The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ទេសចរណ៍​ថៃ​ខិតខំ​ពង្រឹង​វិស័យ​ទេសចរណ៍​ជាមួយ​កម្ពុជា

អាជ្ញាធរ​ទេសចរណ៍​ថៃ​ខិតខំ​ពង្រឹង​វិស័យ​ទេសចរណ៍​ជាមួយ​កម្ពុជា

Content image - Phnom Penh Post

អាជ្ញាធរ​ទេសចរណ៍​ថៃ​ខិតខំ​ពង្រឹង​វិស័យ​ទេសចរណ៍​ជាមួយ​កម្ពុជា

បន្ទាប់ពី​មាន​បញ្ហា​ប្រឈម​មុខ​ដាក់​គ្នា​តាម​ខ្សែបន្ទាត់​ព្រំដែន​រវាង​ប្រទេស​ទាំង​ពីរ​ កម្ពុជា និង​ថៃ​ អស់​រយៈពេល​ជាច្រើន​ឆ្នាំ​ចាប់​តាំងពី​ប្រាសាទ​ព្រះវិហា​របស់​កម្ពុជា​ត្រូវ​បាន​ចុះបញ្ជី​ក្នុង​បេតិកភណ្ឌ​ពិភពលោក​ដែល​បង្ក​ឡើង​ដោយ​ក្រុម​ជាតិនិយម​មួយ​ក្តាប់​តូច​នៅ​ទីក្រុង​បាងកក​ បាន​ធ្វើឲ្យ​ទាំង​ទំនាក់ទំនង​ការទូត វិស័យ​ពាណិជ្ជកម្ម និង​ជាពិសេស​គឺ​វិស័យ​ទេសចរណ៍​រវាង​ប្រទេស​ទាំង​ពីរ​មាន​ការ​ថមថយ​ជា​លំដាប់​។

ថ្មីៗ​នេះ​មន្ដ្រី​ទេសចរណ៍​ថៃ និង​អ្នក​រកស៊ី​នៅក្នុង​ឧស្សាហកម្ម​នេះ​រំពឹង​ថា ឧស្សាហកម្ម​ទេសចរណ៍​រវាង​ប្រទេស​ថៃ និង​កម្ពុជា​នឹង​ត្រូវ​បាន​លើក​កម្ពស់ ហើយ​នឹង​បន្ត​ដើរ​តួនាទី​ដ៏សំខាន់​សម្រាប់​ការ​ទាក់ទាញ​ភ្ញៀវទេសចរ​បរទេស​កាន់តែ​ច្រើន​ឡើង ជាពិសេស​នឹង​ធ្វើការ​ខិតខំ​សម្រួល​ឲ្យ​មាន​លំហូរ​ចូល និង​ចេញ​នៃ​ប្រជាជន​របស់​ប្រទេស​ទាំង​ពីរ​កាន់តែ​ច្រើន​ថែម​ទៀត បន្ទាប់ពី​ជម្លោះ​នយោបាយ និង​ភាព​វឹកវរ​ក្នុង​ប្រទេស​ថៃ​អស់​រយៈពេល​ជាច្រើន​ឆ្នាំ ត្រូវ​បាន​ដោះស្រាយ​ដោយ​ពួក​យោធា​ថៃ។

បើ​គិត​ចាប់​តាំងពី​ពេល​នោះ យ៉ាង​ហោច​ណាស់​មេដឹកនាំ​របស់​ប្រទេស​ថៃ​ ៥ ​រូប​ត្រូវ​បាន​ផ្លាស់ប្តូរ និង​មាន​ការ​ធ្វើ​រដ្ឋប្រហារ​យោធា​ចំនួន​ពីរ​ដង​នៅក្នុង​ប្រទេស​របស់​អាស៊ាន​មួយ​នេះ​។ នៅពេល​នេះ ប្រទេស​នេះ​កំពុង​ស្ថិត​នៅ​ក្រោម​ការ​គ្រប់គ្រង​ដោយ​មេដឹកនាំ​យោធា​។

