំពាក់ និង​វាយនភ័ណ្ឌ​គិត​ជា​ទឹកប្រាក់​ប្រមាណ​ជា​ជាង ២,៧ ពាន់​លាន​ដុល្លារ​​ នៅក្នុង​ឆមាស​ទី១​ ឆ្នាំ ២០១៤​នេះ ​គឺ​មាន​ការ​កើនឡើង​ប្រមាណ​ជា ៨ ភាគរយ​ធៀប​នឹង​​រយៈពេល​​ដូចគ្នា​កាលពី​ឆ្នាំមុន​គឺ​មានតែ​ប្រមាណ​ជា ២,៥ ពាន់​លាន​ដុល្លារ​អាមេរិក​​ប៉ុណ្ណោះ៕

អត្ថបទគួរចាប់អារម្មណ៍