ភ្នំពេញៈ សាលាដំបូងរាជធានីភ្នំពេញ គ្រោងបើកសវនការជាថ្មីទៅលើសំណុំរឿងសកម្មជនគណបក្សសង្គ្រោះជាតិ ទាំង១១នាក់ រងចោទពីបទ ដឹកនាំ និងចូលរួមកុបកម្ម នៅថ្ងៃទី២៣ ខែកុម្ភៈ បន្ទាប់ពីមេធាវីការពារជនជាប់ចោទ បានធ្វើពហិការសវនាការដោយសារតែតំណាងរាស្ត្រពីររូបរបស់គណបក្សសង្គ្រោះជាតិ ត្រូវបានហាមឃាត់មិនឲ្យចូលរួមសវនាការសាធារណៈកាលពីថ្ងៃទី៨ ខែមករា កន្លងមក។
តំណាងរាស្ត្រគណបក្សសង្ក្រោះជាតិ ដែលត្រូវបានបដិសេធឲ្យចូលស្តាប់សក្ខីកម្មរបស់ជនជាប់ចោទ មានលោកស្រី មូរ សុខហួរ និងលោក ឡុង រី ស្ថិតក្នុងចំណោមតំណាងរាស្ត្រ៧រូប ដែលត្រូវបានចាប់ខ្លួន ពាក់ព័ន្ធនឹងហិង្សាក្បែរទីលានប្រជាធិបតេយ្យកាលពីថ្ងៃទី១៥ ខែកក្កដា ឆ្នាំ២០១៤ តែក្រោយមកត្រូវបានដោះលែងវិញ បន្ទាប់ពីមានកិច្ចព្រមព្រៀងនយោបាយ នៅថ្ងៃទី២២ ខែកក្កដា។
លោក សំ សុគង់ មេធាវីការពារជនចាប់ចោទ បានប្រាប់ភ្នំពេញប៉ុស្តិ៍កាលពីម្សិលមិញនេះថា តាមរយៈការជូនដំណឹងផ្ទាល់មាត់ពីលោកចៅក្រម តាំង ស៊ុនឡាយ សវនាការលើសំណុំរឿងរបស់សកម្មជនគណបក្សសង្គ្រោះជាតិទាំង១១នាក់ នឹងត្រូវបើកម្តងទៀតនៅថ្ងៃទី២៣ ខែកុម្ភៈខាងមុខនេះ។
លោកថា៖ «ក្រុមមេធាវី ក៏បានត្រៀមនូវភ័ស្តុតាង ក្នុងយុទ្ធសាស្ត្រថ្មី ដាក់បន្ថែមទៀត ដើម្បីបង្ហាញពីភាពគ្មានទោសរបស់ពួកគេ និងសកម្មភាពចូលរួមសម្តែងមតិ ក្នុងរូបភាពបាតុកម្ម ក្នុងនាមជាប្រជាពលរដ្ឋ»។
លោក មេធាវី ជួង ជូងី ឲ្យដឹងថា សម្រាប់សវនាការលើកក្រោយនេះ តំណាងរាស្ត្រគណបក្សសង្គ្រោះជាតិ អាចនឹងមិនចូលរួមស្តាប់សក្ខីកម្មទៀតនោះទេ តែអាចរង់ចាំស្តាប់នូវលទ្ធផលក្រៅបន្ទប់សវនាការ ដើម្បីបញ្ចៀសនូវភាពទើសទាល់របស់តុលាការ។
លោកថា៖ «មិនដូចមុនទៀតទេ ប្រហែលជាលែងទៅហើយ ខ្ញុំធ្វើការពិនិត្យមើលទៅ គឺពួកគាត់លែងទៅហើយ គាត់មិនចង់ឲ្យតុលាការទើសទាល់ ចង់ឲ្យតុលាការដំណើរការទៅ»។
បើតាមមេធាវីដើមបណ្តឹង លោក ចេង ប៉េងហាប់ ធ្លាប់បានអះអាងថា នេះជារឿងមិនសមស្រប ដែលលោកស្រី មូរ សុខហួរ និងលោក ឡុង រី ចូលរួមស្តាប់សក្ខីកម្មនោះ ព្រោះពួកគេ កំពុងស្ថិតក្រោមការត្រួតពិនិត្យរបស់តុលាការ។ លោកថា៖ «បើពួកគេមកអង្គុយស្តាប់ ពួកគេអាចមានមធ្យោបាយការពារខ្លួនឯងបាន»។
សកម្មជនទាំង១១នាក់នោះ រួមមាន លោក មាជ សុវណ្ណរ៉ា លោក អឿ ណារិទ្ធិ លោក ឃិន ជំរឿន ដែលរងចោទពីរបទល្មើស គឺបទដឹកនាំកុបកម្ម និងបទចូលរួមកុបកម្ម ចំណែកឯ លោក សាន សីហៈ លោក កែ ឃីម លោក នាង សុឃុន លោក សាន គឹមហេង លោក ស៊ុំ ពុទ្ធី លោក អ៊ុក ពេជ្រសំណាង លោក ទេព ណារិន និងលោក អាន បឋម ជាប់ចោទពីបទ ចូលរួមកុបកម្ម។
ជាមួយគ្នានេះដែរ កាលពីព្រឹកថ្ងៃសុក្រម្សិលមិញនេះ ចៅក្រមតុលាការកំពូល បានសម្រេចតម្កល់សេចក្តីសម្រេចរបស់សាលាឧទ្ធរណ៍ ដោយបដិសេធលើបណ្តឹងសុំនៅក្រៅឃុំរបស់សមាជិកក្រុមប្រឹក្សា ខណ្ឌច្បារអំពៅម្នាក់នៃគណបក្សសង្គ្រោះជាតិ ដែលរងចោទជាប់ពាក់ព័ន្ធនឹងហិង្សានៅក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា។
ក្នុងសនាវការជំនុំជម្រះ ដឹកនាំដោយប្រធានតុលាការកំពូល លោក ឃឹម ប៉ុន និងអានដោយចៅក្រមជាសមាជិក បានឲ្យដឹងថា តុលាការមិនពិចារណាលើសំណើនៅក្រៅឃុំនេះដោយសារតែនីតិវិធីស៊ើបសួរ និងការជំនុំជម្រះចំនួន២ដង នៅសាលាដំបូង បានដំណើរការហើយ ដែលចៅក្រម យល់ឃើញថា ការសម្រេចរបស់សាលាឧទ្ធរណ៍គឺស្របតាមគតិច្បាប់។
ក្រោយបញ្ចប់សវនាការ ខណៈបញ្ជូនត្រឡប់ទៅកាន់ពន្ធនាគារព្រៃសវិញ ជនជាប់ចោទ លោក ស៊ុំ ពុទ្ធី បានឲ្យដឹងថា លោក សោកស្តាយចំពោះការសម្រេចបែបនេះ ដោយសារលោក កំពុងមានជំងឺ ត្រូវការការព្យាបាល។ ឈរខាងក្រៅបន្ទប់សវនាការ អ្នកស្រី ម៉ាក់ ចាន់ ភរិយាលោក ស៊ុំ ពុទ្ធី បានអំពាវនាវដល់តុលាការ និងរាជរដ្ឋាភិបាល ឲ្យដោះលែងប្តីរបស់ខ្លួន៕