ភ្ញៀវទេសចរ​ទស្សនា​ប្រាង្គប្រាសាទ​នៅ​ទីក្រុង​អយុធ្យា​ដែល​ជា​អតីត​រាជធានី​ខ្មែរ​នៅ​ថៃ។
ភ្ញៀវទេសចរ​ទស្សនា​ប្រាង្គប្រាសាទ​នៅ​ទីក្រុង​អយុធ្យា​ដែល​ជា​អតីត​រាជធានី​ខ្មែរ​នៅ​ថៃ។ រូបថត ម៉ៃ គុណមករា

ប្រទេស​ដែល​មាន​ភូមិ​ផង​របង​ជាមួយ​គ្នា និង​មាន​ប្រវត្តិសាស្រ្ត​ដ៏យូរលង់​ទាំង​ពីរ​នេះ​បាន​ប្រឈម​មុខ​ដាក់​គ្នា​តាម​ខ្សែបន្ទាត់​ព្រំដែន នៅពេល​ប្រាសាទ​ព្រះវិហារ​របស់​កម្ពុជា​បាន​ចុះបញ្ជី​ជា​បេតិកភណ្ឌ​ពិភពលោក​របស់​អង្គការ UNE SCO កាលពី​ថ្ងៃ​ទី​៧ ខែ​កក្កដា ឆ្នាំ​២០០៨ ហើយ​បណ្ដាលឲ្យ​មាន​ការ​តវ៉ា​ជាច្រើនលើក​ច្រើនសា​ដោយ​ប្រជាជន​ថៃ​ដែល​អះអាង​ពី​កម្មសិទ្ធិ​លើ​ប្រាសាទ​នេះ ហើយ​ក៏​បាន​ជំរុញ​ឲ្យ​កម្ពុជា​បញ្ជូន​បញ្ហា​នេះ​ទៅ​តុលាការ​យុត្តិធម៌​អន្តរជាតិ​អង្គការ​សហប្រជាជាតិ ​(ICJ) ​ដើម្បី​ធ្វើការ​បកស្រាយ​សាលក្រម​ឡើង​វិញ។

តែ​ទោះ​ជា​យ៉ាង​ណា ក៏​មាន​ការ​ប៉ះទង្គិច​គ្នា​មួយ​ចំនួន​ជុំវិញ​ទីតាំង​ប្រវត្តិសាស្ដ្រ​មួយ​នេះ​ដែល​បាន​សម្លាប់​មនុស្ស​យ៉ាង​ហោច​ណាស់​ ២៨ ​នាក់ និង​បាន​ជម្លៀស​មនុស្ស​ដែល​មាន​លំនៅឋាន​ជិត​ប្រាសាទ​ព្រះវិហា​រាប់​ពាន់​នាក់​ទៅ​កាន់​ទីសុវត្ថិភាព។

កាលពី​ថ្ងៃ​ទី​១១​ ខែ​ កញ្ញា ​ឆ្នាំ ​២០១៣ តុលាការ​យុត្តិធម៌​អន្តរជាតិ​ (ICJ) ​បាន​សម្រេច​ថា កម្ពុជា​មាន​អធិបតេយ្យ​លើ​ទឹកដី​ទាំង​មូល​របស់​ប្រាសាទ​ព្រះវិហារ ហើយ​ថា​ប្រទេស​ថៃ​ត្រូវ​តែ​ដក​កងកម្លាំង​យោធា​របស់​ខ្លួន​ចេញ​ពី​តំបន់​នេះ​។

ថៃ​ ធ្លាប់​ជា​ច្រក​នាំចូល​នៃ​ភ្ញៀវទេសចរ​ដ៏សំខាន់​សម្រាប់​កម្ពុជា​អស់​រយៈពេល​ជាច្រើន​ឆ្នាំ​មុន​ពេល​មាន​ការ​ជាប់គាំង​នៅ​តាម​ព្រំដែន​។

