The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​ចុះ​ឆែក​ឆេរ​ផ្ទះ​ឧកញ៉ា ថោង សារ៉ាត់ ជា​ថ្មី​ទៀត

សមត្ថកិច្ច​ចុះ​ឆែក​ឆេរ​ផ្ទះ​ឧកញ៉ា ថោង សារ៉ាត់ ជា​ថ្មី​ទៀត

ជន​ជាប់​ចោទ សៀង វាសនា ពេល​នាំ​ទៅ​សាលា​ដំបូង​រាជធានី​កាល​ពី​ថ្ងៃ ទី៥ ខែ​ធ្នូ។
ជន​ជាប់​ចោទ សៀង វាសនា ពេល​នាំ​ទៅ​សាលា​ដំបូង​រាជធានី​កាល​ពី​ថ្ងៃ ទី៥ ខែ​ធ្នូ។ ហេង ជីវ័ន

សមត្ថកិច្ច​ចុះ​ឆែក​ឆេរ​ផ្ទះ​ឧកញ៉ា ថោង សារ៉ាត់ ជា​ថ្មី​ទៀត

ប្រធាន​សាលា​ដំបូង​រាជធានី​ភ្នំពេញ លោក អាំង មាលតី និង​ស្នងការ​រង​រាជធានី លោក ជួន ណារិន្ទ កាល​ពី​ម្សិល​មិញ​បាន​ដឹក​នាំ​កម្លាំង​សមត្ថកិច្ច ចុះ​ឆែក​ឆេរ​ផ្ទះ​ចំនួន​ពីរ​កន្លែង​របស់​ឧកញ៉ា ថោង សារ៉ាត់ ក្នុង សង្កាត់​ចាក់​អង្រែ​ក្រោម និង​សង្កាត់​បឹងទំពុន ខណ្ឌ​មាន​ជ័យ។ នេះ​បើ​តាម​ចៅ​សង្កាត់​រង​សង្កាត់​ចាក់​អង្រែ​ក្រោម ដែល​ចូល​រួម​ក្នុង​ប្រតិបត្តិការ​នេះ។

ប្រតិបត្តិ​ការ​លើក ទី២ នេះ ធ្វើ​ឡើង​នៅ​ម៉ោង​ជិត ១០ ព្រឹក និង​បាន​បញ្ចប់​នៅ​ម៉ោង​ជាង ១ ថ្ងៃ តែ​មិន​ត្រូវ​បាន​គេ​បញ្ជាក់​ឲ្យ​ដឹង​ពិស្តារ​ពី​ប្រតិបត្តិការ​នេះ​ទេ។

លោក កែវ វ៉ាន់ដេត ចៅ​សង្កាត់​រង សង្កាត់​ចាក់​អង្រែ​ក្រោម ឲ្យ​ដឹង​ថា ការ​ឆែក​ឆេរ​នេះ ប៉ូលិស​បាន​រឹប​អូស​ឧបករណ៍​ប្រព័ន្ធ​កាមេរ៉ា​សុវត្ថិភាព​មួយ និង​បាន​ធ្វើ​កិច្ចសន្យា​ជាមួយ​នឹង​អ្នក​បម្រើ​ការងារ​នៅ​ផ្ទះ​របស់​លោក ថោង សារ៉ាត់ ដើម្បី​ស្នើ​សុំ​សម្ភារ និង​សម្លៀក​បំពាក់​របស់​ពួក​គេ ដែល​ទុក​ក្នុង​ផ្ទះ​នោះ បន្ទាប់​ពី​អាជ្ញាធរ​បាន ឆែក​ឆេរ​លើក​ដំបូង កាល​ពី​ថ្ងៃ ទី៣ ខែ​ធ្នូ។ លោក វ៉ាន់ដេត ថា៖ «ផ្ទះ​នេះ​គ្មាន​មនុស្ស​នៅ​ទេ ប៉ុន្តែ​មាន​ម៉ូតូ​ចំនួន ៤ គ្រឿង​ហើយ​ប៉ូលិស​មិន​បាន​ដក​ហូត​ម៉ូតូ​នោះ​ទេ»។