លោក Thawatchai Arunyik ប្រធាន​អាជ្ញាធរ​ទេសចរណ៍​ថៃ​បាន​ថ្លែង​មក​កាន់​ កម្ពុជា​ចុងសប្ដាហ៍​ នៅ​ក្រៅ​ជំនួប​ប្រជុំ​នៃ​កិច្ចប្រជុំ Best Friend Forever Fam Trip ឆ្នាំ ​២០១៤ ​របស់​ប្រទេស​ថៃ​នៅ​ទីក្រុង​បាងកក​ថា ការ​ជាប់គាំង​នយោបាយ​មាន​រយៈពេល​វែង​នៅក្នុង​ប្រទេស​ថៃ និង​បញ្ហា​មួយ​ចំនួន​ជាមួយ​ប្រទេស​កម្ពុជា​កន្លងមក​ត្រូវ​បាន​ដោះស្រាយ​រួច​ហើយ ដោយ​លោក​រំពឹង​ថា​ឧស្សាហកម្ម​ទេសចរណ៍​រវាង​ប្រទេស​ជិត​ខាង​ទាំង​ពីរ​នេះ​នឹង​ត្រូវ​បាន​ស្ទុះ​ងើប​ឡើង​វិញ​ដូចដើម។

លោក​លើក​ឡើង​ថា​៖ «​ពិត​ហើយ យើង​ត្រូវតែ​លើក​កម្ពស់​រួម​គ្នា​ដោយសារ​តែ​យើង​ជា​ប្រទេស​ជិត​ខាង​គ្នា​។ កាលពី​ពេល​មុន យើង​បាន​លើក​កម្ពស់​នូវ​ការ​ផ្សព្វផ្សាយ​រួម​គ្នា​នូវ​វិស័យ​នេះ​ថា «ព្រះរាជាណាចក្រ​ពីរ ទិសដៅ​តែ​មួយ»​។ ខ្ញុំ​គិត​ថា​នៅក្នុង​ពេល​អនាគត សម្រាប់​សហគមន៍​សេដ្ឋកិច្ច​អាស៊ាន ច្បាស់ណាស់ យើង​ត្រូវតែ​លើក​កម្ពស់​រួម​គ្នា​។ ខ្ញុំ​គិតថា ​ប្រជាជន​ដែល​ធ្វើ​ដំណើរ​មក​ប្រទេស​ថៃ ពួកគេ​មិន​ឈប់​នៅក្នុង​ប្រទេស​ថៃ​នោះ​ទេ ពួកគេ​ត្រូវ​តែ​ទៅ​និង​ទស្សនា​ប្រទេស​កម្ពុជា​ផង​ដែរ ដូច្នេះ​ហើយ​នោះ​គឺជា​ហេតុ​ដែល​យើង​ចាំបាច់​ត្រូវ​សហការ​គ្នា​ឲ្យ​បាន​ជិតស្និទ្ធ​ដើម្បី​សម្រេច​បាន​ក្នុង​ពេល​អនាគត​ក្នុង​ការ​លើក​កម្ពស់​ឧស្សាហកម្ម​នេះ​»។

លោក Nathakorn Piamprom អ្នក​គ្រប់គ្រង​ទូទៅ​របស់​ក្រុមហ៊ុន​អាកាសចរណ៍ Thai Airway ដែល​កំពុង​ប្រតិបត្តិការ​នៅ​កម្ពុជា​ចាប់​តាំងពី​ឆ្នាំ​១៩៩២​បាន​ប្រាប់ កម្ពុជា​ចុងសប្ដាហ៍ នៅ​ទីក្រុង​បាងកក​ថា ទោះបី​ជា​ប្រទេស​ថៃ​ត្រូវ​បាន​គ្រប់គ្រង​ដោយ​រដ្ឋាភិបាល​យោធា​ក៏ដោយ ក៏​ស្ថានការណ៍​នៅក្នុង​ប្រទេស​ថៃ​ត្រូវ​បាន​កែលម្អ​ដើម្បី​ស្វាគមន៍​ភ្ញៀវទេសចរ​ជាពិសេស​ភ្ញៀវទេសចរ​មកពី​កម្ពុជា​។

លោក​បាន​បញ្ជាក់​ថា​៖ «​ខ្ញុំ​បាន​សង្កេត​ឃើញ​ថា យើង​កំពុង​ទទួល​បាន​ការ​កើនឡើង​ជាច្រើន​នូវ​ចំនួន​អ្នក​ធ្វើ​ដំណើរ ដោយសារ​តែ​ប្រជាជន​មាន​អារម្ម​ណ៍​ថា​មាន​សុវត្ថិភាព​ច្រើន​នៅ​ទីនោះ និង​មិន​មាន​បញ្ហា​លំបាក​ណា​មួយ​កើតឡើង​នៅក្នុង​ទីក្រុង​បាងកក​ទៀត​ទេ ដូចជា​អ្វី​ដែល​អ្នក​បាន​មើល​ឃើញ​នៅពេល​នេះ ពួកគេ [ភ្ញៀវទេសចរ​] មាន​ទំនុក​ចិត្ត​ឡើង​វិញ និង​ចាប់ផ្ដើម​ធ្វើ​ដំណើរ​កាន់តែ​ច្រើន​ឡើងៗ​»។

លោក​បន្ត​ថា របបយោធា​ដែល​ចាប់ផ្ដើម​ឡើង​កាលពី​ថ្ងៃ​ទី​១ ខែ​មិថុនា ប្រជាជន​មាន​ការ​បារម្ភ​ថា នឹង​មិន​មាន​សុវត្ថិភាព ឬ​បញ្ហា​ពិបាក​សម្រាប់​ការ​ធ្វើ​ដំណើរ​នៅក្នុង​ទីក្រុង​បាងកក ប៉ុន្តែ​ចាប់ពី​ខែ​កក្កដា​អ្វីៗ​គ្រប់​យ៉ាង​ត្រឡប់​ទៅ​ធម្មតា​វិញ ប្រសិន​បើ​ប្រៀបធៀប​នឹង​កាលពី​ឆ្នាំ​២០១៣។

លោក​ថា៖ «ខ្ញុំ​មើល​ឃើញ​ការ​កើនឡើង​កាន់តែ​ច្រើន​សម្រាប់​ភ្ញៀវ​ពី​ប្រទេស​កម្ពុជា​ទៅ​ទស្សនា​ប្រទេស​ថៃ​»។

«​ចំពោះ​បញ្ហា​ប្រឈម​មុខ​គ្នា​នៅ​តាម​ព្រំដែន នៅពេល​នេះ​ខ្ញុំ​គិត​ថា​អ្វីៗ​គ្រប់​យ៉ាង​បាន​ដោះស្រាយ​រួច​ហើយ ដោយសារ​តែ​រដ្ឋាភិបាល​សហការ​គ្នា​យ៉ាង​ជិតស្និទ្ធ​ជាមួយ​គ្នា ដូច​ដែល​អ្នក​បាន​មើល​ឃើញ​ប្រជាជន​ថៃ​មួយ​ចំនួន​ដែល​ជាប់​ឃុំ​នៅ​គុក​ព្រៃស​ត្រូវ​បាន​ដោះលែង​។ ខ្ញុំ​រំពឹង​ថា​នឹង​មាន​ការ​ធ្វើ​ដំណើរ​កាន់តែ​ច្រើន​ឡើង​រវាង​ប្រទេស​ទាំង​ពីរ​នេះ​ហើយ​ក៏​នឹង​មាន​ទំនាក់ទំនង​កាន់តែ​ជិតសិ្នទ្ធ​រវាង​ប្រជាជន​របស់​ប្រទេស​ទាំង​ពីរ ថៃ និង​កម្ពុជា​» នេះ​បើ​យោងតាម​លោក Nathakorn។