លោក ហៀក ចាន់លាង អភិបាល​រង ខណ្ឌ​មាន​ជ័យ បាន​ឲ្យ​ដឹង​ថា កិច្ច​សហ​ប្រតិបត្តិការ​នេះ គឺ​មិន​មាន​ការ​ចូល​រួម​ពី​អាជ្ញាធរ​ខណ្ឌ​ឡើយ «យើង​ក៏​មិន​ទាន់​បាន​ទទួល​សេចក្តី​រាយការណ៍​មក​កាន់​អាជ្ញាធរ​មូលដ្ឋាន​ដែរ»។

តាម​រយៈ​ប្រភព​ក្រៅ​ផ្លូវ​ការ បាន​អះអាង​ថា ក្នុង​កិច្ច​ប្រតិបត្តិការ​នេះ សមត្ថកិច្ច​បាន​ដក​ហូត វត្ថុតាង​មួយ​ចំនួន រួម​ទាំង​ម៉ូតូ ៣ គ្រឿង​ទៀត។ លោក ជួន ណារិន្ទ និង លោក អាំង មាលតី បាន​បដិសេធ​ផ្តល់​ព័ត៌មាន​ជុំវិញ​ប្រតិបត្តិ​ការ​នេះ ពី​ម្សិល​មិញ​ដោយ​ថ្លែង​ថា ជាប់​រវល់។ កាល​ពី​ម្សិល​មិញ​នេះ​ដែរ ជន​ជាប់​ចោទ ជា​ខ្មាន់​កាំភ្លើង​បាញ់​សម្លាញ់ លោក ឧកញ៉ា អ៊ឹង ម៉េងជឺ ឈ្មោះ សៀង វាសនា ដែល​ជា​អង្គរក្ស​របស់​លោក សារ៉ាត់ ត្រូវ​បាន​បញ្ជូន​មក​កាន់​សាលា​ដំបូង​រាជធានី​ភ្នំពេញ ដើម្បី​បន្ត​ការ​សាក​សួរ។

ក្នុង​ប្រតិបត្តិ​ការ​ចុះ​ឆែក​ឆេរ​ដំបូង របស់​សមត្ថកិច្ច​កាល​ពី​ថ្ងៃ ទី៣ ខែ​ធ្នូ បាន​រក​ឃើញ​នូវ​អាវុធ​មួយ​ចំនួន ដែល​ត្រូវ​បាន​អះអាង​ថា ជា​ការ​កាន់​កាប់​អាវុធ​ខុស​ច្បាប់ ហើយ​ឪពុក និង​ម្តាយ​របស់​លោក សារ៉ាត់ ក្រោយ​មក​នៅ​ថ្ងៃ ទី៨ ខែ​ធ្នូ ត្រូវ​បាន​ចៅ​ក្រម​ស៊ើប​សួរ​សាលា​ដំបូង​សម្រេច​ឃុំ​ខ្លួន​នៅ​ពន្ធនាគារ​ព្រៃ​ស ក្រោម​ការ​ចោទ​ប្រកាន់​ពី​បទ​រក្សា និង​កាន់​កាប់​អាវុធ​ខុស​ច្បាប់។

យ៉ាង​ណា​ក៏​ដោយ រហូត​មក​ទល់​ពេល​នេះ សមត្ថកិច្ច​នៅ​មិន​ទាន់​អាច​ចាប់​ខ្លួន លោក ថោង សារ៉ាត់ ដែល​រង​ចោទ​ថា ជា​មេខ្លោង​នៃ​ឃាតកម្ម​លើ​លោក អ៊ឹង ម៉េងជឺ បាន​នៅ​ឡើយ​ទេ៕

អត្ថបទគួរចាប់អារម្មណ៍