បើ​យោងតាម​ទិន្នន័យ​បាន​ពី​ក្រសួង​ទេសចរណ៍​បង្ហាញ​ថា ការ​មក​ដល់​របស់​ភ្ញៀវទេសចរ​ពី​តំបន់​អាស៊ាន​បាន​រួមចំណែក​ប្រហែល​៣៩​ភាគរយ​នៃ​ការ​មក​ដល់​សរុប​មក​កាន់​កម្ពុជា ក្នុង​រយៈពេល​ ៤ ​ខែ​ដំបូង​ឆ្នាំ​នេះ ដោយ​មាន​ភ្ញៀវទេសចរ​ជាង​ ១,៩ ​លាន​នាក់​ធៀប​នឹង​ជិត ​១,៨ ​លាន​នាក់​នៅក្នុង​រយៈពេល​ដូច​គ្នា​កាលពី​ឆ្នាំ​មុន។ ក្នុង​ចំនួន​នោះ ភ្ញៀវទេសចរ​មក​ដល់​ពី​ប្រទេស​ថៃ​បាន​ធ្លាក់​ចុះ​ ៦,៥ ​ភាគរយ ​មក​នៅ​ត្រឹម ​៨៩ ៧៤៤ ​នាក់​ធៀប​នឹង​ ៩៦ ០០៧​ នាក់​ដោយ​ជាប់​លំដាប់​ទី ​៨។

លោក​ហូ វណ្ឌី សហប្រធាន​ក្រុម​ការងារ​វិស័យ​ទេសចរណ៍​ឯកជន រដ្ឋាភិបាល​បាន​ថ្លែង​ថា ស្ថាន​ការណ៍​កាន់តែ​ល្អ​ប្រសើរ​នៅក្នុង​ប្រទេស​ថៃ ការ​ទាក់ទាញ​ទេសចរ​កាន់តែ​ល្អ​ប្រសើរ ដូច្នេះ​ហើយ​កម្ពុជា​នឹង​ទទួល​បាន​អត្ថប្រយោជន៍​កាន់តែ​ច្រើន​។

លោក​បញ្ជាក់​ថា​៖ «​ប្រទេស​ថៃ​គឺជា​មជ្ឈមណ្ឌល​ទេសចរណ៍​របស់​អាស៊ី​នៅពេល​ដែល​ពួកគេ​ធ្វើ​កាន់តែ​ល្អ​យើង​នឹង​ទទួល​បាន អត្ថប្រយោជន៍​កាន់តែ​ច្រើន​។ អ្នក​ដឹង​ហើយ គ្រាន់តែ​ទីក្រុង​បាងកក​តែឯង មាន​ព្រលានយន្តហោះ​អន្តរជាតិ​២ មាន​ក្រុមហ៊ុន​អាកាសចរណ៍​ជាង​១០០​កំពុង​ប្រតិបត្តិការ​នៅ​ទី​នោះ ដូច្នេះ​ប្រសិន​បើ​ពួកគេ​អាច​គេ​នឹង​ទាក់ទាញ​ភ្ញៀវទេសចរ​បាន​កាន់តែ​ច្រើន​។ ពិត​ហើយ​វា​ច្បាស់ណាស់​យើង​នឹង​អាច​ទទួល​បាន​ភ្ញៀវទេសចរ​ទាំងនោះ​ផង​ដែរ ដោយសារ​ពួកគេ​ទាំងនោះ​នឹង​បន្ត​មក​ទស្សនា​នៅ​ប្រទេស​យើង​»។

លោក​និយាយ​ថា ​លំហូរ​ទេសចរ​ពី​ប្រទេស​ថៃ​មាន​ចំនួន​ជាង​៣០​ភាគរយ​នៃ​ការ​មក​ដល់​ទេសចរ​សរុប​មក​កាន់​កម្ពុជា​។

លោក​បាន​លើក​ឡើង​ថា​៖ «​នៅពេល​នេះ ដោយ​មាន​ការ​លើក​កម្ពស់​កាន់តែ​ខ្លាំង កិច្ចសហប្រតិបត្តិការ និង​ការ​លើក​ទឹកចិត្ត​ពី​មន្ដ្រីទេសចរ​ណ៍​របស់​ពួកគេ ខ្ញុំ​ពិតជា​ជឿជាក់​ថា យើង​នឹង​ទទួល​បាន​កាន់តែ​ច្រើន​ហើយ​ភ្ញៀវទេសចរ​កាន់តែ​ច្រើន​មកពី​ប្រទេស​ទាំង​នោះ ប្រសិនបើ​ស្ថានការណ៍​ផ្ទៃក្នុង​របស់​ពួកគេ​រក្សា​បាន​ការ​កែលម្អ​ដូចនេះ​»៕

អត្ថបទគួរចាប់អារម្មណ៍